Read Dagbani Piligu 47 Bible Online

Piligu 47 - Dagbani bible

Piligu 47

¹Di saha ka Yisifu daa chaŋ Firawuna sani ti yɛl’ o, “M ba mini m biɛyanim’ zaŋ bɛ piɛri mini bɛ niɣi ni bɛ ni su shɛlikam yi Keenan tiŋgbɔŋ ni na, bɛ be Goshɛn tiŋgban’ ni pumpɔŋɔ.”

²Yisifu daa piila o biɛyanim’ maa ni niriba anu n-zaŋ ba chaŋ ti wuhi Firawuna.

³Ka Firawuna daa bɔhi Yisifu biɛyanim’ maa, “Tuun’ bɔ n-lee nyɛ yi tuma?” Ka bɛ yɛl’ o, “Tinim’ a daba ŋɔ mini ti yaannim’ nyɛla piɛguliba.”

⁴Ka bɛ daa lan yɛli Firawuna, “Tinim’ a daba ŋɔ kamina ni ti ti ʒini tiŋgbɔŋ ŋɔ ni, dama kum maa miiya pam Keenan tiŋgbɔŋ ni, ka ti biŋkɔbiri bi nyari mɔri ŋubira; ka pumpɔŋɔ ti suhir’ a mi ni a chɛ ka ti ʒini Goshɛn tiŋgban’ ni”

⁵Di saha ka Firawuna daa yɛli Yisifu, “A ba min’ a biɛyanim’ kul’ a sanna.

⁶Nyini n-su Ijipti tiŋgbɔŋ ŋɔ fukumsi, zaŋm’ a ba min’ a biɛyanim’ maa ʒili luɣ’ viɛlli shee; chɛ ka bɛ ʒini Goshɛn tiŋgban’ ni. Ka a yi mi bɛ ni bɛn mi biŋkɔbiri gbibbu, nyin’ chɛ ka bɛ guli n niɣi.”

⁷Di nyaaŋa ka Yisifu daa zaŋ o ba Yaakubu chaŋ Firawuna sani, ka Yaakubu daa suhi alibarika niŋ Firawuna ni.

⁸Ka Firawuna daa bɔhi Yaakubu, “A yuma ala?”

⁹Ka Yaakubu yɛli Firawuna, “N ni gɔri gindi ŋɔ, n yuma nyɛla yuun’ kɔbiga ni pihita. N yuma maa mini di dabisa bi galisi, amaa ka yɛl’ biɛri lee be di puuni. Di bi be kaman yuma mini dabisa shɛŋa n yaannim’ ni daa zaŋ gɔri gindi la.”

¹⁰Ka Yaakubu daa suhi alibarika niŋ Firawuna ni ka yiɣisi kuli.

¹¹Di saha ka Yisifu daa zaŋ o ba min’ o biɛyanim’ maa ʒili Ijipti tiŋgbɔŋ maa ni, ka ŋmaai tiŋgban’ viɛlli Ramɛsis tiŋgban’ ni ti ba kaman Firawuna ni daa yɛl’ o shɛm.

¹²Ka Yisifu daa tir’ o ba min’ o yiŋnim’ zaa ni o biɛyanim’ maa bindira n-saɣisiri bɛ ni daa su ninvuɣ’ shɛb’ kalinli tariga.

¹³Kum maa ni daa mii pam maa zuɣu daa chɛ ka bindira ka tiŋgbɔŋ maa luɣ’ shɛlikam, ka di zuɣu daa chɛ ka Ijipti tiŋgbɔŋ ni nim’ mini Keenan tiŋgbɔŋ ni nim’ gbarigi zaa.

¹⁴Ka Yisifu daa laɣisi bɛ ni daa kɔhi kawana laɣ’ shɛli Ijipti tiŋgbɔŋ ni mini Keenan tiŋgbɔŋ ni zaa n-zaŋ li tahi Firawuna yiŋa nti ti o.

¹⁵Ka Ijipti tiŋgbɔŋ ni nim’ mini Keenan tiŋgbɔŋ ni nim’ ni daa ti di bɛ liɣiri zaa naai saha shɛli, ka Ijiptinim’ zaa daa ka Yisifu sanna ti yɛl’ o, “Tim’ ti bindirigu, bɔzuɣu ka a yɛn lihiri ti ka ti kpi? Dama ti liɣiri zaa naaya.”

¹⁶Ka Yisifu daa garigi yɛli ba, “Yi liɣiri yi naai, yin’ zaŋmiya yi biŋkɔbiri na ti taɣi bindirigu.”

