Read Dagbani Piligu 18 Bible Online

Piligu 18 - Dagbani bible

Piligu 18

¹Ka Yawɛ daa ti zaŋ omaŋ’ wuhi Ibrahimma Mamri oki tihi la gbini, o ni daa ʒi o tanti suɣili dunol’ ni wuntaŋ’ zuɣusaa saha la.

² Ka Ibrahimma daa lihi nya ka dɔbba ata ʒiɛya mir’ o. O ni daa nya ba maa, ka o yiɣis’ o tanti suɣili dunoli maa ni n-zo n-chaŋ bɛ sani nti damdi ba tiŋa

³ka yɛli, “N dana, a nini yi tiɣi ma, yin’ zanim’ mani yi dabili ŋɔ sani.

⁴Chɛliya ka bɛ niŋ kom biɛla tin ya na ka yi paɣi yi naba, ka ʒini tia ŋɔ gbini vuhi,

⁵ka n chɛ ka bɛ niŋ bindirigu tin ya na, yi ni ka mani yi dabili ŋɔ sani ŋɔ na zuɣu, di nyaaŋa ka yi naanyi gari.” Ka bɛ yɛl’ o, “Niŋm’ a ni yɛli shɛm maa.”

⁶Ka Ibrahimma daa niŋ yomyom kpe o tanti suɣili ni Zara sani nti yɛl’ o, “Toom’ a zim viɛlli la lita pisinaayi ŋ-ŋɔri li mali maha yomyom.”

⁷Ka Ibrahimma daa zo n-chaŋ o biŋkɔbiri sani nti gbaai naɣilabil’ polli ŋun viɛla n-ti o tumtumda, ka o kɔrig’ o mal’ o yomyom.

⁸Di saha ka Ibrahimma daa zaŋ waagasi mini bihim ni naɣilabil’ kpabili so bɛ ni daa kɔrigi duɣi maa nimdi na nti zali bɛ tooni, ka ʒe bɛ sani tia maa gbini ka bɛ dira.

⁹Di saha ka bɛ daa bɔh’ o, “Ka a paɣ’ Zara be ya?” Ka o yɛli ba, “O be tanti suɣili ŋɔ ni.”

¹⁰ Di saha ka bɛ ni yino yɛl’ o, “Biɛhiŋ kani, zaŋ chaŋ yuuni na ŋ-ŋɔ tasaha, n ni lab’ a sanna, ka a paɣ’ Zara ni ti dɔɣi bidibiga.” Ka Zara daa be o nyaaŋa tanti suɣili dunol’ ni n-wumda.

¹¹Di saha maa Ibrahimma mini Zara zaa daa kurigiya pam hal ka Zara bi lan nyari sɔrilim gba

¹² Ka Zara daa la o suhu ni ka yɛli, “N kurigiya, ka n yidan’ gba kurigi, ka n kɔre ni lan be doo ni?”

¹³Ka Yawɛ bɔhi Ibrahimma, “Bɔzuɣu ka Zara la ka yɛli, ‘N ni kurigi shɛm ŋɔ, n ni tooi lan dɔɣi bia?’

¹⁴ Shɛli bi to Yawɛ sani. N shiri ni ti labina yuuni na ŋ-ŋɔ tasaha, ka Zara ni ti dɔɣi bidibiga.”

¹⁵Amaa ka Zara daa chihi yɛli, “M bi la,” dama dabiɛm n-daa gbaag’ o. Ka o yɛli, “Aai, a laya.”

¹⁶Di saha ka niriba maa daa yiɣisi nimaani n-chani ka lihiri Sɔdom polo; ka Ibrahimma daa chani doli ba ni o zali ba soli.

¹⁷Ka Yawɛ daa yɛl’ o suhu ni, “Di simdi ni n zaŋ n ni lo ni n niŋ shɛli sɔɣi Ibrahimma?

¹⁸Dama o zuliya ni ti galisi ka mali kpiɔŋ, ka dunia ŋɔ niriba zaa ni ti nya alibarika la o zuɣu.

