Read Dagbani Piligu 39 Bible Online

Piligu 39 - Dagbani bible

Piligu 39

¹To, ka bɛ daa zaŋ Yisifu kuli Ijipti, ka tɔbbi’ shɛb’ bɛn daa guli Firawuna la sapashin’ kpɛm’ ŋun daa nyɛ Ijipti nir’ ka o yuli booni Pɔtifa la daa da o Ishimail zuliya bɛn daa ʒi o kuli nimaani maa sani.

² Ka Yawɛ daa be Yisifu sani ka chɛ ka o diri nasara o tuma ni. O daa bela o dana ŋun nyɛ Ijipti nir’ maa yiŋa.

³Ka o dan’ maa daa nya ka Yawɛ be Yisifu sani, ka chɛ ka o ni niŋdi shɛlikam zaa tɔŋda.

⁴Dinzuɣu ka Pɔtifa suhu daa yu Yisifu pam, ka Yisifu daa tumd’ o tuma, ka o zaŋ o leeg’ o yiŋ’ tumtumdiba zuɣulana, ka zaŋ o binshɛɣukam zaa niŋ o nuu ni.

⁵O ni daa zaŋ o leeg’ o yiŋ’ tumtumdiba zuɣulana, ka zaŋ o binshɛɣukam zaa niŋ o nuu ni saha shɛli maa, Yawɛ daa niŋ alibarika niŋ ŋun’ Ijipti nir’ maa yiŋ’ ni Yisifu zuɣu. Yawɛ daa niŋ alibarika niŋ o yiŋ’ binshɛlikam zaa ni, ka niŋ alibarika niŋ o puu gba ni.

⁶Dinzuɣu ka Pɔtifa daa zaŋ o ni mali shɛlikam zaa niŋ Yisifu nuu ni. Yisifu ni daa be o sani maa zuɣu, o baɣa daa lan ka shɛl’ ni n-naɣ’ pahila bindir’ shɛl’ o ni daa diri ni. Yisifu daa yi nachimbil’ viɛlli pam, ka o lihibu viɛla.

⁷Ka di daa niŋ daba ayi ka Yisifu dan’ maa paɣ’ ti lihir’ o kɔre lihigu, ka yɛl’ o, “Chɛ ka m min’ a dɔni.”

⁸Amaa ka Yisifu daa zaɣisi ka yɛl’ o dan’ paɣ’ maa, “Nyama, n ni be n dan’ sani ŋɔ, o baɣa lan ka shɛl’ ni yil’ ŋɔ. O zaŋ o ni mali shɛlikam niŋla n nuu ni.

⁹O bi galisi gari ma yili ŋɔ puuni, o mi bi mɔŋ ma shɛli naɣila nyini, dama a nyɛla o paɣa; ka wula ka n ni tooi tum ninvuɣ’ biɛtali tuun’ titali ŋɔ n-tum alahichi zaŋ chaŋ Naawuni sani?”

¹⁰Hal o ni daa kul yɛri Yisifu lala dabisili kam maa zaa yoli, Yisifu daa bi saɣi ni o min’ o dɔni.

¹¹Amaa ka Yisifu daa ti kpe yili maa ni dahin’ shɛli ni o ti tum o tuma, ka ninvuɣ’ shɛb’ bɛn daa be yili maa ni kani.

¹²Ka paɣ’ maa daa gbaai Yisifu binyɛrigu gbib’ ka yɛl’ o, “Chɛ ka m min’ a dɔni.” Amaa ka Yisifu daa fuɣ’ o binyɛrigu maa niŋ paɣ’ maa nuu ni, ka guui yi yili maa ni.

¹³Paɣ’ maa ni daa nya ka Yisifu chɛ o binyɛrigu maa niŋ o nuu ni ka guui yi yili maa ni maa,

¹⁴ka o daa boli ninvuɣ’ shɛb’ bɛn daa be o yiŋ’ maa na nti yɛli ba, “Nyamiya, o ni zaŋ Hiburu nir’ maa na ka o ti lihi ʒiɛm ti shɛm, o kpɛmina ni o ti zaŋ ma dɔni, ka n kuhi pam.

¹⁵O ni wum ka n duhi n yee kuhi pam maa, ka o chɛ o binyɛrigu bahi ma ka guui yi yili ŋɔ.”

¹⁶Di saha ka o daa zaŋ Yisifu binyɛrigu maa sɔŋ baɣil’ omaŋ’ hal ka Yisifu dan’ maa ti kuna.

¹⁷Ka o daa zaŋ yɛtɔɣ’ yini maa tɔɣis’ o yɛra, “A ni zaŋ Hiburu dab’ so na ti gari ti ni la kpɛmina ni o ti lihi ʒiɛm ma;

¹⁸amaa n ni di kul duhi n yee kuhi pam saha shɛli, ka o chɛ o binyɛrigu ŋɔ bahi ma ka guui yi yili ŋɔ.”

¹⁹Yisifu dan’ maa ni daa wum yɛtɔɣ’ shɛŋa o paɣ’ ni zaŋ yɛl’ o ka lan yɛli, “Lala ka a dabili maa niŋ ma,” ka o suhu daa yiɣisi pam.

²⁰Ka Yisifu dan’ maa daa gbaag’ o n-zaŋ o ti niŋ sarika ni din nyɛ luɣ’ shɛli bɛ ni daa zaŋ naa sarikanim’ niŋ, ka o daa be sarika maa ni.

²¹ Amaa ka Naawuni daa be Yisifu sani ka niŋ o nirilim, ka chɛ ka dansarika gul’ maa suhu yu o.

²²Ka dansarika gul’ maa daa zaŋ sarikanim’ bɛn zaa be sarika maa ni niŋ Yisifu nuu ni, ka Yisifu daa nyɛ ŋun niŋdi binshɛɣukam zaa nimaani.

²³Ka dansarika gul’ maa daa bi lan lihir’ o ni zaŋ binshɛlikam niŋ Yisifu nuu ni maa, dama Yawɛ daa be Yisifu sani, ka o daa yi niŋ shɛlikam, Yawɛ chɛrimi ka di tɔŋ.