Read Dagbani Piligu 30 Bible Online

Piligu 30 - Dagbani bible

Piligu 30

¹Reechɛl ni daa nya ka o bi dɔɣi bihi ti Yaakubu maa zuɣu ka o daa zabir’ o biɛli nyuli, ka yɛli Yaakubu, “Tim’ ma bihi, di yi pa lala, n ni kpi.”

²Ka Yaakubu daa yiɣis’ o suhu bahi Reechɛl zuɣu pam, ka bɔh’ o, “Mani n-nyɛ Naawuni ŋun ŋar’ a dɔɣim soli?”

³Di saha ka Reechɛl daa yɛli Yaakubu, “N dab’ bipuɣiŋga Biliha m-bɔŋɔ; zaŋm’ o dɔni ka o dɔɣi bihi ti ma, ka n zaŋ ba ʒili n naba zuɣu.”

⁴Ka o daa shiri zaŋ o dab’ bipuɣiŋga Biliha maa ti Yaakubu ni o zaŋ o leeg’ o paɣa, ka Yaakubu daa zaŋ o niŋ o paɣa.

⁵Ka Biliha daa niŋ pua n-dɔɣi bidibiga ti Yaakubu.

⁶Di saha ka Reechɛl daa yɛli, “Naawuni zahimmi n yɛla nya, ka deei n suhigu ka ti ma bidibiga”; dinzuɣu ka o daa bol’ o yuli Dan.[32]

⁷Ka Reechɛl dab’ bipuɣiŋga Biliha daa ti lan niŋ pua n-dɔɣi bidibiga ŋun pah’ ayi ti Yaakubu.

⁸Di saha ka Reechɛl daa yɛli, “N ni va m biɛli val’ shɛli din kpɛm’ pam la zuɣu ka n di nasara ŋɔ”; ka daa boli bia maa yuli Naftali.[33]

⁹Liya ni daa nya ka o bi lan dɔɣiri maa, ka o daa zaŋ o dab’ bipuɣiŋga Zilipa ti Yaakubu ka o niŋ o paɣa.

¹⁰Ka Liya dab’ bipuɣiŋga Zilipa maa daa dɔɣi bidibiga ti Yaakubu.

¹¹Ka Liya daa yɛli, “Zuɣusuŋ”; ka daa boli bia maa yuli Gaad.[34]

¹²Ka Zilipa daa lan dɔɣi bidibiga ti Yaakubu pahi.

¹³Ka Liya daa yɛli, “N suhu paligiya! Dama paɣiba ni boli ma suhupiɛlli”; ka daa boli bia maa yuli Asha.[35]

¹⁴Ka Rubin daa ti chaŋ mɔɣu ni alikama chɛbu saha ti bo ŋmaankpihiga[36] na ti ti o ma Liya. Ka Reechɛl daa yɛli Liya, “N suhir’ a, niŋm’ a bia ŋmaankpihiga maa shɛli ti ma.”

¹⁵Ka Liya bɔh’ o, “A ni fa n yidan’ maa nyɛla yɛli bila? Ka a lan bɔri ni a fa n ŋmaankpihiga gba pahi?” Ka Reechɛl yɛl’ o, “Kpɛm’ o sani zuŋɔ yuŋ ŋɔ a bia ŋmaankpihiga maa zuɣu.”

¹⁶Ka Yaakubu daa ti yi mɔɣu ni na zaawuni, ka Liya yi nti tuh’ o soli yɛl’ o, “N yɛn kpɛla a sanna zuŋɔ, dama n zaŋla m bia ŋmaankpihiga yo a zuɣu.” Ka Yaakubu min’ o daa dɔni dindali maa yuŋ.

¹⁷Ka Naawuni daa deei Liya suhigu ka o niŋ pua n-dɔɣi bidibiga ŋun pah’ anu ti Yaakubu.

¹⁸Ka Liya daa yɛli, “N ni zaŋ n dab’ bipuɣiŋga ti n yidan’ la zuɣu, Naawuni deei n suhigu;” ka boli bia maa yuli Isaka.[37]

¹⁹Ka Liya daa ti lan niŋ pua n-dɔɣi bidibiga ŋun pah’ ayɔbu ti Yaakubu.

²⁰Di saha ka Liya daa yɛli, “Naawuni ti ma pin’ suŋ, pumpɔŋɔ n yidan’ ni ti ma jilima, dama n dɔɣi bidibis’ ayɔbu ti o”; ka daa boli bia maa yuli Zɛbulɔn.[38]

²¹Dimbɔŋɔ nyaaŋa ka o daa ti dɔɣi bipuɣiŋga m-bol’ o yuli Daina.

²²Di saha ka Naawuni daa teei Reechɛl yɛla n wum o fabila ka yoog’ o dɔɣim soli ti o.

²³Ka Reechɛl daa niŋ pua n-dɔɣi bidibiga ka yɛli, “Naawuni yihi ma vi ni;”

²⁴ka daa boli bia maa yuli Yisifu[39] ka yɛli, “Yawɛ tim ma bidib’ so pahi.”

²⁵Reechɛl ni daa dɔɣi Yisifu nyaaŋa ka Yaakubu daa yɛli Leeban, “Bahim’ ma ka n kuli n ya ni n yiŋa.