¹⁹Dama mani m-piig’ o ni o wuh’ o bihi min’ o yiŋnim’ zaa ka bɛ doli man’ Yawɛ soli, ka tumdi wuntia tuma ni din tuhi; ka di zuɣu chɛ ka man’ Yawɛ zaŋ n ni lo Ibrahimma binshɛli alikauli la ti o.”

²⁰Di saha ka Yawɛ daa yɛli, “Bɛ ni yɛri Sɔdomnim’ mini Gomɔranim’ daalahichi yɛla shɛm galisiya.

²¹N ni chaŋ nimaani ti nya bɛ shiri tumdi bɛ ni yɛri ni bɛ tumdi shɛm maa zaa bee bɛ bi tumdi li.”

²²Ka niriba maa daa ŋmaligi chani kpari Sɔdom polo, amaa ka Ibrahimma na kul ʒe Yawɛ tooni.

²³Ka Ibrahimma daa chaŋ o sani ti bɔh’ o, “A shiri yɛn laɣimla wuntizɔriba mini ninvuɣ’ biɛri ku?

²⁴Wuntizɔriba pihinu yi be tiŋ’ maa ni, a ni saɣim tiŋ’ maa ka ku tiligi li wuntizɔriba pihinu bɛn be di ni maa zuɣu?

²⁵Bɔzuɣu ka a yɛn niŋ lala? Bɔzuɣu ka a yɛn laɣim wuntizɔriba mini ninvuɣ’ biɛri ku, ka wuntizɔriba maa pahi ninvuɣ’ biɛri maa zuɣu nya tibidarigibo. Di niŋ lala! Nyin’ ŋun nyɛ dunianim’ zaa sariakarita ŋɔ ku niŋ din tuhi?”

²⁶Ka Yawɛ yɛl’ o, “N yi nya wuntizɔriba pihinu Sɔdom puuni, n ni chɛ bɛ taali maa bɛ zuɣu.”

²⁷Ka Ibrahimma daa lan yɛli, “Mani ŋun nyɛ taŋkpaɣu ni tampiligim ŋɔ niŋ suhukpeeni tɔɣisiri n Duuma yɛtɔɣa.

²⁸Ka wuntizɔriba maa yi nyɛla pihinahinaanu, a ni saɣim tiŋ’ maa niriba anu maa ni pooi maa zuɣu?” Ka o yɛli, “N yi nya wuntizɔriba pihinahinaanu tiŋ’ maa ni, n ku saɣim li.”

²⁹Ka Ibrahimma lan yɛli, “Ka a yi ti nyala wuntizɔriba pihinahi nimaani?” Ka o garigi yɛli, “Wuntizɔriba pihinahi maa zuɣu, n ku saɣim tiŋ’ maa.”

³⁰Di saha ka Ibrahimma daa lan yɛli, “N Duuma, n suhir’ a, di je suli niŋ ma n ni lan yɛn yɛli shɛm ŋɔ zuɣu. Ka a yi ti nyala wuntizɔriba pihita nimaani?” Ka o garigi yɛli, “N yi ti nya wuntizɔriba pihita nimaani, n ku saɣim tiŋ’ maa.”

³¹Ka Ibrahimma lan yɛli, “N na kul bɔri ni n yɛli n Duuma shɛli pahi. Ka a yi ti nyala wuntizɔriba pisi nimaani?” Ka o garigi yɛli, “Wuntizɔriba pisi maa zuɣu, n ku saɣim tiŋ’ maa.”

³²Ka Ibrahimma lan yɛli, “N Duuma, n suhir’ a, di je suli niŋ ma n ni lan yɛn yɛli shɛm pahi ŋɔ zuɣu. Ka a yi ti nyala wuntizɔriba pia nimaani?” Ka o garigi yɛli, “Wuntizɔriba pia maa zuɣu, n ku saɣim tiŋ’ maa.”

³³Ka Yawɛ daa tɔɣisi Ibrahimma yɛtɔɣa maa naai ka ŋmaligi, ka Ibrahimma gba daa ŋmaligi kuli.