Read Dagbani Piligu 48 Bible Online

Piligu 48 - Dagbani bible

Piligu 48

¹Dimbɔŋɔ nyaaŋa ka bɛ daa ti yɛli Yisifu, “A ba ka alaafee”; ka o daa zaŋ o bidibis’ ayi la, Manaasa mini Ifriim chaŋ o sani.

²Ka bɛ daa yɛli Yaakubu, “A bia Yisifu kana”; ka o daa kpaŋ omaŋ’ yiɣisi ʒin’ o bindoo zuɣu.

³Ka Yaakubu daa yɛli Yisifu, “Naawuni ŋun nyɛ Kpiɔŋlan’ Naa ŋɔ daa yi n zuɣu Luz Keenan tiŋgbɔŋ ni n-niŋ alibarika niŋ n ni

⁴ ka yɛli ma, ‘N ni chɛ ka a dɔɣi bihi, ka chɛ ka a zuliya nab’ pam. Ka n ti chɛ ka zuliya gbaliŋ yi a zuliya maa ni na, ka n ti zaŋ tiŋgbɔŋ ŋɔ ti a zuliya ka bɛ su li sahakam.’ ”

⁵Ka a bih’ ayi shɛb’ a ni pun dɔɣi Ijipti tiŋgbɔŋ ŋɔ ni pɔi ka n naanyi kul’ a sanna Ijipti tiŋgbɔŋ ŋɔ ni na la nyɛla m bihi. Ifriim mini Manaasa nyɛla m bihi kaman Rubin mini Simiɔn ni nyɛ m bihi shɛm la.

⁶Ka bi’ shɛb’ a ni yɛn dɔɣi ka bɛ doli bɛ nyaaŋa n-yɛn nyɛ a bihi. Bɛ biɛyanim’ maa yuya ka bɛ ti yɛn zaŋ nya bɛ tarili.

⁷ Dama n ni daa yi Mɛsopoteemia labirina saha shɛli, ka Reechɛl daa kpi sol’ ni Keenan tiŋgbɔŋ ni, ka nimaani mini Ɛfirat daa na wɔɣa. Ka n daa sɔɣ’ o Ɛfirat soli maa ni (Bɛtilihɛm m-bala); ka di daa ti ma suhugarigu pam.

⁸Izraɛl ni daa nya Yisifu bihi maa, o daa bɔhimi, “Ka banima n-lee bɔŋɔ?”

⁹Ka o yɛl’ o ba, “M bihi m-bala, Naawuni ni ti ma bi’ shɛb’ ya ŋɔ m-bala.” Ka’ o daa yɛl’ o, “Niŋm’ ania, zaŋm’ ba ti ma na ka n niŋ alibarika niŋ bɛ ni.”

¹⁰Izraɛl ni daa kurigi maa zuɣu daa chɛ ka o nina bi lan ne viɛnyɛliŋga, ka o ni tooi nya. Ka Yisifu daa zaŋ bihi maa mir’ o, ka o daa zaŋ o nuhi bɔb’ gbaai ba n-vooi ba tabil’ omaŋa, ka mɔɣisi bɛ kparima.

¹¹Ka Izraɛl daa lan yɛli Yisifu, “N daa bi tɛhi ni n ni lan nya a ni n nini, amaa ka Naawuni mi ti chɛ ka n nya a bihi gba.”

¹²Di saha ka Yisifu daa kpuɣi bihi maa o naba zuɣu, ka damdi n-zaŋ o zuɣu silim tiŋa.

¹³Ka Yisifu daa zaŋ o nudirigu gbaai Ifriim n-zaŋ o zali tuhi Izraɛl nuzaa, ka zaŋ o nuzaa gbaai Manaasa n-zaŋ o mi zali tuhi Izraɛl nudirigu n-zaŋ ba na ti chɛ ka bɛ damd’ o tooni.

¹⁴Amaa ka Izraɛl daa zaŋ o nuhi puli pa tab’ zuɣu n-zaŋ o nudirigu pa Ifriim ŋun daa nyɛ biasan’ la zuɣu ni, ka zaŋ o nuzaa mi pa Manaasa ŋun daa nyɛ bituuli maa zuɣu ni.

¹⁵Ka o daa niŋ alibarika niŋ Yisifu ni ka yɛli: “Naawuni ŋun nyɛ n yab’ Ibrahimma mini m ba Yisahaku ni daa jɛm so ŋɔ, niŋm’ alibarika niŋ bihi ŋɔ ni! Naawuni ŋun gbib’ ma hal ti paai zuŋɔ dabisili ŋɔ, niŋm’ alibarika niŋ bɛ ni!

¹⁶Malaika so ŋun daa yihi ma yɛl’ biɛri ni la, niŋm’ alibarika niŋ bɛ ni! Naawuni chɛ ka bihi ŋɔ zuɣu ti chɛ ka m mini n yab’ Ibrahimma ni m ba Yisahaku yuya ku kpi! Naawuni tim’ ba bihi pam, ka chɛ ka bɛ zuliya nabi!”

¹⁷Yisifu ni daa nya ka o ba zaŋ o nudirigu pa Ifriim zuɣu ni maa, di daa bi niŋ o nyaɣisim, ka o daa gbaag’ o ba nuu ni o paai li Ifriim zuɣu ni n-zaŋ li pa Manaasa zuɣu ni;

¹⁸ka yɛl’ o, “M ba, pa lala; dama ŋumbɔŋɔ n-nyɛ kpɛma. Zaŋm’ a nudirigu maa pala o zuɣu ni.”

¹⁹Amaa ka o ba daa zaɣisi ka yɛli, “M bia, m mi ni Manaasa gba zuliya ni ti galisi; amaa o tizo ŋɔ ni ti gar’ o, ka o zuliya ni ti galisi pam.”

²⁰ Di saha ka o daa niŋ alibarika niŋ bɛ ni dindali maa ka yɛli, “Izraɛlnim’ yi ti yɛn suhi alibarika, bɛ ni zaŋla yi yuya suhi li. Bɛ ni ti yɛli, ‘Naawuni chɛ ka yi be kaman Ifriim mini Manaasa.’ ” Lala ka o daa niŋ n-zaŋ Ifriim leei toondana ka chɛ Manaasa.

²¹Di saha ka Izraɛl daa yɛli Yisifu, “Di ku lan yuui ka n kpi, amaa Naawuni ni be yi sani, ka ti zaŋ ya labisi yi yaannim’ tiŋgbɔŋ la ni yaha.

²²Ka din pahi nyɛla, n zaŋ n ni daa zaŋ n takɔb’ mini n tɔbu tuhi Amɔrinim’ ka fa bɛ tiŋgban’ shɛli din nyɛ Shɛkɛm la ti a, ka a mabihi la nuu ka di ni.”