Read Dagbani Piligu 37 Bible Online

Piligu 37 - Dagbani bible

Piligu 37

¹Yaakubu daa kul bela Keenan tiŋgbɔŋ ni din nyɛ o ba ni daa be luɣ’ shɛl’ la.

²Yaakubu min’ o malibu yɛtɔɣa m-bɔŋɔ. Yisifu ŋun yuma daa nyɛ yuun’ pinaayopɔin la min’ o biɛyanim’ bɛn daa nyɛ o ba paɣiba Biliha mini Zilipa bihi la n-daa guli bɛ ba biŋkɔbiri. Ka Yisifu daa zaŋdi bɛ tuumbiɛri yɛtɔɣa na ti yɛri bɛ ba.

³Izraɛl daa yuri Yisifu pam gar’ o bihi bɛn kpalim maa zaa, o ni daa nyɛ o ni dɔɣi bi so o kuriginsim saha la zuɣu. O daa shɛla binyɛr’ wɔɣinli din baɣiri wɔɣa n-ti o.

⁴Amaa o bihi bɛn kpalim maa ni daa nya ka bɛ ba yuri Yisifu pam gari bɛn nyɛ o biɛyanim’ maa zaa maa, ka bɛ daa je Yisifu di zuɣu, ka bi tɔɣisir’ o yɛtɔɣa ni suhumahili.

⁵Dahin shɛli ka Yisifu daa ti zahim zahindi ka zaŋ li yɛl’ o biɛyanim’ maa, ka di chɛ ka bɛ jɛlinsi zaŋ chaŋ o sani maan pahi.

⁶O daa yɛli ba mi, “Wummiya n ni sa zahim zahindi shɛli ŋɔ:

⁷Ti sa bela puu ni lɔri kabɔba, yim ka n ti nya ka n kabɔbili yiɣisi zani, ka yi kabɔba laɣimna ti gili n kabɔbili maa n-damdi li tiŋa.”

⁸Ka o biɛyanim’ maa bɔh’ o, “A shiri nyɛla ŋun ti yɛn nyɛ ti naa? Bee a shiri nyɛla ŋun ti yɛn su ti fukumsi?” Dinzuɣu ka bɛ jɛlinsi zaŋ chaŋ o sani daa maan pahi, o ni daa zahim zahin’ shɛŋa maa min’ o yɛtɔɣa maa zuɣu.

⁹Dimbɔŋɔ nyaaŋa ka o daa ti lan zahim zahindi shɛli, ka zaŋ li yɛl’ o biɛyanim’ maa yaha. O daa yɛli ba mi: “Nyamiya, n lan zahimla zahindi shɛli. N sa nyami ka wuntaŋ’ mini goli ni saŋmarisi piniyini damdi ma tiŋa.”

¹⁰Amaa o ni daa zaŋ li yɛl’ o ba min’ o biɛyanim’ maa, o ba daa tahila o zuɣu ka bɔh’ o, “Zahim bɔ ka a lee zahim maa? M min’ a ma ni a biɛyanim’ ŋɔ shiri ti yɛn damdila a tooni?”

¹¹ Ka o biɛyanim’ maa daa zabir’ o nyuli di zuɣu, amaa ka o ba daa zaŋ o ni yɛli shɛm maa niŋ o suhu ni.

¹²Dahin shɛli ka Yisifu biɛyanim’ maa daa zaŋ bɛ ba biŋkɔbiri chaŋ luɣ’ shɛli din miri Shɛkɛm ni bɛ ti ŋub’ mɔri.

¹³Ka Izraɛl daa ti yɛli Yisifu, “A biɛyanim’ zaŋ biŋkɔbiri chaŋ Shɛkɛm ni bɛ ti ŋub’ mɔri. Kamina ka n tim a bɛ sani.” Ka o yɛli, “To.”

¹⁴Ka o daa yɛl’ o, “Pumpɔŋɔ, cham’ ti nya a biɛyanim’ maa mini biŋkɔbiri maa mal’ alaafee, ka labina ti yɛli ma.” Di saha ka o daa tim o ka o yi Hiburɔn vinvamli ni chaŋ Shɛkɛm.

¹⁵Ka do’ so daa ti nya o ka o be mɔɣu ni chani ginda, ka o bɔh’ o, “Bɔ ka a lee bɔra?”

¹⁶Ka Yisifu yɛl’ o, “N lihiri bɔrila m biɛyanima,” ka yɛli, “N suhir’ a, wuhim’ ma bɛ ni zaŋ biŋkɔbiri maa be luɣ’ shɛli polo ka bɛ ŋubiri mɔri maa.”

¹⁷Ka doo maa yɛl’ o, “Bɛ zaŋ kpa luɣ’ shɛli polo, dama n wumya ka bɛ yɛli, ‘Chɛliya ka ti chaŋ Dɔtan.’ ” Di saha ka Yisifu daa biɛh’ o biɛyanim’ maa naba nti nya ba Dɔtan maa.

