Read Dagbani Piligu 17 Bible Online

Piligu 17 - Dagbani bible

Piligu 17

¹Ibram ni daa ti paai yuun’ kɔbigayinika saha shɛli, ka Yawɛ daa ka o sanna ti yɛl’ o, “Mani n-nyɛ Naawuni Kpiɔŋlan’ Naa; doli ma, ka tummi din tuhi.

²N ni chɛ ka m min’ a lo tab’ alikauli, ka n chɛ ka a zuliya nab’ pam.”

³Ka Ibram daa teei dɔni n-zaŋ o nina kpa tiŋa, ka Naawuni yɛl’ o,

⁴“N lo a alikauli, a ni niŋ zuliya pam yaba.

⁵ A mi yuli ku lan booni Ibram, amaa a yuli ni boonila Ibrahimma;[14] dama n zaŋ a leela zuliya pam yaba.

⁶N ni chɛ ka a nam zuliya pam, ka chɛ ka a zuliya yɛligi, ka nanim’ ti yi a zuliya ni na.

⁷ “Ka n ni chɛ ka m min’ a ni a zuliya mali alikauli din ni ʒiɛya sahakam bɛ ʒiɛmana ni. Ka n ni nyɛ a min’ a zuliya maa Naawuni.

⁸ Ka n ni zaŋ Keenan tiŋgbɔŋ zaa din nyɛ yi ni be tiŋgban’ shɛli puuni n-nyɛ saamba ŋɔ n-ti a min’ a zuliya maa, ka yi su li sahakam, ka n nyɛ bɛ Naawuni.”

⁹Ka Naawuni daa lan yɛli Ibrahimma, “Di simdi ni a min’ a zuliya maa gbibi n daalikauli maa bɛ ʒiɛmana zaa ni.

¹⁰ A min’ a zuliya maa ni yɛn doli n daalikauli shɛli maa m-bɔŋɔ: Di simdi ni yi puuni doo kam guni.

¹¹Gunimiya, ka di nyɛ m mini ya daalikauli maa shihirili.

¹²Gunimiya bidibiga kam o dɔɣibu nyaaŋa daba anii dali yi ʒiɛmana zaa ni; di yi nyɛla yi yiŋa ka yi dɔɣ’ o bee yi yi zaŋla yi liɣiri n-da o tinzun nir’ sanna, ka o pala yimaŋmaŋ’ zuliya.

¹³Di simdi ni a guni bɛ ni dɔɣi dab’ so a yiŋa min’ a ni zaŋ a liɣiri da so na zaa. Dina n-ni chɛ ka n daalikauli maa be yi niŋgbuna ni n-nyɛ alikauli din ni be sahakam.

¹⁴Ka doo kam ŋun bi guni, bɛn’ yihim’ o o daŋ’ ni, o ni bi gbibi n daalikauli maa zuɣu.”

¹⁵Ka Naawuni daa yɛli Ibrahimma, “Zaŋ chaŋ a paɣ’ Zarai mi polo, di lan bol’ o Zarai, amaa pumpɔŋɔ zaŋ chana bolim’ o la Zara.[15]

¹⁶N ni niŋ alibarika niŋ o ni; ka din pahi nyɛla, n ni chɛ ka o dɔɣi bidibiga ti a. N shiri ni niŋ alibarika niŋ o ni, ka chɛ ka o leei zuliya pam yabipaɣa; ka nanim’ ni ti yi o zuliya ni na.”

¹⁷Ka Ibrahimma daa teei dɔni n-zaŋ o nina kpa tiŋa ka la ka yɛl’ o suhu ni, “Wula ka ninvuɣ’ so ŋun paai yuun’ kɔbiga ni tooi lan dɔɣi bia? Ka Zara ŋun paai yuun’ pihiwɛi ŋɔ ni tooi lan dɔɣi bia?”

¹⁸Ka Ibrahimma daa yɛli Naawuni, “N suhir’ a, dolimi Ishimail nyɛvili”

¹⁹Amaa ka Naawuni daa yɛl’ o, “Aai, a paɣ’ Zara ni dɔɣi bidibiga ti a, ka a bol’ o yuli Yisahaku.[16] Ka n ni lo a min’ o zuliya alikauli shɛli din ni be sahakam.

²⁰N wum a ni suhi ma suhigu shɛli zaŋ chaŋ Ishimail gba polo maa. N ni niŋ alibarika niŋ o ni, ka chɛ ka o zuliya nab’ pam. O ni ti nyɛla nanim’ pinaayi yaba, ka n chɛ ka o zuliya ti galisi pam.

²¹Amaa n ni zaŋ n daalikauli n-lola Yisahaku so Zara ni yɛn dɔɣi ti a yuuni na ŋ-ŋɔ tasaha la.”

²²Naawuni ni daa tɔɣisi Ibrahimma yɛtɔɣa ŋɔ naai ka o daa chaŋ ka chɛ o.

²³Di nyaaŋa ka Ibrahimma daa gun’ o bia Ishimail mini bɛ ni daa dɔɣi dab’ bidib’ shɛb’ o yiŋa bee o ni daa zaŋ o liɣiri da shɛba. Doo kam ŋun daa be Ibrahimma yiŋa, o daa guni ba dindali maa kaman Naawuni ni daa yɛl’ o shɛm.

²⁴Ibrahimma yuma daa nyɛla yuun’ kɔbigayinika saha shɛl’ o ni daa guni;

²⁵ka o bia Ishimail mi daa nyɛ yuun’ pinaata bia saha shɛl’ o ni daa guni.

²⁶Dindali maa ka Ibrahimma min’ o bia Ishimail daa guni.

²⁷Ka dɔbba bɛn zaa daa be o yiŋ’ puuni, ka nyɛ bɛ ni dɔɣi bidib’ shɛb’ mini bɛ ni daa zaŋ bɛ liɣiri da shɛb’ tinzunnim’ sani zaa gba daa guni.