Read Dagbani Piligu 43 Bible Online

Piligu 43 - Dagbani bible

Piligu 43

¹Kum maa daa miiya pam tiŋgbɔŋ maa ni.

²Bɛ ni daa ti di bɛ ni daa ʒi kawaan’ shɛli Ijipti na maa naai saha shɛli ka bɛ ba yɛli ba, “Labimiya ti da bindirigu biɛla na nti ti ti yaha.”

³Amaa ka Juda daa yɛl’ o, “Doo maa daa kpahi ti zuɣu ni yɛli, ‘Yi yi ti bi ʒi yi tizo maa na, yin’ di chɛ ka n ninni nyan ya.’

⁴A yi ni chɛ ka ti tizo maa dol’ ti chaŋ, ti ni chaŋ ti da bindira maa na ti a;

⁵amaa a yi ku chɛ ka o dol’ ti chaŋ, ti ku chaŋ, dama doo maa daa yɛl’ ti, ‘Yi yi ti bi ʒi yi tizo maa na, yi ti ku nya n ninni.’ ”

⁶Ka Izraɛl daa bɔhi ba, “Bɔ n-niŋ ka yi daa yɛli doo maa ni yi mali tizo m-bo suhusaɣiŋgu ŋɔ ti ma?”

⁷Ka bɛ garigi yɛl’ o, “Doo maa n-daa bɔhi ti ti mini ti dɔɣiriba yɛla pam hal ti bɔhi ti, ‘Yi ba na be o nyɛvil’ ni? Yi mali tizo?’ Ka ti mi daa garig’ o bɔhigunim’ maa; ti daa lee yɛn niŋ wula baŋ ni o ni yɛl’ ti, ‘Zaŋmiya yi tizo maa na’? ”

⁸Ka Juda daa yɛl’ o ba Izraɛl, “Chɛ ka bia maa doli ma ka ti yiɣisi chaŋ, ka di chɛ ka ti mini ya ni ti bihi ŋɔ ku kpi.

⁹N ni zaŋ mmaŋ’ pa talima o zuɣu, ka a ti bɔh’ o yɛla n sani. N yi ti bi ʒi o labina ti ti a, nyin’ chɛ ka di taali kul ʒi n zuɣu sahakam.

¹⁰Dama ti yi di bi kpalim ʒiya, ŋ-ŋɔ ti di pun chaŋ pahi buyi ka labina.”

¹¹Di saha ka bɛ ba Izraɛl daa yɛli ba, “Di yi nyɛ lala, yin’ niŋmiya ŋ-ŋɔ: zaŋmiya tiŋgbɔŋ ŋɔ ni tiwal’ viɛla n-niŋ yi kpalansi ni n-ʒi m-mali chaŋ ti ti doo maa pini; ka ʒi tisum shɛli bɛ ni zaŋdi maani tim la mini shiri biɛla ni tulaale ni suri ni kpakpa ni dɔbino.

¹²Ʒimiya liɣiri pahi bɛ ni daa zaŋ laɣ’ shɛli labisi niŋ yi kpalansi noya ni la zuɣu mali chaŋ, di pa shɛli bɛ daa chirimmi maa.

¹³Zaŋmiya yi tizo maa n-yiɣisi lab’ doo maa sani yaha.

¹⁴Naawuni ŋun nyɛ Kpiɔŋlan’ Naa ŋɔ ni chɛ ka doo maa ti zɔn ya nambɔɣu, ka zaŋ yi mabi’ ŋun’ la mini Bɛnjamin n-tin ya ka yi labina. Ka n yi ni kɔŋ m bihi maa, n kul ni kɔŋ ba mi.”

¹⁵Di saha ka nachimba maa daa zaŋ pini maa mini liɣiri ʒiibuyi zuɣu ni Bɛnjamin n-yiɣisi chaŋ Ijipti Yisifu sani.

¹⁶Yisifu ni daa nya bɛ mini Bɛnjamin, o daa yɛlila o yiŋ’ tumtumda, “Zaŋm’ niriba maa kuli yiŋa, ka gbaai biŋkɔbigu kɔrigi m-mal’ o duɣi bindirigu, dama m mini niriba maa n-yɛn laɣim di wuntaŋ’ ŋɔ ni.”

¹⁷Ka doo maa daa zaŋ niriba maa kuli Yisifu yiŋa kaman o ni daa wuh’ o shɛm maa.

