Read Dagbani Piligu 13 Bible Online

Piligu 13 - Dagbani bible

Piligu 13

¹Ka Ibram min’ o paɣa daa zaŋ bɛ ni su binshɛlikam zaa n-yi Ijipti chaŋ Nɛgɛb, ka Lɔt daa dol’ o chaŋ.

²Ibram daa mali buni pam. O daa mali biŋkɔbiri mini anzinfa ni salima.

³Ka o daa yi Nɛgɛb n-chaŋ hal ti paai Bɛtɛl luɣ’ shɛli o ni daa tuui kpa o tanti suɣili zali piligu ni, ka di be Bɛtɛl mini Ai sunsuuni la.

⁴O ni daa tuui me sara maligu bimbini zali luɣ’ shɛl’ la; nimaani ka Ibram daa jɛm Yawɛ.

⁵Ka Lɔt ŋun daa doli Ibram maa gba daa mali biŋkɔbbaligu mini niɣi ni tantinima,

⁶ka di zuɣu daa chɛ ka palo pɔri ni bɛ zaa tooi laɣim be nimaani; dama bɛ ni daa su binshɛŋa daa galisiya pam, lala zuɣu ka bɛ daa naan ku tooi laɣim be luɣ’ yini.

⁷Ka naŋgbankpeeni daa ti kpe Ibram biŋkɔbiguliba mini Lɔt biŋkɔbiguliba sunsuuni. Di saha maa Keenannim’ mini Pɛrizinima n-daa be tiŋgbani maa ni.

⁸Ka Ibram daa yɛli Lɔt, “Di chɛ ka naŋgbankpeeni kpe m min’ a sunsuuni; a mi di chɛ ka naŋgbankpeeni kpe a biŋkɔbiguliba mini m biŋkɔbiguliba sunsuuni, dama ti nyɛla dɔɣim.

⁹Pa palo n-kul do a tooni ŋɔ? Woligim’ ka chɛ ma. A yi zaŋ kpa nuzaa polo, n ni zaŋ kpa nudirigu polo; ka a yi zaŋ kpala nudirigu polo, m mi ni zaŋ kpa nuzaa polo.”

¹⁰ Ka Lɔt daa kpuɣ’ o zuɣu lihi Jɔɔdɛn Mɔɣili polo n-nya ka kom kul tɛli di vinvamli ni luɣ’ shɛlikam zaa, ka di be kaman Yawɛ tihi puu[11] la bee m-be kaman Ijipti tiŋgbɔŋ ni luɣ’ shɛli din be Zɔa polo la. Dimbɔŋɔ nyaaŋa ka Yawɛ daa naanyi ti saɣim Sɔdom mini Gomɔra la.

¹¹Ka Lɔt daa pii Jɔɔdɛn Mɔɣili vinvamli polo maa n-daa zaŋ kpa wulimpuhili polo. Bɛ ni daa woligi shɛm m-bala.

¹²Ka Ibram daa be Keenan tiŋgbɔŋ ni, ka Lɔt mi be vinvamli maa ni fɔntinsi ni, ka daa ti yiɣisi n-zaŋ o tanti suɣili chaŋ ti kpa Sɔdom.

¹³Di saha Sɔdomnim’ daa nyɛla ninvuɣ’ biɛri ni bɛn tumd’ alahichi pam Yawɛ sani.

¹⁴Ibram mini Lɔt ni daa woligi maa nyaaŋa, ka Yawɛ daa yɛli Ibram, “Kpuɣim’ a zuɣu lihi a ni ʒe luɣ’ shɛli ŋɔ nuzaa polo mini nudirigu polo ni wulimpuhili polo ni wulinluhili polo.

¹⁵ A ni nya tiŋgbɔn shɛli maa zaa, n ni zaŋ li ti a zuliya ka bɛ su li sahakam.

¹⁶N ni chɛ ka a zuliya ti bemi kaman bihigu la, ka nir’ yi ni tooi kali bihigu, o ni ti tooi kal’ a zuliya gba.

¹⁷Yiɣisim’ doli tiŋgbɔŋ maa wɔɣilim mini di yɛliŋ nya, n ni zaŋ li ti a.”

¹⁸Dinzuɣu ka Ibram daa vuɣ’ o tanti suɣili n-chaŋ ti kpa Mamri oki ti’ shɛŋa din be Hiburɔn la gbini; ka daa me sara maligu bimbini zali nimaani jɛm Yawɛ.