Read Dagbani Piligu 27 Bible Online

Piligu 27 - Dagbani bible

Piligu 27

¹Yisahaku ni daa ti kurigi ka o nina niŋ liti, ka o bi lan tooi nyari viɛnyɛliŋga saha shɛli, ka o daa bol’ o bituuli Iso na ti yɛl’ o, “M bia.” Ka o saɣi yɛli, “N nyɛ ma.”

²Ka Yisahaku yɛl’ o, “Nyama, n kurigiya, m mi ku tooi baŋ n kum dali.

³Dinzuɣu pumpɔŋɔ zaŋm’ a mɔgɔr’ nɛma min’ a tɔbu ni a lɔɣu chaŋ mɔɣu ni ti ku mɔɣu ni valiga na

⁴nti duɣi n ni yuri bindir’ nyaɣisili shɛli n-zaŋ na ti ti ma ka n di, ka niŋ alibarika niŋ a ni pɔi ka naanyi kpi.”

⁵Yisahaku ni daa yɛr’ o bia Iso maa, ka Ribɛka beni wumda. Dinzuɣu saha shɛli Iso ni daa yi n-chaŋ mɔɣu ni ni o ti ku nimdi maa na, ka Ribɛka daa yɛl’ o bia Yaakubu,

⁶“N wum ka a ba yɛr’ a biɛli Iso,

⁷‘Bom’ mɔɣu ni nimdi na ti duɣi n ni yuri bindir’ shɛli, ka n di ka niŋ alibarika niŋ a ni Yawɛ tooni pɔi ka naanyi kpi.’

⁸Dinzuɣu pumpɔŋɔ m bia, wummi n noli n ni yɛn wuh’ a shɛm ŋɔ ni.

⁹Cham’ biŋkɔbiri la sani ti gbahi bubihi pol’ ayi ti ma na ka n zaŋ ba duɣi bindir’ nyaɣisili shɛli a ba ni yuri pam;

¹⁰ka a zaŋ li ti ti a ba ka o di, ka niŋ alibarika niŋ a ni pɔi ka naanyi kpi.”

¹¹Amaa ka Yaakubu yɛl’ o ma Ribɛka, “Nyama, m biɛli Iso niŋgbuna mali kɔbiri pam, ka m mi niŋgbuna be polipoli.

¹²Di pa shɛli ka m ba ti shihi ma, ka di yi niŋ lala, di ni wuhi ni n mal’ o la ansarisi maa; ka di ni chɛ ka o yɛli noli ti ma ka pa ni o niŋ alibarika niŋ n ni.”

¹³Ka o ma yɛl’ o, “M bia, chɛ ka bɛ ni yɛn yɛl’ a no’ shɛli maa doli ma, nyin’ dee doli n ni wuh’ a shɛm maa, ka chaŋ ti gbahi bubihi pola maa ti ma na.”

¹⁴Ka o daa chaŋ ti gbahi ba na ti ti o ma; ka o ma daa zaŋ ba duɣi bindir’ nyaɣisili shɛli o ba ni yuri pam.

¹⁵Di saha ka Ribɛka daa zaŋ o bituuli Iso binyɛr’ suma din be o sani yiŋa n-yɛl’ o bia Yaakubu ŋun nyɛ biasani maa;

¹⁶ka zaŋ bubihi pola maa gbandi pɔb’ o nuchɛhi min’ o nyiŋgoli;

¹⁷ka daa zaŋ bindir’ nyaɣisili maa min’ o ni mali bɔrɔbɔro shɛli ti o bia Yaakubu.

¹⁸Di saha ka Yaakubu daa chaŋ o ba sani ti bol’ o, “M ba!” Ka o saɣi ka bɔh’ o, “Ka m bi’ ŋuni n-lee bala?”

¹⁹Ka Yaakubu daa yɛl’ o ba, “Mani a bituuli Iso. M pun niŋ a ni yɛli ma shɛm maa. Yiɣisim’ ʒini di m mɔɣu ni nimdi maa, ka niŋ alibarika niŋ n ni.”

²⁰Amaa ka Yisahaku bɔh’ o bia maa, “M bia, ka wula ka a lee niŋ nya li yomyom lala?” Ka o garigi yɛl’ o, “Yawɛ ŋun nyɛ a Naawuni ŋɔ n-ti ma di nasara maa.”

²¹Ka Yisahaku yɛli Yaakubu, “M bia, saɣisim’ mirina ka n shih’ a nya a shiri nyɛla m bia Iso bee a pa o.”

²²Ka Yaakubu daa saɣisi mir’ o ba Yisahaku, ka o shih’ o ka yɛli, Kukoli ŋɔ nyɛla Yaakubu kukoli, amaa nuhi ŋɔ nyɛla Iso nuhi.

²³Ka o daa bi tooi baŋ o, dama o nuhi daa malila kɔbiri ŋ-ŋman’ o biɛli Iso nuhi. Ka o daa yɛn niŋ alibarika niŋ o ni

²⁴ka lan bɔh’ o, “A shiri nyɛla m bia Iso?” Ka o garigi yɛli, “Mani m-bala.”

²⁵Di saha ka o daa yɛl’ o, “Zaŋm’ li ti ma na, ka n ŋubi m bia mɔɣu ni nimdi, ka niŋ alibarika niŋ a ni.” Ka Yaakubu daa zaŋ li ti o ka o di, ka o zaŋ wain pah’ o ka o nyu.

²⁶Di saha ka o ba Yisahaku daa yɛl’ o, “M bia, mirim’ na ti mɔɣisi n kpariŋ.”

