Read Dagbani Piligu 23 Bible Online

Piligu 23 - Dagbani bible

Piligu 23

¹Zara daa niŋla yuun’ kɔbiga ni pisinaayopɔin. Zara yuma ni daa nyɛ shɛm m-bala.

²Ka Zara daa ti kpi Kiriatariba (Hiburɔn m-bala) Keenan tiŋgbɔŋ ni; ka Ibrahimma daa kpe nti kum o kuli.

³Ka Ibrahimma daa ti yiɣis’ o kpim’ maa sani n-chaŋ ti yɛli Hitinima,

⁴ “N nyɛla sana m-be yi sani, timiya ma luɣ’ shɛli ka n zaŋ li leei n kpiimba sɔɣibu shee n-zaŋ n kpim’ ŋɔ ti sɔɣi nimaani.”

⁵Ka Hitinim’ maa yɛl’ o,

⁶“Ti dana, wummi ti ni yɛn yɛl’ a shɛm ŋɔ, A nyɛla zuɣulaan’ titali ti sani. Ti ni so ku mɔŋ’ a o siliga bee n-yɛl’ a ni a di sɔɣ’ a kpima. Dinzuɣu piim’ a ni bɔri ti silisi ŋɔ ni shɛli n-zaŋ a kpim’ maa sɔɣi di ni.”

⁷Ka Ibrahimma daa yiɣisi n-damdi Hitinim’ bɛn daa su tiŋgbɔŋ maa tiŋa

⁸ka yɛli ba, “Yi yi ni saɣi ka n sɔɣi n kpim’ maa kpe, yin’ wummiya n ni yɛn yɛli ya shɛm ŋɔ. Balimmiya Zɔhar bia Ɛfurɔn,

⁹ka o zaŋ Makipɛla siliga din be o palo la tariga la ti ma yi ninni; ka n yo o di liɣiri ka di leegi n dini, ka m mali n kpiimba sɔɣiri nimaani.”

¹⁰Ɛfurɔn maŋmaŋ’ daa ʒila o tab’ Hitinim’ maa sani; ka ŋun’ Ɛfurɔn daa yɛli Ibrahimma o tab’ Hitinim’ bɛn zaa daa ʒi tiŋ’ maa dunoli shee maa sani,

¹¹“N dana, wummi n ni yɛn yɛl’ a shɛm ŋɔ, n zaŋ palo maa mini siliga din be di ni maa zaa ti a n niriba ŋɔ ninni ni a sɔɣ’ a kpim’ maa nimaani.”

¹²Ka Ibrahimma daa lan damdi tiŋgbɔŋ maa nim’ tiŋa,

¹³ka yɛli Ɛfurɔn niriba maa zaa ninni, “Amaa a yi di saɣi n naan yo a palo maa liɣiri. Saɣimi dee’ li, ka n zaŋ n kpim’ maa ti sɔɣi nimaani.”

¹⁴Ka Ɛfurɔn daa yɛli Ibrahimma,

¹⁵“N dana, palo maa liɣiri kul nyɛla anzinfa laɣibaligu kɔbisinahi kɔŋko, ka dimbɔŋɔ lee nyɛ bɔ m min’ a sunsuuni? Zaŋm’ a kpim’ maa ti sɔɣi nimaani.”

¹⁶Ka Ibrahimma daa saɣi, ka zahim Ɛfurɔn ni daa yɛli anzinfa laɣibaligu kɔbisinahi shɛli Hitinim’ maa ninni maa ti Ɛfurɔn; ka di nyɛ kaman kɔhigɔriba ni daa zahindi li shɛm.

¹⁷Di ni daa niŋ shɛm ka Ɛfurɔn ti zaŋ o tiŋgbani din daa be Makipɛla din be Mamri wulimpuhili polo la ti Ibrahimma m-bala. O daa zaŋ siliga mini tihi din zaa daa be tiŋgbani maa ni ti

¹⁸Ibrahimma ka di leei Ibrahimma dini Hitinim’ bɛn daa ʒi tiŋ’ maa dunoli shee maa zaa ninni.

¹⁹Dimbɔŋɔ nyaaŋa ka Ibrahimma daa zaŋ o paɣ’ Zara nti sɔɣi sil’ shɛli din daa be Makipɛla palo din be Mamri (Hiburɔn m-bala) wulimpuhili polo la ni Keenan tiŋgbɔŋ ni.

²⁰Ka Hitinim’ maa daa zaŋ palo maa mini siliga din daa be di ni maa ti Ibrahimma, ka di leeg’ o dini, ka o zaŋ li leeg’ o kpiimba sɔɣibu shee.