Read Dagbani Piligu 34 Bible Online

Piligu 34 - Dagbani bible

Piligu 34

¹Dahin shɛli ka Daina ŋun daa nyɛ Yaakubu mini Liya bipuɣiŋga la daa ti chaŋ ni o ti puhi tiŋ’ maa ni paɣiba;

²ka Hamɔr ŋun daa nyɛ Hivi nira, ka lan nyɛ tiŋ’ maa ni naa la bia Shɛkɛm daa nya o gbaag’ o ti zaŋ o saɣim dih’ o vi.

³Ka o suhu daa gbaai Daina Yaakubu bipuɣiŋga maa pam, ka o daa tɔɣis’ o yurilim mini suhumahili yɛtɔɣa.

⁴Ka Shɛkɛm daa yɛl’ o ba Hamɔr, “Bom’ paɣisarili ŋɔ ti ma ka n niŋ m paɣa.”

⁵Ka Yaakubu daa wum ni Shɛkɛm saɣim’ o bipuɣiŋga Daina, amaa ka o daa di suɣilo shini hal ka o bidibisi bɛn daa mali niɣi be mɔɣu ni la ti kuna.

⁶Ka Shɛkɛm ba Hamɔr daa kana ni o ti tɔɣisi Yaakubu di yɛtɔɣa.

⁷Ka Yaakubu bidibisi maa daa yi mɔɣu ni na ti wum li ka bɛ suhu yiɣisi ka bɛ je suli; Shɛkɛm ni daa tum jɛrilim Izraɛl tiŋgbɔŋ ni n-zaŋ Yaakubu bipuɣiŋga saɣim maa zuɣu. Dama di daa bi simdi ni lala niŋ.

⁸Ka Hamɔr daa yɛl’ o, “M bia Shɛkɛm bɔr’ a bipuɣiŋga, n suhir’ a, zaŋm’ o ti o ka o niŋ o paɣa.

⁹Chɛ ka ti mini ya kpuɣiri tab’ bihi niŋdi ti paɣiba. Zaŋmiya yi bipuɣinsi tiri ti, ka kpuɣimi ti gba bipuɣinsi niŋdi yi paɣiba.

¹⁰Kpalimmiya be ti sani. Yi ni tooi be yi suhuri ni bɔri ni yi be luɣ’ shɛlikam tiŋgbani ŋɔ ni, ka gɔri kɔhigu yi yubu, ka su tiŋgbani maa luɣ’ shɛŋa polo.”

¹¹Di saha ka Shɛkɛm gba daa yɛli Daina ba min’ o tizɔdɔbba maa, “Yi yi saɣi ti ma, n ni tin ya yi ni kul yɛli ni yi bɔri shɛlikam.

¹²Wuhimiya ma yi paɣ’ bɔbo puhigu liɣiri ni nyɛ shɛm, ka yi yi ni saɣi ka n kpuɣ’ o, n ni tin ya yi ni kul yɛli ni n tin ya shɛm zaa.”

¹³Shɛkɛm ni daa dihi Yaakubu bidibisi maa tizɔpaɣ’ Daina vi maa zuɣu, ka bɛ daa garigi Shɛkɛm min’ o ba Hamɔr yɔhiŋgu garigibu.

¹⁴Bɛ daa yɛli ba mi, “Ti ku tooi zaŋ ti tizɔpaɣ’ ti ninvuɣ’ so ŋun bi guni, dama lala nyɛla vi ti sani.

¹⁵Amaa yɛl’ yini n naɣ’ beni ka ti ni bɔri ni yi niŋ li pɔi ka ti naanyi saɣi, dina n-nyɛ: yi chɛ ka yi dɔbba zaa guni m-be kaman tinima.

¹⁶Di nyaaŋa ka ti ni saɣi zaŋdi ti bipuɣinsi tiri ya, ka ti gba kpuɣiri yi bipuɣinsi, ka kpalim be yi tiŋgbani ŋɔ ni ka ti mini ya leei ninvuɣ’ yinsi.