¹⁸Ka dabiɛm daa gbaai ba, bɛ ni daa zaŋ ba tahi Yisifu yiŋ’ maa zuɣu, ka bɛ yɛli, “Ti ni daa tuui kana ka bɛ labisi laɣ’ shɛli niŋ ti kpalansi ni la zuɣu ka bɛ zaŋ ti tahi kpe na maa ni di chɛ ka o tooi nya binshɛli din ni chɛ ka o zaŋ ti taali, ka gbahi ti leeg’ o daba, ka fa ti bunsi ŋɔ.”

¹⁹Dinzuɣu ka bɛ daa chaŋ Yisifu yiŋ’ tumtumda maa sani yili maa dunol’ ni

²⁰nti yɛl’ o, “N dana, ti daa pun kala kpe na ti da bindira.

²¹Ka ti daa ti paai ti gbɛbu shee n-yooi ti kpalansi nya ka ti zaa yinoyino liɣiri noli bela ti kpalansi maa noya ni, dinzuɣu ka ti ʒi li mali na,

²²ka lan ʒi laɣ’ shɛl’ na ni ti ti lan da bindira maa. Ti mi bi mi ŋun daa zaŋ ti liɣiri maa labisi niŋ ti kpalansi maa ni.”

²³Ka o yɛli ba, “Chɛliya ka yi suhuri doya, ka di chɛliya ka dabiɛm mali ya; n daa deei yi liɣiri maa. Di pa shɛli, yi Naawuni ŋun nyɛ yi yaannim’ Naawuni la n-daa zaŋ liɣiri maa niŋ yi kpalansi maa ni maa.” Di saha ka o daa zaŋ Simiɔn n-yihi bɛ sanna.

²⁴Doo maa ni daa zaŋ ba ti kpɛhi Yisifu yiŋa, ka ti ba kom ka bɛ paɣi bɛ naba, ka bo mɔri ti bɛ bunsi naai,

²⁵bɛ daa malila pin’ shɛli bɛ ni yɛn zaŋ ti Yisifu la zali gu o kundina saha wuntaŋ’ maa ni, dama bɛ daa wumya ni bɛ min’ o n-yɛn laɣim di.

²⁶Yisifu ni daa ti kuna, ka bɛ zaŋ pin’ shɛli din be bɛ sani maa kpɛhi ti damd’ o tooni n-zaŋ li ti o.

²⁷Ka o daa bɔhi bɛ daalaafee yɛla; ka lan bɔhi ba, “Yi ba do’ kur’ so yɛla yi ni daa yɛli ma la na be o nyɛvil’ ni? O mal’ alaafee?”

²⁸Ka bɛ daa garigi yɛl’ o, “Ti ba ŋun nyɛ a dabili maa na kul be o nyɛvil’ ni ka mal’ alaafee.” Ka bɛ daa zaŋ bɛ zuɣuri silim tiŋa n-lu o sizuura.

²⁹Ka Yisifu daa kpuɣ’ o zuɣu nya o tizo Bɛnjamin ŋun nyɛ o ma puuni bia la, ka bɔhi ba, “Yi ni daa yɛli ma yi tizɔbil’ so yɛla la m-bɔŋɔ?” Di saha ka o daa yɛli, “M bia, Naawuni niŋm’ alibarika niŋ a ni!’ ”

³⁰Di nyaaŋa ka Yisifu daa niŋ yomyom bo luɣ’ shɛli o ni yɛn zani kum, dama o suhu n-daa palig’ o tizo maa zuɣu ti yaɣi. O daa kpɛla o duu puuni ti kum.

³¹Di nyaaŋa ka o daa paɣ’ o ninni ka yina nti maag’ o ni ka yɛli, “Zaŋmiya bindirigu ti ti na.”

³²Bɛ daa zaŋla o bindirigu na ti zal’ o ko, ka zaŋ o biɛyanim’ maa bindirigu na ti zali ba bɛ ko, ka zaŋ Ijiptinim’ bɛn min’ o daa yɛn dila mi bindirigu na ti zali ba bɛ ko. Dama Ijiptinim’ mini Hiburunim’ daa bi laɣindi dira. Di daa nyɛla din chihiri Ijiptinim’ sani.

³³Ka Yisifu biɛyanim’ maa daa ʒini tuhi Yisifu. Ŋun nyɛ bɛ kpɛma n-daa daŋ ʒinibu, ka bɛn paya ʒini tuɣi hal ti paai bɛ biasani, ka di daa gari niriba maa, ka bɛ ŋmaligi lihi taba.

³⁴Ka bɛ daa zaŋ Yisifu sani bindir’ shɛŋa nti ti ba. Amaa Bɛnjamin dini daa gar’ o tab’ maa dini ʒiibunu zuɣu. Ka bɛ daa nyu binnyura, ka bɛ min’ o zaa suhuri paligi.