¹⁷Ka bɛ daa zaŋ bɛ niɣi maa na ti ti Yisifu, ka Yisifu daa zaŋ bindirigu taɣi bɛ yuri mini piɛri ni buhi ni bunsi. Ka o daa zaŋ bindirigu taɣi bɛ niɣi zaa di yuuni maa puuni.

¹⁸Yuuni maa ni daa ti gari, ka bɛ daa lan lab’ o sanna yuuni din paya ni ti yɛl’ o, “N dana, ti ku sɔɣ’ a, ti di ti liɣiri zaa; ka ti niɣi zaa nyɛla nyin’ n dan’ dini; ti lan ka binshɛɣu nyin’ n dan’ tooni m-pahila ti niŋgbuna ŋɔ mini ti puri.

¹⁹Ka bɔzuɣu ka a ni lihiri ti ka ti mini ti puri maa zaa kpi? Zaŋm’ bindirigu taɣi ti mini ti puri maa, ka ti mini ti puri maa zaa leei Firawuna daba; ka ti ti bimbira din ni chɛ ka ti gali ka ku kpi, ka ti puri maa gba ku kpalim doya yoli.”

²⁰Ka Yisifu daa da Ijipti tiŋgbɔŋ maa puri zaa n-ti Firawuna; dama Ijiptinim’ zaa daa zaŋla bɛ puri kɔhi, kum maa ni daa mii ba pam maa zuɣu. Ka puri maa daa leei Firawuna dini.

²¹Ka Yisifu daa chɛ ka Ijipti tiŋgbɔŋ zaa niriba leei daba.

²²Maligumaaniba kɔŋko puri ka Yisifu daa bi da. Dama Firawuna daa tirila maligumaaniba maa laɣidira, dina ka bɛ daa mali dira, dinzuɣu ka bɛn’ daa bi kɔhi bɛ puri maa.

²³Di saha ka Yisifu daa yɛli niriba maa, “Nyamiya, n da yi mini yi puri n-ti Firawuna zuŋɔ dabisili ŋɔ. Pumpɔŋɔ deemiya bimbira ŋɔ zali nti biri.

²⁴Ka yi yi ti kpuɣi puri maa atam, yin’ pum’ li sɔŋ ʒiibunu n-vaai di yim zuɣu ti Firawuna, ka yi mi zaŋ di ʒiibunahi la ka yi mini yi yiŋnim’ ni yi bihi di, ka chɛ di shɛli zali nti biri.”

²⁵Ka bɛ daa yɛl’ o, “N dana, a tiligi ti nyɛviya; ka di yi niŋ a nyaɣisim, ti ni leei Firawuna daba.”

²⁶Dinzuɣu ka Yisifu daa zali zaligu zaŋ chaŋ Ijipti tiŋgbɔŋ puri polo ni bɛ yi ti kpuɣi puri atam, bɛn’ zaŋm’ di pirigibu ʒiibunu puuni yim zuɣu ti Firawuna. Ka lala n-na kul nyɛ li hal ni zuŋɔ. Kulla maligumaaniba kɔŋko puri n-daa bi leei Firawuna ni su shɛli.

²⁷Ka Izraɛlnim’ daa be Ijipti Goshɛn tiŋgban’ ni. Bɛ daa nya azichi pam nimaani, ka daa dɔɣi bihi ka bɛ zuliya maa nab’ pam.

²⁸Yaakubu daa niŋla yuun’ pinaayopɔin Ijipti tiŋgbɔŋ maa ni; ka o yuma kalinli daa yiɣisi yuun’ kɔbiga ni pihinahi ni ayopɔin.

²⁹Izraɛl ni daa ti miri kum, o daa bolila o bia Yisifu ti yɛl’ o, “A yi ni niŋ n ni bɔri shɛm ŋɔ, nyin’ zaŋm’ a nuu tim n gbalipini lɔŋni ka lo alikauli ni a ni tum ma ʒiɛyimtali tuma ni yɛlimaŋli. Di sɔɣi ma Ijipti ŋɔ,

³⁰amaa zaŋm’ ma ti sɔŋla m banim’ dooshee. Ʒimiya ma yi Ijipti ŋɔ kuli nti sɔɣi ma bɛ sɔɣibu shee.” Ka Yisifu yɛl’ o, “N ni niŋ a ni yɛli shɛm maa.”

³¹Ka o daa yɛl’ o, “Pom’ n nini ŋɔ ni;” ka Yisifu daa shiri po. Di saha ka Izraɛl daa zaŋ o zuɣu silim tiŋa o bindoo zuɣusaa polo.