Read Dagbani Piligu 36 Bible Online

Piligu 36 - Dagbani bible

Piligu 36

¹Iso ŋun nyɛ bɛ ni daa lan booni so Ɛdom la zuliya ni nyɛ shɛm m-bɔŋɔ:

² Iso daa kpuɣila Keenan paɣiba. Bɛ yuya n-nyɛ: Ada ŋun daa nyɛ Ɛlɔn ŋun nyɛ Hiti nir’ bipuɣiŋga la mini Oholibama ŋun daa nyɛ Zibiɔn ŋun nyɛ Hivi nir’ bia Ana bipuɣiŋga la

³ ni Basɛmat ŋun daa nyɛ Ishimail bipuɣiŋga ka nyɛ Nɛbaiɔt tizɔpaɣ’ la.

⁴Ka Ada daa dɔɣi Ɛlifaz ti Iso; ka Basɛmat dɔɣi Riuɛl ti o;

⁵ka Oholibama mi dɔɣi Jɛushi mini Jalam ni Kɔra. Iso ni daa dɔɣi bidib’ shɛb’ Keenan tiŋgbɔŋ ni m-bala.

⁶Di saha ka Iso daa zaŋ o paɣiba min’ o bidibisi ni o bipuɣinsi ni o yiŋ’ niriba zaa ni o niɣi min’ o biŋkɔb’ shɛb’ bɛn pahi zaa ni o ni daa bo n-nya binshɛɣukam zaa Keenan tiŋgbɔŋ maa ni n-yiɣisi chaŋ ti ʒini tiŋgban’ shɛl’ ni ha ka chɛ o tizo Yaakubu.

⁷Dama bɛ ni daa mali binshɛŋa daa galisiya pam, ka di zuɣu chɛ ka bɛ ku tooi laɣim be luɣ’ yini. Bɛ niɣi zuɣu n-daa chɛ ka bɛ ni be luɣ’ shɛli maa bi saɣi ba.

⁸Dinzuɣu ka Iso daa chaŋ ti ʒini Ɛdom[53] zoya tiŋ’ ni. Iso ka bɛ lan booni Ɛdom la.

⁹Iso ŋun daa nyɛ Ɛdomnim’ bɛn daa be Siɛr zoya tiŋ’ maa ni yab’ la zuliya ni daa nyɛ shɛm m-bɔŋɔ.

¹⁰Iso bidibisi yuya m-bɔŋɔ: Ɛlifaz ŋun daa nyɛ Iso paɣ’ Ada bidibiga la mini Riuɛl ŋun daa nyɛ Iso paɣ’ Basɛmat bidibiga la.

¹¹Ɛlifaz bidibisi n-daa nyɛ: Tɛman mini Omari ni Zɛfo ni Gatam ni Kɛnaz.

¹²Timna daa nyɛla Iso bia Ɛlifaz mam. Ŋuna n-daa dɔɣi Ɛlifaz bia Amalɛk. Iso paɣ’ Ada bihi n-daa bala.

¹³Riuɛl bidibisi n-daa nyɛ: Nahat mini Zɛra ni Shamma ni Miza. Iso paɣ’ Basɛmat bihi n-daa bala.

¹⁴Iso paɣ’ Oholibama ŋun daa nyɛ Zibiɔn bia Ana bipuɣiŋga la bidibisi n-daa nyɛ: Jɛushi mini Jalam ni Kɔra.

¹⁵Iso zuliya bɛn daa nyɛ nanima m-bɔŋɔ. Bɛ daa nyɛla Iso bituuli Ɛlifaz bidibisi. Bɛn daa nyɛ nanim’ maa n-nyɛ: Tɛman mini Omari ni Zɛfo ni Kɛnaz

¹⁶ni Kɔra ni Gatam ni Amalɛk. Bɛna n-daa nyɛ Ɛlifaz bidibisi bɛn nyɛ nanima Ɛdom tiŋgbɔŋ ni. Bɛ daa nyɛla Ada yaansi.

¹⁷Iso bia Riuɛl bidibisi bɛn daa nyɛ nanima n-daa nyɛ: Nahat mini Zɛra ni Shamma ni Miza. Bɛna n-daa nyɛ Riuɛl bidibisi bɛn nyɛ nanima Ɛdom tiŋgbɔŋ ni. Bɛ daa nyɛla Iso paɣ’ Basɛmat yaansi.

¹⁸Iso paɣ’ Oholibama bidibisi bɛn daa nyɛ nanima n-daa nyɛ: Jɛushi mini Jalam ni Kɔra. Iso paɣ’ Oholibama Ana bipuɣiŋga la ni daa dɔɣi na’ shɛba m-bala.

