Read Dagbani Piligu 19 Bible Online

Piligu 19 - Dagbani bible

Piligu 19

¹Ka malaikanima ayi maa daa mali ti paai Sɔdom zaawuni, ka Lɔt daa ʒi Sɔdom tiŋ’ puuni dunol’ ni. Lɔt ni daa nya ba, ka o yiɣisi chaŋ ti tuhi ba soli n-damdi zaŋ o zuɣu silim tiŋa ka yɛli,

²“N duumanima, ŋmaligimiya kpe mani yi dabili ŋɔ yiŋ’ na nti paɣi yi naba, ka gbe kpe n-sa daŋ yibu chaŋ yi chandi shee.” Ka bɛ yɛl’ o, “Aai, ti ni gbe solɔɣu zuɣu.”

³Amaa ka Lɔt daa balim ba pam; ka bɛ daa ŋmaligi dol’ o kpe o yiŋa; ka o daa chɛ ka bɛ mali bɔrɔbɔro din ka dabindi, ka o zaŋ li niŋ ba saani ka bɛ di.

⁴Ka bɛ daa na bi kpe gom, ka Sɔdom tiŋ’ puuni dɔbba bɛn nyɛ ninkura mini bipola zaa daa laɣimna nti teei gili yili maa,

⁵ka boli Lɔt m-bɔh’ o, “Saamba bɛn kpe a yil’ ŋɔ yuŋ ŋɔ la lee be ya? Zaŋm’ ba na ka ti goli ba.”

⁶Ka Lɔt daa vooi dunoli yo ka yi bɛ sani nti yɛli ba,

⁷“M mabihi, n suhiri ya, di tumiya tuumbiɛɣu ŋɔ.

⁸ Nyamiya, m mali bipuɣins’ ayi bɛn na ʒi dɔbba, chɛliya ka n zaŋ ba tin ya na ka yi niŋ ba yi ni bɔri shɛm; ka di niŋ ya niriba ŋɔ shɛli, bɛ ni kpe n yili ŋɔ zuɣu.”

⁹Amaa ka Sɔdomnim’ maa yɛl’ o, “Miligim’ ka ti ti palo. A nyɛla sana kpe, ka bɔri ni a wuhi ti ti ni yɛn niŋ shɛm? A yi bi baŋ ti ni niŋ a din bie n-gari ti ni yɛn niŋ ba shɛm.” Ka bɛ daa kul dihiri Lɔt na hal ti paai dunoli m-bɔri ni bɛ ŋme n-kab’ li.

¹⁰Amaa ka niriba maa daa teei bɛ nuhi tirina n-vooi Lɔt kpɛhi duu bɛ sani, ka yo dunoli.

¹¹ Di saha ka bɛ daa chɛ ka niriba bɛn ʒe dunol’ ni n-nyɛ ninkura mini bipola maa zaa zom, ka chani bɔbindi bɔri dunoli shee.

¹²Ka niriba maa daa bɔhi Lɔt, “A mali ninvuɣ’ shɛb’ yaŋɔ pahi? A bidibisi min’ a bipuɣinsi ni a deennim’ bee a dɔɣiriba shɛb’ yi be yaŋɔ, nyin’ cham’ ti zaŋ ba yi yaŋɔ,

¹³dama ti yɛn saɣimla yaŋɔ. Bɛ ni yɛri di niriba tuumbiɛri yɛla shɛm galisiya pam Yawɛ sani; dinzuɣu ka o tim ti na ni ti ti saɣim li.”

¹⁴Ka Lɔt daa yi n-chaŋ ti yɛl’ o deennim’ bɛn daa yɛn kpuɣ’ o bipuɣinsi la, “Yiɣisimiya n-zo n-yi yaŋɔ, dama Yawɛ yɛn saɣim li mi.” Amaa ka o deennim’ maa daa zaŋ o ni yɛli shɛm maa niŋ asahi.

¹⁵Ka biɛɣu daa ti neerina ka malaikanim’ maa kpam Lɔt jaande yɛra, “Yiɣisim’ zaŋ a paɣ’ min’ a bipuɣins’ ayi bɛn be a sani ŋɔ n-zo n-yi yaŋɔ, di yi pa lala, yaŋɔnim’ ni yɛn nya tibidarigibo shɛli maa ni tabili ya.”

¹⁶ Amaa ka Lɔt daa bi lɛbira, ka Yawɛ daa zo ba nambɔɣu n-chɛ ka malaikanim’ maa gbah’ o min’ o paɣ’ ni o bipuɣins’ ayi maa nuhi ni n-vo ba yihi tiŋ’ maa tariga ti zali.

¹⁷Bɛ ni daa zaŋ ba na ti zali maa nyaaŋa, ka bɛ daa yɛli ba, “Zomiya tiligi! Yi mi miriya ka yi ŋmaligi lihi yi nyaaŋa bee n-zani vinvamli ŋɔ ni luɣ’ shɛli. Kul zomiya ti du zoya ŋɔ ha, di yi pa lala, buɣim ni din ya.”