¹⁷Amaa yi yi ku saɣi guni kaman ti ni yɛli shɛm maa, dindina ti ni zaŋ ti bipuɣiŋga maa yiɣisi chaŋ.”

¹⁸Ka bɛ ni daa yɛli shɛm maa daa niŋ Hamɔr min’ o bia Shɛkɛm nyaɣisim pam.

¹⁹Ka nachimbil’ maa daa guni yomyom, dama o suhu daa yu’ Yaakubu bipuɣiŋga maa hal ti yaɣi. O daa nyɛla yulilana o daŋ ni.

²⁰Di saha ka Hamɔr min’ o bia Shɛkɛm daa chaŋ tiŋ’ maa dunol’ ni nti yɛli tiŋ’ maa ni dɔbba,

²¹“Niriba ŋɔ nyaŋ ninvuɣ’ maŋa pam, chɛliya ka ti chɛ ba ka bɛ be tiŋgbani ŋɔ ni n-gɔri kɔhigu bɛ yubu, dama tiŋgbani ŋɔ galisiya pam; ka chɛ ka ti kpuɣiri bɛ bipuɣinsi; ka ti gba zaŋdi ti bipuɣinsi tiri ba.

²²Amaa ti yi bɔri ni bɛ be ti sani ka ti mini ba nyɛ ninvuɣ’ yinsi, faashee ka ti dɔbba zaa guni m-be kaman bɛ ni be shɛm.

²³Ti yi saɣi ka bɛ be ti sani, bɛ niɣi mini bɛ binshɛɣukam ni bɛ biŋkɔbiri zaa ku leei ti dini?”

²⁴Ka bɛnkam zaa daa yi n-chaŋ tiŋ’ maa dunol’ ni maa daa saɣi Hamɔr min’ o bia Shɛkɛm ni yɛli shɛm maa; ka dɔbba bɛn zaa daa yi n-chaŋ bɛ tiŋ’ maa dunol’ ni maa daa guni.

²⁵Di daba ata dali, niriba maa gunibu maa yuma ni daa na biɛri saha shɛli maa, ka Yaakubu bidibis’ ayi, Simiɔn mini Lɛvi bɛn daa nyɛ Daina tizɔdɔbba la daa zaŋ takɔbiri chaŋ ti liri tiŋ’ maa nima n-libigi ba ku bɛ dɔbba zaa.

²⁶Bɛ daa ku Hamɔr min’ o bia Shɛkɛm gba, ka zaŋ Daina Shɛkɛm yiŋa n-chaŋ bɛ chandi.

²⁷Ka Yaakubu bidib’ shɛb’ bɛn kpalim daa chaŋ ti kpe tiŋ’ maa puuni n-di nɛma bɛ tizɔpaɣ’ maa zuɣu.

²⁸Bɛ daa gbahi bɛ biŋkɔbbaligu mini niɣi ni bunsi, ka zaŋ binshɛlikam zaa din be tiŋ’ maa puuni mini din be mɔɣu ni

²⁹ni bɛ daazichi zaa ni bɛ paɣiba mini bɛ bihi ni binshɛɣukam din daa be bɛ yinsi zaa chaŋ.

³⁰Di saha ka Yaakubu daa yɛli Simiɔn mini Lɛvi, “Yi bo yɛla ti ma, di ni chɛ ka jɛlinsi kpe m mini tiŋgbɔŋ ŋɔ ni nim’ bɛn nyɛ Keenannim’ mini Pɛrizinim’ ŋɔ sunsuuni, ka m mi niriba bi zooi. Bɛ yi laɣim kana ti liri ma, bɛ ni ku m mini n nyaaŋa zaa.”

³¹Amaa ka bɛ yɛl’ o, “Bɔzuɣu ka bɛ niŋ ti tizɔpaɣ’ maa kaman pagɔrili n-nyɛ o maa?”