Read Dagbani Piligu 42 Bible Online

Piligu 42 - Dagbani bible

Piligu 42

¹Yaakubu ni daa ti wum ni kawana be Ijipti, ka o bɔh’ o bihi, “Bɔzuɣu ka yi lihiri taba?”

² O daa yɛli ba, “N wumya ni kawana be Ijipti, chamiya nimaani nti da li ti ti na, ka ti tiligi ka ku kpi.”

³Di saha ka Yisifu biɛyanim’ ninvuɣ’ pia la daa chaŋ Ijipti ni bɛ ti da kawana.

⁴Amaa Yaakubu daa bi chɛ ka Bɛnjamin ŋun nyɛ Yisifu tizo la dol’ o biɛyanim’ maa chaŋ, dama o daa zɔrimi ni binshɛli ti niŋ o.

⁵Dinzuɣu ka Yaakubu bihi mini ninvuɣ’ shɛb’ daa kana ni bɛ ti da bindira maa, dama kum maa daa lula Keenan tiŋgbɔŋ ni gba.

⁶Yisifu ni daa nyɛ Ijipti tiŋgbɔŋ maa gomna la zuɣu, ŋuna n-daa nyɛ ŋun kɔhiri bindira maa tiŋgbɔŋ maa nim’ zaa zuɣu. Ka Yisifu biɛyanim’ maa daa kana ti damd’ o tooni n-zaŋ bɛ zuɣuri silim tiŋa.

⁷Yisifu ni daa nya o biɛyanim’ maa, o daa baŋ ba, amaa ka niŋ ba kaman saamba n-nyɛ ba la, ka daa bi tɔɣisi ba suhumahili yɛtɔɣa. O daa bɔhi ba mi, “Ya ka yi lee yina?” Ka bɛ yɛli, “Ti yila Keenan tiŋgbɔŋ ni na ni ti ti da bindirigu.”

⁸Yisifu daa baŋ o biɛyanim’ maa, amaa ka bɛn’ lee bi baŋ o.

⁹ Ka Yisifu daa teei o ni daa zahim zahin’ shɛŋa zaŋ chaŋ bɛ polo la, ka yɛli ba, “Yi nyɛla puɣisiriba, yi kamina ni yi ti nya ti tiŋgbɔŋ ŋɔ gbariginsim ni nyɛ shɛm.”

¹⁰Ka bɛ yɛl’ o, “Aai, ti dana, a daba kala bindira dabu na.

¹¹Tinim’ a daba ŋɔ zaa nyɛla do’ yino bihi, ti nyɛla ninvuɣ’ maŋa, ti pala puɣisiriba.”

¹²Ka Yisifu yɛli ba, “Aai, yi kana ni yi ti nyala ti tiŋgbɔŋ ŋɔ gbariginsim ni nyɛ shɛm.”

¹³Ka bɛ yɛl’ o, “Tinim’ a daba ŋɔ nyɛla do’ yino ŋun be Keenan tiŋgbɔŋ ni bihi pinaayi, ŋun nyɛ ti zaa ha biasani be ti ba maa sani ka yino ŋun’ kani.”

¹⁴Amaa ka Yisifu lan yɛli ba, “Di kul nyɛla kaman n ni pun yɛli ya shɛm la, yi shiri nyɛla puɣisiriba.”

¹⁵Ti ni yɛn niŋ shɛm buɣisi ya m-bɔŋɔ: m po Firawuna ni yi ku kuli ka pa ni yi tizo ŋun nyɛ yi zaa biasani maa gba kala kpe na.

¹⁶Chɛliya ka yi ni yino kuli ti zaŋ yi tizo maa na, ka yinim’ bɛn kpalim be sarika ni, ka ti buɣisi yi ni yɛli shɛm maa nya yɛlimaŋli ka yi yɛli maa, di yi pa lala, m po Firawuna ni yi shiri nyɛla puɣisiriba.

¹⁷Ka o daa shiri zaŋ bɛ zaa niŋ sarika ni daba ata.

¹⁸Daba ata maa dali, ka Yisifu daa yɛli ba, “Niŋmiya dimbɔŋɔ ka tiligi, dama n zɔri Naawuni.

¹⁹Yi yi shiri nyɛla yɛlimaŋyɛriba, yin’ chɛliya ka yi mabi’ yino kpalim be sarika ŋɔ ni, ka chɛ ka yi bɛn kpalim ʒi bindira kuli ti ti kum ni mali yi yiŋnim’ shɛb’ maa,

²⁰ka zaŋ yi tizo maa na ka n ti nya o, ka di wuhi ni yi yɛligu maa nyɛla yɛlimaŋli, ka yi tiligi.” Ka bɛ daa shiri niŋ lala.

²¹Di saha ka bɛ daa yɛri taba, “Yɛlimaŋli, ti ni daa niŋ ti mabia la shɛm la samli n-yɔri ti ŋɔ, o ni daa balim ti ka ti daa nya o suhusaɣiŋgu ni nyɛ shɛm, amaa ka zaɣisi wumbu la; dinzuɣu ka suhusaɣiŋgu ŋɔ ti paai ti gba maa.”