²⁷Ka o daa mir’ o ti mɔɣis’ o kpariŋ; ka Yisahaku wum o binyɛra ʒiɛɣu ka niŋ alibarika niŋ o ni ka yɛli, “Wummi m bia ʒiɛɣu, di ŋmanila Yawɛ ni niŋ alibarika niŋ mɔ’ shɛl’ ni ʒiɛɣu.

²⁸Naawuni tim’ a sakom din mal’ alibarika, ka chɛ ka a tiŋgbani vuhira. Naawuni tim’ a kawana mini wain pam.

²⁹ Naawuni chɛ ka niriba balibu kam jɛm a, ka chɛ ka zuliya kam damd’ a tiŋa. Naawuni chɛ ka a su a dɔɣiriba, ka chɛ ka a mabihi damd’ a tiŋa. Ninvuɣ’ shɛb’ bɛn tu a, Naawuni ŋun’ tum’ ba, ka ninvuɣ’ shɛb’ bɛn niŋ alibarika niŋ a ni, Naawuni ŋun’ niŋm’ alibarika niŋ bɛ ni.”

³⁰Yisahaku ni daa niŋ alibarika niŋ Yaakubu ni naai, ka Yaakubu ŋmalig’ o ba Yisahaku sani yi, di daa bi yuui ka o biɛli Iso yi o mɔɣu gɔbu maa paa’ na.

³¹Ka o gba daa duɣi o ni yuri bindir’ nyaɣisili shɛli n-zaŋ na ti ti o ba. O daa yɛlila o ba, “M ba, yiɣisim’ ŋub’ a bia mɔɣu ni nimdi ka niŋ alibarika niŋ n ni.”

³²Ka o ba Yisahaku bɔh’ o, “Ŋuni n-lee bala?” Ka o yɛl’ o, “Mani a bituuli Iso.”

³³Di saha ka Yisahaku ni daa dii sɔhiri ka o bɔhi, “Ka ŋuni n-lee pun go mɔɣu ku nimdi n-zaŋ na ti ti ma ka n ŋub’ di zaa, ka pun niŋ alibarika niŋ o ni pɔi ka a naanyi kana ŋɔ? O mi shiri nya alibarika.”

³⁴Iso ni daa wum o ba ni yɛl’ o shɛm maa, ka o kum suhusaɣiŋgu kumsi pam ka yɛl’ o ba, “M ba, niŋm’ alibarika niŋ n gba ni.”

³⁵Amaa ka o yɛl’ o, “A tizo pun kana ti yɔhim ma deeg’ a daalibarika.”

³⁶ Ka Iso yɛli, “Buyi ka o ŋari ma maa. O yuli Yaakubu maa shiri ŋman’ o. O daa fa n kpamdi, ka lan fa n daalibarika.” Di saha ka o daa bɔh’ o ba, “Ka daɣila a bi chɛ alibarika shɛli zali ma?”

³⁷Ka Yisahaku daa garigi yɛli Iso, “M pun zaŋ o leeg’ a dana, ka zaŋ o mabihi zaa leeg’ o daba; ka zaŋ kawana mini wain ti o. M bia, ka bɔ ka n ni tooi lan niŋ ti a mi?”

³⁸ Ka Iso bɔh’ o ba, “M ba, ka daɣila alibarika zaɣ’ yini kɔŋko ka a kul mali? M ba, niŋm’ alibarika niŋ n gba ni.” Ka Iso daa duh’ o yee kum pam.

³⁹Di saha ka o ba Yisahaku daa yɛl’ o, “A tiŋgbani ku vuhira, ka maligim mi ku lur’ a tiŋgban’ ni.

⁴⁰ A takɔb’ zuɣu ka a yɛn dira, ka jɛmd’ a tizo maa. Amaa a yi zaɣis’ amaŋ’ zuɣu, a ni yi o sulinsi ni.”

⁴¹Ka Iso daa je Yaakubu yɛlli, o ba ni daa niŋ alibarika shɛli niŋ o ni la zuɣu. Ka Iso daa yɛli, “Di ku lan yuui ka ti ba kpi, di saha n ni ku n tizo Yaakubu.”

⁴²Amaa ka so daa zaŋ Ribɛka bituuli Iso ni yɛli shɛm maa ti yɛli Ribɛka, ka o daa tim ti bol’ o bia Yaakubu ŋun nyɛ biasani maa na ti yɛl’ o, “A biɛli Iso ni zaŋ shɛli maag’ omaŋ’ suhu nyɛla, o lɔrila nia ni o ku a.

⁴³Dinzuɣu, m bia, wummi n ni yɛn wuh’ a shɛm ŋɔ, yiɣisim’ zo n-kuli n tizɔdoo Leeban sani Haran

⁴⁴nti be nimaani hal ka a biɛli suhuyiɣisili maa ti chɛ,

⁴⁵ka o suhu ti maai ka o tam a ni niŋ o shɛm maa yɛla. Di nyaaŋa ka n naan yi tim na ka bɛ ti zaŋ a na. Bɔzuɣu ka n yɛn kɔŋ m bidibis’ ayi zaa dahin yini?”

⁴⁶Di saha ka Ribɛka daa yɛli Yisahaku, “Hiti paɣiba ŋɔ zuɣu chɛ ka n suhu bi doya. Yaakubu yi kpuɣi Hiti paɣa ka o be kaman bɛmbɔŋɔ, bebu bukaata lan yɛn nyɛ bɔ n sani?”