Read Dagbani Piligu 20 Bible Online

Piligu 20 - Dagbani bible

Piligu 20

¹Ka Ibrahimma daa ti yiɣisi nimaani n-zaŋ kpa Nɛgɛb tintariga polo nti ʒini Kadɛshi mini Shur sunsuuni; ka daa ti lan yiɣisi chaŋ ti be Gɛra.

² Ka Ibrahimma daa ti yɛli ni o paɣ’ Zara nyɛla o tizɔpaɣa. Ka Gɛra Naa Abimilɛk daa tim ti zaŋ Zara na.

³Amaa ka Naawuni daa ka Abimilɛk sanna zahindi puuni yuŋ ti yɛl’ o, “Nyama, a nyɛla kpima, a ni kpuɣi paɣ’ so la na zuɣu; dama o nyɛla do’ so paɣa.”

⁴Amaa Abimilɛk daa na bi zaŋ Zara dɔni, dinzuɣu ka o daa bɔhi, “N Duuma, a ni ku ninvuɣ’ shɛb’ bɛn ka taali?

⁵Pa omaŋmaŋa n-yɛli ma ni o nyɛla o tizɔpaɣa? Ka paɣ’ maa maŋmaŋ’ gba yɛli ma ni o nyɛla o tizɔdoo. M bi tum taali n tɛha ni, ka mi bi zaŋ n nuhi tum taal’ shɛli.”

⁶Ka Naawuni daa yɛl’ o zahindi maa ni, “Iin, m mi ni a bi tɛhi a suhu ni ni a tum taali, amaa mani n-chɛ ka a bi tum alahichi n sani maa; di zuɣu ka m bi chɛ ka a shih’ o maa.

⁷Dinzuɣu pumpɔŋɔ, labisim’ doo maa paɣa ti o; dama o nyɛla anabi, ka o suhi Naawuni ti a ka a be. Amaa a yi bi labis’ o ti o, nyin’ baŋmi ni biɛhiŋ kani a min’ a ni su ninvuɣ’ shɛb’ zaa ni kpi.”

⁸Ka Abimilɛk daa daŋ yibu asibaasi m-bol’ o kpambaliba na nti zaŋ yɛla maa zaa yɛli ba, ka dabiɛm daa gbaai ba pam.

⁹Di saha ka Abimilɛk daa boli Ibrahimma na nti bɔh’ o, “Bɔ n-niŋ ka a niŋ ti lala? Taal’ bɔ ka n lee tum’ a ka a ti chɛ ka m mini n nam ŋɔ tum alahichi titali ŋɔ? A niŋ ma di ni bi simdi ni nir’ niŋ o kpee shɛm.”

¹⁰Ka Abimilɛk daa lan bɔhi Ibrahimma, “Wula ka a daa lee tɛhi hal ti niŋ lala maa?”

¹¹Ka Ibrahimma garigi yɛli, “N daa tɛhimi ni so ka kpe n-zɔri Naawuni, ka tɛhi ni bɛ ni ku ma m paɣ’ maa zuɣu, dina n-chɛ ka n niŋ lala maa.

¹²Ka din pahi nyɛla, o shiri nyɛla n tizɔpaɣa. O nyɛla m ba bipuɣiŋga, amaa ka lee pa m ma puuni bia, ka n zaŋ o leei m paɣa.

¹³Ka Naawuni ni chɛ ka n yi m ba yiŋa n-chani gindi ŋɔ puuni, ka n yɛl’ o, ‘A ni yɛn niŋ ma nirilim shɛli m-bɔŋɔ: Ti yi ti paai luɣ’ shɛlikam, nyin’ yɛlimi ni n nyɛla a tizɔdoo.’ ”

¹⁴Di saha ka Abimilɛk daa zaŋ piɛri mini naɣilahi ni dabidɔbba ni paɣiba ti Ibrahimma, ka zaŋ o paɣ’ Zara gba labisi ti o.

¹⁵Ka Abimilɛk daa lan yɛl’ o, “N tiŋgbani n-kul do a tooni maa, ʒinimi a ni bɔri ni a ʒini di ni luɣ’ shɛlikam zaa.”

¹⁶Ka Abimilɛk daa yɛli Zara mi, “Nyama, n zaŋ anzinfa laɣibaligu tuhili ti a tizɔdoo maa ni di wuhi bɛnkam zaa be a sani mini sokam zaa ni a bi tum taali.”

¹⁷Ka Ibrahimma daa suhi Naawuni ka Naawuni tibi Abimilɛk min’ o paɣa ni o dabipaɣiba, ka di chɛ ka bɛ ni tooi dɔɣi bihi.

¹⁸Dama Ibrahimma paɣ’ Zara zuɣu, Yawɛ daa ŋarila Abimilɛk yiŋ’ paɣiba maa bidɔɣibo soya.