²² Ka Rubin daa bɔhi ba, “N daa bi yɛli ya ni yi di niŋ bia maa shɛli? Amaa ka yi daa zaɣisi wumbu. Dinzuɣu pumpɔŋɔ, o kubu maa biɛri m-bɔhiri ti maa.”

²³Bɛ daa bi mi ni Yisifu wum bɛ ni yɛri shɛm maa, dama so n-daa deeri yɛtɔɣa maa lɛbigiri tiri ba.

²⁴Di saha ka Yisifu daa ŋmaligi bɛ sani n-chaŋ ti kum; ka lan lab’ bɛ sanna nti tɔɣisi ba yɛtɔɣa. Ka o daa gbaai Simiɔn n-chɛ ka bɛ lo o mihi bɛ zaa ninni.

²⁵Ka Yisifu daa bahi noli ni bɛ niŋm’ kawana pali bɛ kpalansi ka labisi bɛ zaa yinoyino liɣiri niŋ bɛ kpalansi maa ni, ka bo bɛ sol’ ni bindirigu ti ba. Ka bɛ daa shiri niŋ lala ti ba.

²⁶Di saha ka bɛ daa zaŋ bɛ kawana ʒili bɛ bunsi lu soli.

²⁷Bɛ ni daa ti paai luɣ’ shɛli bɛ ni yɛn gbe, ka bɛ ni yino lɔrig’ o kpalaŋa ni o niŋ bindirigu ti o buŋa ka nya ka liɣiri be o kpalaŋ’ maa nol’ ni;

²⁸ka o yɛl’ o mabihi maa, “Bɛ zaŋla n liɣiri labisi niŋ ma, dina m-be n kpalaŋ’ ni ŋɔ.” Ka bɛ suhuri daa fuŋ di zuɣu, ka bɛ ni sɔhiri ka bɛ bɔhiri taba, “Ka tuun’ bɔ ka Naawuni lee tum ti ŋɔ?”

²⁹Bɛ ni daa ti paai bɛ ba Yaakubu sani Keenan tiŋgbɔŋ ni, bɛ daa yɛl’ o la dinkam zaa niŋ ba, ka lan yɛl’ o,

³⁰“Do’ so ŋun nyɛ tiŋgbɔŋ maa gomna maa bi tɔɣisi ti suhumahili yɛtɔɣa, ka yɛli ni ti nyɛla puɣisiriba bɛn kana ni ti ti puɣisi o tiŋgbɔŋ maa.

³¹Amaa ka ti daa yɛl’ o, ‘Ti pala puɣisiriba, ti nyɛla yɛlimaŋyɛriba.

³²Ti nyɛla do’ yino bidibisi pinaayi; ka ti ni yino daa kani, ka ŋun nyɛ ti zaa biasani be ti ba maa sani Keenan tiŋgbɔŋ ni.’

³³Di saha ka do’ so ŋun nyɛ tiŋgbɔŋ maa gomna maa yɛl’ ti, ‘Yi ni yɛn niŋ shɛm chɛ ka m baŋ ni yi nyɛla yɛlimaŋyɛriba m-bɔŋɔ: chɛliya yi ni yino n sani, ka zaŋ kawana kuli ti ti yi yiŋnim’ shɛb’ kum ni muɣisi maa;

³⁴ka zaŋ yi tizɔbil’ maa ti ma na, dina n-ni chɛ ka m baŋ ni yi pala puɣisiriba, amaa ka nyɛla yɛlimaŋyɛriba, ka n naanyi zaŋ yi mabia maa tin ya ka yi gɔri kɔhigu tiŋgbɔŋ ŋɔ ni.’ ”

³⁵Bɛ ni daa kpaai bɛ kawana, bɛ zaa liɣiri daa lɔnlomi be bɛ kpalansi ni, bɛ mini bɛ ba ni daa nya liɣiri maa, ka di gari ba.

³⁶Ka bɛ ba Yaakubu yɛli ba, “Yi chɛ ka n kɔŋ m bihi. Yisifu lan kani, ka Simiɔn gba kani, ka yi yɛn zaŋ Bɛnjamin mi chaŋ pumpɔŋɔ, n zuɣu ka yɛla ŋɔ zaa ʒini.”

³⁷Di saha ka Rubin daa yɛl’ o ba, “N yi bi ʒi Bɛnjamin kuna, nyin’ kum’ m bidibis’ ayi ŋɔ, chɛl’ o niŋ n nuu ni, n ni ʒi o kuna ti ti a.”

³⁸Amaa ka o yɛli, “M bia maa ku doli ya chaŋ, dama o biɛli kpiya, ka o kɔŋko n-kpalim. Shɛli yi niŋ o yi ni yɛn chaŋ chandi shɛli ŋɔ ni, yi ni chɛ ka n dɔni kabiri puuni ni n kɔb’ piɛla ŋɔ ni suhugarigu.”