Read Da'a Kaili PANGGITA 9 Bible Online

PANGGITA 9 - Da'a Kaili bible

PANGGITA 9

¹Naopu etu malaeka kalimamba'ana nompopomoni kololiona. Sangga nomonipa kololiona etu nikitaku saongu betu'e to nanawumo nggari langi sampe ri dunia. Betu'e etu niwai ka kunci pewobo nu lowu to da'a namala nitudu kandalana.

²Pade betu'e etu nombabea pewobo lowu etu. Naopu etu nesuwumo rangasu bete nggariara lowu ndala etu nasimbayu ewa rangasu tinalu bete to nitunju ntau. Pade mata eo bo lombona najadi narumau sabana nggari rangasu to nadea to nesuwu nggariara lowu ndala etu.

³Pade nggariara rangasu etu nesuwumo mboko-mboko nalau netu'u ri dunia. Mboko-mboko etu niwai ka kuasa mekiki ante neliu mpu'u kabisana ewa kabisa pekiki ndorokaa to naria riara dunia.

⁴Mboko-mboko etu nitagi mompakamate kawoko bara kayu bara tuja-tuja ntanina riara dunia. Aga manusia to da'a naria mere nu Alatala ri kirena to nipaloga rakiki mboko etu.

⁵Mboko-mboko etu da'a wo'u nipaloga mompatesi manusia ri dunia. Ira aga nipaloga mompandasa ira mpakaja'a-ja'a limambula kasaena. Ju'a to nirasai manusia to nikiki mboko etu nasimbayu ewa ju'a to nirasai ntau ane nikiki ndorokaa.

⁶Riara limambula kasaena etu manusia to nikiki mboko-mboko etu kana mandasa mpu'u niepe sampe ira tunggai mangelo mamate, tapi da'a mamala. Ira kana madota mpu'u mamate, tapi da'a ntoto mamala.

⁷Koro mboko-mboko etu nasimbayu ewa jara to nipakasadia malau mosipatesi. Ri balengga ira naria sangele nolenje ewa songgo bulawa. Pade lenje ira etu nasimbayu ewa manusia.

⁸Wo'o mboko etu nasimbayu ewa wo'o besi to nandoe. Pade ngisi ira ewa ngisi singa.

⁹Bombara ira nitutu nu ruke-ruke ewa baju ase. Pade wamba kapina ewa wamba doka nadea mpu'u niumbu jara nangowa malau mosipatesi.

¹⁰Lelo mboko etu nasimbayu ewa lelo ndorokaa, pade bisa lelona etu wo'u nasimbayu ewa kabisa pesiu nu lelo ndorokaa. Ante lelona etu ira namala mompakandasa manusia limambula kasaena.

¹¹Naria samba'a magau to najadi balengga ira, i'amo malaeka to nakuasa nombabea pewobo lowu ndala to da'a namala nitudu etu. Sangana riara Basa Ibrani, Abadon, pade riara Basa Yunani Apolion. Batua nu sanga etu “Toperopu.”

¹²Pepandasa pamulana naliumo, tapi danariapa rongaya pepandasa ntanina to marata.

¹³Naopu etu malaeka kaonomba'ana nompopomoni kololiona. Pade niepeku naria suara notesa nggari tatongo patanjidu Meja Mpesomba to nipowia nggari bulawa to naria ri ngayo Alatala.

¹⁴Suara etu nanguli ka malaeka kaonomba'ana to nanjoko kololio etu, “Wolemo patamba'a malaeka to niso'o ri Binangga Efrat etu.” [18]

¹⁵Jadi patamba'a malaeka etu niwolenamo. Patamba'a malaeka etu nipakasadia mamimo nggari nggaolu ala ri mpae bo wula pade ri eo bo jaa to nipakatantumo ira mamala mompatesi sabagia nggari tolubagia nggari pura-pura manusia riara dunia.

¹⁶Tantara-tantara topesawi jara to nantuki ira etu roatu juta kadeana. Ninjaniku kadeana sabana naria tau nanguli ka aku.

¹⁷Iwe'imo jara-jara pade topesawi-topesawi jara to nikitaku riara mpanggitaku: Topesawi jara etu nobaju ase. Baju ira etu nalei ewa jela apu, pade nagawu ewa rangasu apu, pade nangguni ewa watu to najelana. Ane jara-jara etu balenggana ewa balengga singa pade nggari ngangana nesuwu apu, rangasu bo watu to najelana.

¹⁸Nggari tolungaya pepandasa etu sabagia nggari tolubagia nggari manusia ri dunia nipatesi, etumo nggari apu, rangasu, pade watu to najelana to nesuwu nggari nganga jara-jara etu.

¹⁹Kuasa jara-jara etu nompatesi manusia nggari nganga ira, pade nggari lelona wo'u. Sabana ri lelo jara-jara etu naria sangele nolenje mpobalengga ule to nete'o. Jadi ante lelona jara-jara etu nompandasa manusia.

²⁰Manusia ntanina to da'a namate riara pepandasa-pepandasa etu da'a ntoto najea nggari panggawia pale ira to naja'a. Etumo ira da'a nenonto nombasomba seta-seta pade parantau-parantau to nipowia ira mboto nggari bulawa, nggari salaka, nggari tambaga, nggari watu, pade nggari kayu, etumo parantau to da'a naria matana mekita bo da'a wo'u naria talingana meepe pade da'a nokada sampe mamala molumako.

²¹Ira da'a wo'u najea nggari pokainggu ira to naja'ana, etumo da'a madota menonto mepatesi, pade da'a madota menonto mombadoti tau. Ira da'a madota menonto mogau sala ante tau da'a rongona mboto, pade ira da'a ntoto madota menonto mangangga.