Read Dagbani Piligu 4 Bible Online

Piligu 4 - Dagbani bible

Piligu 4

¹Ka doo maa min’ o paɣa Awa daa laɣim ka o niŋ pua n-dɔɣi Keen[5] ka yɛli, “N nya ninsala Yawɛ sɔŋsim zuɣu.”

²Ka o daa ti lan dɔɣ’ o tizo Ɛbɛl gba. Ɛbɛl daa nyɛla piɛgula, ka Keen mi nyɛ pukpara.

³Dahin shɛli ka Keen daa ti zaŋ o puu ni bindira na nti mali sara Yawɛ sani,

⁴ ka Ɛbɛl mi daa zaŋ o buzɔŋ ni piɛbil’ tuuli ni o kpam na nti mali sara, ka Yawɛ Naawuni nini daa tiɣi Ɛbɛl min’ o sara maa,

⁵amaa ka o nini daa bi tiɣi Keen ŋun’ min’ o sara maa. Dinzuɣu ka Keen suhu daa yiɣisi pam, ka o zuŋ o ninni.

⁶Ka Yawɛ daa bɔhi Keen, “Bɔ n-niŋ ka a chɛ ka a suhu yiɣisi, ka a zuŋ a ninni?

⁷A yi di niŋ din simdi, n naan ku deei li? Ka a yi bi niŋ din simdi, alahichi do a dunol’ ni m-bɔri ni di nyaŋ a, amaa di niŋ kamaata ni a nyaŋ li.”

⁸ Dahin shɛli ka Keen daa ti yɛl’ o tizo Ɛbɛl, “Ti cham’ mɔɣu ni.” Bɛ ni daa ti be mɔɣu maa ni saha shɛli, ka Keen yiɣisi lu o tizo Ɛbɛl maa zuɣu n-ku o.

⁹Ka Yawɛ daa bɔhi Keen, “A tizo Ɛbɛl be ya?” Ka Keen garigi yɛli, “M bi mi; mani n-nyɛ n tizo maa gula?”

¹⁰ Ka Yawɛ bɔh’ o, “Tuun’ bɔ ka a lee tum maa? A tizo maa ʒim kukoli kuhigu n-yi tiŋgban’ ni ka n sanna.

¹¹Ka pumpɔŋɔ, noli yɛlibu ni yi tiŋgban’ shɛli din yaai di noli n-deeg’ a tizo maa ʒim a nuu ni maa na di a.

¹²Ka a yi lan ko puu tiŋgbani maa ni, di bindira ku lan niŋ viɛnyɛliŋga. A ni leei ŋun ka kpɛhili shee, ka leei ŋun dari gindi dunia ŋɔ ni.”

¹³Ka Keen yɛli Yawɛ, “N tibidarigibo maa galisiya gari ma.

¹⁴Nyama, a kari ma tiŋgbani ŋɔ ni, ka kari ma a sani; ka n leei ŋun ka kpɛhili shee, ka leei ŋun dari gindi dunia ŋɔ ni, ka ŋunkam ti nya ma ni ku ma.”

¹⁵Ka Yawɛ daa yɛl’ o, “Di ku niŋ lala. So yi ku nyin’ Keen, bɛn’ kum’ niriba ayopɔin yo a kubu maa samli.” Ka Yawɛ daa dalim Keen ni di chɛ ka so ti nya o, ka ku ku o.

¹⁶Ka Keen daa yi Yawɛ sani n-chaŋ ti be tiŋgban’ shɛli din be Idɛn puu la wulimpuhili polo, ka di yuli booni Nɔd la.

¹⁷Ka Keen min’ o paɣ’ daa laɣim ka o niŋ pua n-dɔɣi Inok. Ka Keen daa me o tiŋa n-zaŋ o bia Inok maa yuli m-bol’ li Inok.

¹⁸Ka Inok daa dɔɣi Irad; ka Irad daa nyɛ Mɛhujaɛl ba, ka Mɛhujaɛl nyɛ Mɛtushaɛl ba, ka Mɛtushaɛl mi nyɛ Lamɛk ba.

¹⁹Ka Lamɛk daa kpuɣi paɣiba ayi, ka yino yuli booni Ada, ka yino mi yuli booni Zilla.

²⁰Ka Ada daa dɔɣi Jabal. Ŋuna n-daa nyɛ ninvuɣ’ shɛb’ bɛn be tanti suɣa ni ka guli niɣ’ la yaba.

²¹O tizo yuli n-daa booni Jubal. Ŋun’ mi n-daa nyɛ ninvuɣ’ shɛb’ bɛn ŋmɛri mɔɣilɔnim’ mini yupiɛbiriba yaba.

²²Ka Zilla mi daa dɔɣi Tubalikeen ŋun daa nyɛ ŋun zaŋ daanya mini kuriti m-mali tuma nɛma balibu kam zaa la. Ka Tubalikeen tizɔpaɣ’ daa nyɛ Naama.

²³Ka Lamɛk daa yɛl’ o paɣiba, “Ada mini Zilla, wummiya: Yinim’ Lamɛk paɣiba, wummiya n ni yɛn yɛli shɛm ŋɔ: N kula do’ so ŋun ti ma daŋa. N kula nachimbil’ so ŋun ŋme ma.

²⁴Bɛ yi daa yɛn ku niriba ayopɔin n-yo Keen kubu samli, so yi ku mani, yɛlimaŋli, ninvuɣ’ pisopɔinnaayopɔin ka bɛ yɛn ku n-yo man’ kubu samli.”

²⁵Ka Adam min’ o paɣ’ daa lan laɣim ka o dɔɣi bidibiga m-bol’ o yuli Sɛt,[6] dama O daa yɛlimi, “Naawuni zaŋla bidib’ so ti ma ka o zani Ɛbɛl zaani, Keen ni daa ku Ɛbɛl la zuɣu.”

²⁶Ka Sɛt daa ti dɔɣi bidibiga m-bol’ o yuli Ɛnɔsh. Di saha maa ka ninsalinim’ daa piligi jɛmdi Yawɛ.