¹⁹Bɛmbɔŋɔ daa nyɛla Iso bidibisi (Ɛdomnim’ m-bala), bɛna n-daa nyɛ bɛ nanima.

²⁰Siɛr ŋun daa nyɛ Hɔri nir’ la bidibisi bɛn daa nyɛ tiŋgbɔŋ maa tiŋbihi la n-daa nyɛ: Lɔtan mini Shɔbal ni Zibiɔn

²¹ni Ana ni Dishɔn ni Ɛzɛr ni Dishan. Bɛna n-daa nyɛ Hɔri nanima, ka nyɛ Siɛr bidibisi Ɛdom tiŋgbɔŋ ni.

²²Lɔtan bidibisi n-daa nyɛ: Hɔri mini Hɛman. Lɔtan tizɔpaɣa n-daa nyɛ Timna.

²³Shɔbal bidibisi n-daa nyɛ: Alivan mini Manahat ni Ɛbal ni Shɛfo ni Onam.

²⁴Zibiɔn bidibisi n-daa nyɛ: Aiya mini Ana ŋun daa gul’ o ba Zibiɔn bunsi ka ti nya kɔbilisirim mɔɣu ni la.

²⁵Ana bihi n-daa nyɛ: Dishɔn mini Oholibama ŋun daa nyɛ Ana maa bipuɣiŋga la.

²⁶Dishɔn bidibisi n-daa nyɛ: Hɛmdan mini Ishiban ni Itiran ni Kɛran.

²⁷Ɛzɛr bidibisi n-daa nyɛ: Bilihan mini Zaavan ni Akan.

²⁸Dishan bidibisi n-daa nyɛ: Uzi mini Aran.

²⁹Hɔrinim’ nanima n-daa nyɛ: Lɔtan mini Shɔbal ni Zibiɔn ni Ana

³⁰ni Dishɔn ni Ɛzɛr ni Dishan. Bɛmbɔŋɔ n-daa nyɛ Hɔrinim’ nanima kaman bɛ daŋ ni daa nyɛ shɛm Ɛdom tiŋgbɔŋ ni.

³¹Bɛmbɔŋɔ n-nyɛ bɛn daa pun diri nam Ɛdom tiŋgbɔŋ ni hal ka Izraɛlnim’ ti naanyi mali naa.

³²Bɛla ŋun daa nyɛ Bɛɔr bidibiga ka nyɛ Dinhaba nir’ la daa di nam Ɛdom.

³³Ka Bɛla daa ti kpi, ka Zɛra ŋun daa nyɛ Bɔzira nir’ la bidibiga Jɔbab di nam zan’ o zaani.

³⁴Ka Jɔbab daa ti kpi, ka Husham ŋun daa nyɛ Tɛmannim’ tiŋgbɔŋ ni nir’ la daa di nam zan’ o zaani.

³⁵Ka Husham daa ti kpi, ka Bɛdad ŋun daa nyaŋ Midiannim’ Mɔab tiŋgbɔŋ ni la bidibiga Hadad daa di nam zan’ o zaani. O ya yuli n-daa booni Avit.

³⁶Ka Hadad daa ti kpi, ka Samla ŋun daa nyɛ Masirɛka nir’ la daa di nam zan’ o zaani.

³⁷Ka Samla daa ti kpi, ka Shaul ŋun daa nyɛ Rɛhɔbɔt din daa be Yufretiiz Mɔɣili ni nir’ la daa di nam zan’ o zaani.

³⁸Ka Shaul daa ti kpi, ka Baalihanan Akibɔr bidibiga la daa di nam zan’ o zaani.

³⁹Ka Baalihanan Akibɔr bia maa daa ti kpi, ka Hada daa di nam zan’ o zaani. O ya yuli n-daa booni Pau, ka o paɣ’ yuli daa booni Mɛhɛtabɛl. O daa nyɛla Mɛtirɛd bipuɣiŋga, ka nyɛ Mɛzahab yaaŋa.

⁴⁰Iso zuliya ni nanim’ yuya m-bɔŋɔ. Di nyɛla kaman bɛ malibu mini bɛ biɛhigu shee ni daa nyɛ shɛm doli bɛ yuya. Nanim’ maa n-daa nyɛ: Timna mini Aliva ni Jɛtɛt

⁴¹ni Oholibama ni Ɛla ni Pinɔn ni

⁴²Kɛnaz ni Tɛman ni Mibizar

⁴³ni Magidiɛl ni Iram. Bɛmbɔŋɔ n-nyɛ Ɛdom nanima; di gbinni nyɛla Iso ŋun nyɛ Ɛdomnim’ yab’ la kaman bɛ biɛhigu shee ni daa nyɛ luɣ’ shɛŋa bɛ ni daa su tiŋgbɔn shɛli maa ni.