Read Dagbani Piligu 12 Bible Online

Piligu 12 - Dagbani bible

Piligu 12

¹ Ka Yawɛ daa ti yɛli Ibram, “Yim’ a ya ŋɔ min’ a ba yiŋa ni a dɔɣiriba ŋɔ sani n-chaŋ tiŋgbɔn shɛl’ ni n ni yɛn wuh’ a.

²N ni chɛ ka a zuliya galisi pam. N ni niŋ alibarika niŋ a ni, ka chɛ ka a yuli du pam, ka chɛ ka ninvuɣ’ shɛb’ gba ti nya alibarika a zuɣu.

³ Ninvuɣ’ shɛb’ bɛn niŋ alibarika niŋ a ni, n gba ni niŋ alibarika niŋ bɛ ni. Ka ninvuɣ’ shɛb’ bɛn yɛli noli ti a, n gba ni yɛli noli ti ba. Ka dunia ŋɔ zuliya kam zaa ni ti nya alibarika a zuɣu.”

⁴Ka Ibram daa yiɣisi chaŋ kaman Yawɛ ni daa yɛl’ o ni o niŋ shɛm maa. Ka Lɔt daa dol’ o chaŋ. Ibram daa nyɛla yuun’ pisopɔinnaanu nira saha shɛl’ o ni daa yiɣisi Haran maa.

⁵Ibram daa zaŋla o paɣ’ Zarai min’ o tizo Haran bia Lɔt, ka bɛ daa laɣim bɛ ni mali binshɛlikam zaa zaŋ tabili bɛ ni mali ninvuɣ’ shɛb’ Haran tiŋgbɔŋ maa ni n-yiɣisi kuli Keenan tiŋgbɔŋ ni. Bɛ ni daa paai Keenan tiŋgbɔŋ maa ni,

⁶ka Ibram daa yi nimaani n-chaŋ Shɛkɛm ti ʒini Mɔre oki tia gbini. Keenannima n-daa be di tiŋgbɔŋ maa ni di saha maa.

⁷ Ka Yawɛ daa ka Ibram sanna ti yɛl’ o, “N ni zaŋ tiŋgbɔŋ ŋɔ ti a zuliya.” Di saha ka Ibram daa me sara maligu bimbini nimaani zali Yawɛ ŋun daa ka o sani maa na.

⁸Ka Ibram daa yiɣisi nimaani n-chaŋ ti ti o suɣili Bɛtɛl wulimpuhili polo zoli zuɣu ʒini; ka chɛ Bɛtɛl bahi wulinluhili polo, ka chɛ Ai mi bahi wulimpuhili polo. Ka o daa me sara maligu bimbini zali Yawɛ nimaani gba n-jɛmd’ o di gbini.

⁹Ka Ibram daa lan gbaai chandi zaŋ kpa Nɛgɛb polo.

¹⁰Ka kum daa ti lu bɛ tiŋgbɔŋ maa ni. Ka Ibram daa yiɣisi chaŋ Ijipti ni o ti ʒini nimaani n-niŋ daba ayi, dama kum maa daa miiya pam bɛ tiŋgbɔŋ maa ni.

¹¹O ni daa ti yɛn kpe Ijipti saha shɛli ka o yɛl’ o paɣ’ Zarai, “M mi ni a nyɛla paɣ’ viɛlli, ka a lihibu mali kɔre.

¹²Ka Ijiptinim’ yi ti nya a, bɛ ni yɛli, ‘O paɣa m-bala’, ka ku ma ka chɛ a.

¹³ Yɛlim’ ba ni a nyɛla n tizɔpaɣa, ka bɛ niŋ ma nirilim a zuɣu, ka tiligi n nyɛvili a zuɣu.”

¹⁴Ka Ibram ni daa ti kpe Ijipti, Ijiptinim’ daa shiri nyaya ka paɣ’ maa nyɛla paɣ’ viɛlli.

¹⁵Firawuna kpambaliba ni daa nya o, bɛ daa paɣ’ o pam Firawuna sani. Ka bɛ daa zaŋ o tahi Firawuna yiŋa.

¹⁶Ka Firawuna daa niŋ Ibram nirilim viɛnyɛliŋga Zarai zuɣu. O daa ti Ibram piɛri mini buhi ni niɣi ni bundibisi ni bunnyama ni daba bɛn nyɛ dɔbba mini paɣiba ni laakumnima.

¹⁷Amaa ka Yawɛ daa chɛ ka alɔbo dɔriti gbaai Firawuna min’ o yiŋnima, Ibram paɣ’ Zarai maa zuɣu.

¹⁸Ka Firawuna daa boli Ibram na nti bɔh’ o, “Bɔ n-niŋ ka a niŋ ma lala? Bɔ n-niŋ ka a bi yɛli ma ni o nyɛla a paɣa?

¹⁹Bɔ n-niŋ ka a yɛli ni o nyɛla a tizɔpaɣa, ka n zaŋ o niŋ m-paɣa? Dinzuɣu n-nyɛ a paɣa! Zaŋm’ o chaŋ.”

²⁰Ka Firawuna daa bah’ o niriba noli, ka bɛ zaŋ Ibram min’ o paɣa ni o ni mali binshɛlikam zaa yihi soli.