¹⁸Amaa ka Lɔt daa yɛli ba, “Aai, n duumanima, n suhiri ya,

¹⁹m mali zuɣusuŋ yi sani, ka yi niŋ ma nirilim pam tiligi n nyɛvili, amaa n ku tooi zo nti du zoya ŋɔ, dama di pa shɛli ka yɛlibiɛ’ shɛli ti paai ma nimaani ka n kpi.

²⁰Nyama, timbil’ din ʒiɛya ŋɔ nyɛla din mirina ka nir’ ni zo nti kpe di ni. Chɛliya ka n zo nti kpe di ni tiligi. Yi nya di ni nyɛ timbil’ shɛm, ka m mi ni tooi zo nti kpe di ni tiligi.”

²¹Ka bɛ yɛl’ o, “Ti ni niŋ a ni yɛli shɛm maa gba, ti ku saɣim tin’ shɛli a ni yɛri maa.

²²Niŋm’ yomyom zo nti kpe di ni, dama ka pa ni a paala nimaani, ti ku tooi niŋ shɛli.” Dinzuɣu ka bɛ daa boli tiŋ’ maa yuli Zɔa.[17]

²³Lɔt daa ti yɛn paai Zɔa, ka wuntaŋ’ pun puhimi.

²⁴Di saha ka Yawɛ daa chɛ ka chilibi buɣim yi o sani alizanda ni n-lu Sɔdom mini Gomɔra zuɣu na

²⁵ n-saɣim di tinsi maa mini di vinvamli zaa ni tinsi maa niriba zaa ni tiŋgban’ ni bimbilli kam zaa.

²⁶ Amaa ka Lɔt paɣ’ ŋun daa be o nyaaŋa daa ti ŋmaligi lih’ o nyaaŋa, ka leei yalim kuɣili.

²⁷Ka Ibrahimma daa ti daŋ yibu asiba n-chaŋ o ni daa ʒe Yawɛ tooni luɣ’ shɛl’ la

²⁸nti lihi Sɔdom mini Gomɔra ni vinvamli la zaa polo n-nya ka nyɔhi din ŋmani mɔɣu din galisi pam buɣim nyɔhi la kpuɣi du zuɣusaa.

²⁹Naawuni ni daa saɣindi vinvamli ni tinsi maa saha shɛli maa, ka o daa teei Ibrahimma yɛla, ka yihi Lɔt o ni daa saɣindi tin’ shɛŋa din nyɛ Lɔt ni daa ʒi luɣ’ shɛl’ la n-tilig’ o.

³⁰Ka Lɔt min’ o bipuɣins’ ayi la daa ti yiɣisi Zɔa n-chaŋ ti du zoya zuɣu n-kpe m-be vokabili ni, dama o daa zɔrila dabiɛm ni o be Zɔa.

³¹Ka bipuɣin’ kpɛm’ daa ti yɛli biasani, “Ti ba kurigiya, ka dɔbba mi ka tiŋgbɔŋ ŋɔ zaa ni n-ni kpuɣi ti kaman bɛ ni niŋdi shɛm dunia ŋɔ zaa ni la.

³²Chɛ ka ti niŋ wain n-ti ti ba maa ka o nyu, ka ti chɛ ka o zaŋ ti dɔni, ka di chɛ ka ti nam zuliya o sani zali.”

³³Ka bɛ daa shiri niŋ wain maa ti bɛ ba ka o nyu dindali maa yuŋ, ka bipuɣin’ kpɛm’ maa daa kpe ka o min’ o ba ti dɔni, ka o ba bi mi o ni dɔni o sani saha shɛli ni o ni yiɣisi saha shɛli.

³⁴Ka biɛɣu daa neei, ka bipuɣin’ kpɛm’ maa yɛli biasan’ la, “Nyama, Mam’ mini m ba sa dɔniya yuŋ la, dinzuɣu chɛ ka ti lan niŋ wain maa ti o yuŋ ŋɔ, ka a gba kpe o sani ka a min’ o ti dɔni, ka di chɛ ka ti nam zuliya o sani zali.”

³⁵Ka bɛ daa lan niŋ wain maa ti bɛ ba ka o nyu dindali maa yuŋ; ka biasani maa gba daa kpe ka o min’ o ba ti dɔni, ka o ba bi mi o ni dɔni o sani saha shɛli ni o ni yiɣisi saha shɛli.

³⁶Lala niŋbu ni ka Lɔt bipuɣins’ ayi maa zaa daa zaŋ puhi bɛ ba sani.

³⁷Ka bipuɣin’ kpɛm’ maa daa ti dɔɣi bidibiga m-bol’ o yuli Mɔab.[18] O yaansi n-nyɛ Mɔabnim’ bɛn na kul beni hal ni zuŋɔ dabisili ŋɔ.

³⁸Ka biasan’ la gba daa ti dɔɣi bidibiga m-bol’ o yuli Bɛnammi.[19] O yaansi n-nyɛ Ammɔnnim’ bɛn na kul beni hal ni zuŋɔ dabisili ŋɔ.