¹⁸Bɛ ni daa ti nya Yisifu ka o be katiŋ’ ha kanna, o daa ti yɛn paai bɛ sani, ka bɛ pun lo nia wuhi ni bɛ kum’ o.

¹⁹Bɛ daa yɛlila taba, “Zahin’ zahinda la n-kanna ŋɔ.

²⁰Kamiyana pumpɔŋɔ ka ti ku o n-zaŋ o ti bahi bɔɣa ŋɔ zaɣ’ yin’ ni, ka yɛli ni mɔɣu ni biŋkɔbigu n-gbaag’ o ŋubi, ka ti nya o ni zahim zahin’ shɛŋa maa ni yɛn bahindi shɛm.”

²¹Amaa Rubin ni daa wum li, ka o fa o bɛ nuu ni ka yɛli, “Di chɛliya ka ti di o nyɛvili.”

²²Rubin daa yɛli ba, “Di yihiya o ʒim, zaŋmiy’ o niŋ bɔɣili ŋɔ ni mɔɣu ŋɔ ni, ka di niŋy’ o shɛli.” O daa yɛlila lala ni o fa o bɛ nuu ni bahi n-zaŋ o kulisi ti ti bɛ ba.

²³Dinzuɣu Yisifu ni daa mali ti paag’ o biɛyanim’ maa sani, bɛ daa darigimi fuɣ’ o binyɛr’ shɛli o ni daa ye ka di nyɛ zaɣ’ wɔɣinli ka mali bɔɣ’ wɔɣila la;

²⁴ka zaŋ o ti niŋ bɔɣili ni. Kom daa ka bɔɣili maa ni, di daa nyɛla zaɣ’ kuŋ.

²⁵Dimbɔŋɔ nyaaŋa ka bɛ daa ʒini ni bɛ di bindirigu ka lihi nya Ishimail zuliya sochandiba, ka bɛ yi Giliad n-taɣiri bɛ laakumnim’ bɛn ʒiri taansuri mini kpam ni mɛɛr, bɛ ni zaŋdi shɛŋa maani tima kuni Ijipti.

²⁶Di saha ka Juda daa bɔh’ o mabihi maa, “Ti yi ku ti tizo ŋɔ ka wuhi ni pa tinima n-ku o, nyɔ’ bɔ ka ti lee yɛn nya di ni?

²⁷Chɛliya ka ti zaŋ o kɔhi Ishimail zuliya ŋɔ zuɣu, ka di chɛliya ka ti niŋ o shɛli, dama o nyɛla ti tizo ni timaŋmaŋ’ niŋgbuŋ.” Ka o mabihi maa daa wum o ni yɛli shɛm maa.

²⁸ Ka Midian kɔhigɔriba daa garita, ka bɛ yihi Yisifu bɔɣili maa ni na n-zaŋ o kɔhi Ishimail zuliya maa zuɣu anzinfa laɣibaligu pisi, ka bɛ daa zaŋ Yisifu kuli Ijipti.

²⁹Rubin ni daa ti lab’ bɔɣili maa gbinna nti bi nya Yisifu di ni, o daa darigimi toog’ o binyɛra,

³⁰ka lab’ o mabihi maa sani ti yɛli ba, “Bia maa kani, ka ya ka n lee yɛn kpe?”

³¹Di saha ka bɛ daa gbaai bua n-kɔrigi zaŋ Yisifu binyɛrigu tim bua maa ʒim ni

³²n-zaŋ o binyɛr’ wɔɣinli din bɔɣiri wɔɣ’ maa nti ti bɛ ba ka yɛl’ o, “Ti pihi li mi, lihim’ li nya, a bia binyɛrigu m-bala bee pa dina.”

³³Ka o daa baŋ li ka yɛli, “M bia maa binyɛrigu m-bala; mɔɣu ni biŋkɔbigu n-gbaag’ o maa. Biɛhiŋ kani, ŋ-ŋɔ o kul dari tɔhitɔhila Yisifu zaa.”

³⁴Di saha ka Yaakubu daa darigi toog’ o binyɛrigu, ka zaŋ buɣu so o shee ni n-kum o bia maa kuli dabisi’ gbaliŋ.

³⁵Ka o bidibisi min’ o bipuɣinsi zaa daa kana ni bɛ ti maag’ o suhu, amaa ka o daa zaɣisi ka yɛli, “N ni kum m bia maa zuɣu hal ti paag’ o kpiimba biɛhigu shee.” Lala ka o ba daa kum o zuɣu.

³⁶Ka Midiannim’ maa daa zaŋ Yisifu chaŋ Ijipti nti kɔhi Pɔtifa ŋun daa nyɛ tɔbbi’ shɛb’ bɛn guli Firawuna[54] la sapashin’ kpɛm’ zuɣu.