²⁶Zaŋmi m paɣiba mini m bi’ shɛb’ zuɣu n ni jɛm a ŋɔ ti ma ka n kuli, dama a mi n ni tum tuun’ shɛli ti a.”

²⁷Amaa ka Leeban yɛl’ o, “Chɛ ka n yɛl’ a, n vihiya nya ka di nyɛla a zuɣu ka Yawɛ niŋ alibarika niŋ n ni;

²⁸wuhim’ ma a samli ka n yo a.”

²⁹Ka Yaakubu yɛl’ o, “Amaŋmaŋ’ mi n ni tum shɛm ti a, ka lan mi n zuɣu ni chɛ ka a niɣi yɛligi shɛm.

³⁰N ni daa kana saha shɛl’ la, bɛ daa nyɛla biɛla; ka pumpɔŋɔ bɛ yipa nabimi pam, ka n yi kul ŋmaligi kpa luɣ’ shɛlikam polo, Yawɛ niŋdila alibarika niŋ a ni. Amaa ka pumpɔŋɔ, bɔ saha ka man’ lee yɛn zaŋ wolim gbaai ti n yiŋnim’ gba?”

³¹Ka o bɔh’ o, “Ka ala ka n lee yɛn yo a?” Ka Yaakubu yɛl’ o, “A yi ni niŋ n ni yɛn yɛli shɛm ŋɔ, di bi kpa talahi ni a yo ma shɛli. N na kul ni gul’ a biŋkɔbiri maa.

³²Chɛ ka n kpe a biŋkɔbiri maa ni zuŋɔ ti gahim piɛ’ shɛb’ bɛn liɣisiliɣisi mini bɛn mali sabilimsabilim ni piɛbihi sabila ni bu’ shɛb’ bɛn mali sabilimsabilim mini bɛn liɣisiliɣisi ni bubihi sabila; ka bɛ leei n yɔri.

³³Ka m biɛrimaŋtali tuma ni ti yi palo a yi ti kana ni a ti nya n yɔri maa dahin’ shɛli. Ka bu’ shɛb’ mini piɛbihi shɛb’ bɛn bi liɣisiliɣisi ka mali sabilimsabilim ni bɛn nyɛ zaɣ’ sabila yi ti be m biŋkɔbiri ni, di wuhiya ni n zu ba mi maa.”

³⁴Ka Leeban daa yɛli, “Lala viɛla. Ti ni niŋ a ni yɛli shɛm maa.”

³⁵Amaa ka Leeban daa gahim bula’ shɛb’ bɛn mali bomaboma ni sabilimsabilim mini bunyama bɛn zaa liɣisiliɣisi ni bɛn mali sabilimsabilim ni bɛn zaa mali piɛlimpiɛlim ni piɛbihi shɛb’ bɛn zaa nyɛ zaɣ’ sabila n-zaŋ ba ti o bihi ni bɛ guli ba,

³⁶ka daa chaŋ luɣ’ shɛli katiŋa din nyɛ daba ata soli chandi ka chɛ Yaakubu, ka Yaakubu daa gbib’ ŋun’ Leeban biŋkɔb’ shɛb’ bɛn kpalim la.

³⁷Di saha ka Yaakubu daa chaŋ ti ŋmahi tihi balibu diba ata wula n-kɔrisikɔrisi di paɣiri ka chɛ ka di mali piɛlimpiɛlim, ka chɛ ka di piɛlimpiɛlim maa be palo ni ka di piɛlipiɛla.

³⁸Ka o daa zaŋ o ni kɔrisikɔrisi da’ shɛŋa maa sɔŋ biŋkɔbiri maa tooni kɔnyuri bɔɣili gbini luɣ’ shɛli biŋkɔbiri maa ni kanna ti nyuri kom. Ka biŋkɔbiri maa daa yi ti kana ni bɛ ti nyu kom ka duri taba,

³⁹bɛ kul durila tab’ dari maa gbini, ka biŋkɔbiri maa daa ti dɔɣi bi’ shɛb’ bɛn mali bomaboma mini bɛn liɣisiliɣisi ni bɛn mali sabilimsabilim.

⁴⁰Ka Yaakubu daa woligi piɛbihi bɛ ko, ka ŋmaligi biŋkɔbiri maa nina kpa Leeban biŋkɔbiri bɛn mali bomaboma mini zaɣ’ sabila zaa la polo; ka wolig’ o biŋkɔbiri zali bɛ kɔŋko ka bi chɛ ka bɛ laɣim Leeban biŋkɔbiri maa ni.

⁴¹Ka biŋkɔb’ shɛb’ bɛn mali yaa daa yi ti duri taba, Yaakubu zaŋdila dari maa sɔŋ bɛ tooni kɔbɔɣili maa gbini ni bɛ be dari maa gbini duri taba.

⁴²Amaa o daa bi zaŋdi dari maa sɔŋdi biŋkɔb’ shɛb’ bɛn ka yaa la bɛn’ sani, ka di zuɣu daa chɛ ka Leeban biŋkɔbiri nyɛ zaɣ’ gbarima, ka Yaakubu dina nyɛ bɛn mali yaa,

⁴³Ka lala zuɣu daa chɛ ka Yaakubu leei bundana ka mali biŋkɔbiri pam, ka mali daba bɛn nyɛ dɔbba mini paɣiba ni laakumnim’ ni bunsi.