Read Dagbani Piligu 14 Bible Online

Piligu 14 - Dagbani bible

Piligu 14

¹Shiina Naa Amirafɛl mini Ɛlasa Naa Ariok ni Ɛlam Naa Chɛdolaoma ni Goiim Naa Tidal

²daa ti lo tɔbu bɛ ʒiɛman’ ni n-chaŋ ni bɛ ti tuhi Sɔdom Naa Bɛra mini Gomɔra Naa Birisha ni Adima Naa Shinab ni Zɛbɔiim Naa Shɛmɛba ni Bɛla bee Zɔa naa.

³Nanim’ ŋɔ zaa daa naala noli n-laɣim bɛ tɔbbihi ti do Siddim vinvamli ni luɣ’ shɛli bɛ ni booni Teeku Kpiŋ pumpɔŋɔ ŋɔ.

⁴Bɛ daa jɛm Chɛdolaoma la yuun’ pinaayi, amaa yuun’ shɛli din daa pahiri yuun’ pinaata la ni ka bɛ daa zaɣisi ni bɛ ku lan jɛm o.

⁵Yuun’ shɛli din daa ti pahiri yuun’ pinaanahi ni, ka Chɛdolaoma mini na’ shɛb’ bɛn daa sɔŋd’ o daa chaŋ ti tuhi nyaŋ Rɛfaim din be Ashitɛrɔtikarinaim tiŋgbɔŋ ni mini Zuzim din be Ham tiŋgbɔŋ ni ni Ɛmim din be Shavɛkiriataim tiŋgbɔŋ ni

⁶ni Hɔrinim’ bɛn be Ɛdom[12] zoya ni la n-doli ba hal ni Ɛliparan din be mɔɣu ni tintariga la shee.

⁷Ka bɛ daa ŋmaligi lab’ Ɛnmishipat bɛ ni booni luɣ’ shɛli Kadɛshi la. Ka bɛ daa tuhi nyaŋ Amalɛk tiŋgbɔŋ ni nim’ mini Amɔrinim’ bɛn daa be Hazazɔntarima la zaa.

⁸Di saha maa ka Sɔdom naa mini Gomɔra naa ni Adima naa ni Zɛbɔiim naa ni Bɛla naa bɛ ni booni luɣ’ shɛli Zɔa la daa laɣim bɛ tɔbbihi chaŋ Siddim vinvamli ni,

⁹ka bɛ mini Ɛlam Naa Chɛdolaoma ni Goiim Naa Tidal ni Shiina Naa Amirafɛl ni Ɛlasa Naa Ariok ti gbaai tab’ tuhibu. Nanima anahi mini nanima anu n-daa lu tab’ zuɣu maa.

¹⁰Kootaali tandɔri n-daa kul yɛrigi Siddim vinvamli maa ni; ka Sɔdom mini Gomɔra nanim’ la daa ŋmaligi guuri ka bɛ ni shɛb’ faai lu kootaali tandɔri maa ni, ka bɛn kpalim mi zo nti du zoli.

¹¹Ka bɛ dimnim’ maa daa kana ti kpuɣi bɛn’ Sɔdomnim’ mini Gomɔranim’ maa nɛma mini bɛ binshɛɣukam zaa chaŋ.

¹²Hal bɛ daa gbaai Lɔt ŋun daa nyɛ Ibram tizo bia la gba, ka zaŋ o nɛma pahi chaŋ.

¹³Di saha ka bɛ ni yino ŋun daa zo n-tiligi daa kana ti yɛli Ibram ŋun daa nyɛ Hiburu nira ka be Mamri ŋun daa nyɛ Amɔri nir’ la oki tihi gbini. Mamri min’ o mabihi bɛn daa nyɛ Ɛshikol mini Anɛr la daa nyɛla Ibram zɔnima.

¹⁴Ibram ni daa wum ni bɛ tuhi gbaag’ o dɔɣim maa chaŋ maa, ka o daa zaŋ o tɔbbi’ shɛb’ bɛ ni daa dɔɣ’ o yiŋ’ puuni, ka bɛ nyɛ tɔbutuhiri’ biinsi la ninvuɣ’ kɔbisita ni pisaayika n-kari bɛ naba hal ti paai Dan.

¹⁵Ka Ibram daa pirigipirig’ o tɔbbihi maa n-chaŋ ti liri ba yuŋ ŋ-ŋme n-kari ba hal ti paai Hɔba din be Damaskus nuzaa polo la.

¹⁶Ka o daa va bɛ nɛma zaa, ka zaŋ o dɔɣim Lɔt min’ o nɛma gba ni ninvuɣ’ shɛba ni paɣiba m-pahi labina.

¹⁷Ibram ni daa nyaŋ Chɛdolaoma mini na’ shɛb’ bɛn be o sani ka labirina saha shɛli, ka Sɔdom naa daa chaŋ ti tuh’ o soli Shave vinvamli ni bɛ ni daa booni luɣ’ shɛli Naa Vinvamli la.

¹⁸Ka Salɛm Naa Mɛlikizɛdɛk ŋun daa lan nyɛ Zallakudura Naa maligumaana la daa zaŋ bɔrɔbɔro mini wain na nti ti Ibram;

¹⁹ka suhi alibarika niŋ o ni ka yɛli, “Zallakudura Naa ŋun nam zuɣusaa mini dunia ŋɔ niŋm’ alibarika niŋ Ibram ni!

²⁰ Ti paɣiri Zallakudura Naa ŋun chɛ ka a nyaŋ a dimnim’ ŋɔ!” Ka Ibram daa zaŋ binshɛɣukam zaa pia puuni zaɣ’ yiniyini yihi Mɛlikizɛdɛk zaka.

²¹Ka Sɔdom naa maa daa yɛli Ibram, “Zaŋm’ niriba ŋɔ ti ma, amaa ka mali nɛma ŋɔ zaa.”

²²Amaa ka Ibram daa yɛli, “M pun po Yawɛ ŋun nyɛ Zallakudura Naa ŋun nam zuɣusaa mini dunia ŋɔ

²³ni n ku zaŋ a gali bee a namdili mia bee a ni su binshɛlikam, ka a ti yɛli, ‘Mani n-chɛ ka Ibram leei bundana.’

²⁴N ku zaŋ binshɛli naɣila n nachimba ŋɔ mini ninvuɣ’ shɛb’ bɛn doli ma chaŋ la ni pun di shɛl’ la; amaa naɣ’ chɛ ka Anɛr mini Ɛshikol ni Mamri n-yihi bɛ tarili ni nyɛ shɛli di ni.”