Read Dagbani Piligu 49 Bible Online

Piligu 49 - Dagbani bible

Piligu 49

¹Di saha ka Yaakubu daa bol’ o bihi na nti yɛli ba, “Laɣimmiya na ka n ti yɛli ya din ti yɛn niŋ ya dahin’ shɛli ha yɛla.”

²“Yaakubu bidibisi, Laɣimmiya na ti wum. Wummiya yi ba Izraɛl ni yɛn yɛli ya shɛm.

³“Rubin, nyini n-nyɛ m bituuli, nyini n-nyɛ n kpiɔŋ; ka lan nyɛ n dɔtali tuuli bia. A nyɛla toondana ka mali kpiɔŋ pam.

⁴A ŋmanila kom din bi do baalim, a mi ku gari sokam, dama a daa zaŋ a ba paɣ’ dɔni o bindoo zuɣu n-ta li daɣiri. A daa dɔni m bindoo zuɣu.

⁵“Simiɔn mini Lɛvi nyɛla nir’ ni o mabia. Bɛ malila bɛ bidibbina tumdi barina.

⁶N ku zaŋ n nuu kpɛhi bɛ yɛla ni. M mi ku be bɛ laɣiŋgu ni; dama bɛ suhuyiɣisili puuni, bɛ kuri niriba, ka chɛri chihiri naɣilahi jila ni di ti ba suhupiɛlli.

⁷Mbusim be bɛ suhuyiɣisili maa zuɣu, dama di kpɛm’ pam. Mbusim be bɛ sujee zuɣu, dama ninkuunsi be di ni. N ni woligi ba Yaakubu daŋ ni, ka wurim ba kpɛhi Izraɛl tiŋgbɔŋ luɣilikam ni.

⁸“Juda, a mabihi ni ti paɣ’ a. A ni ti zaŋ a nuu gbaag’ a dimnim’ nyiŋgoya ni. A ba bidibisi ni ti damd’ a tooni.

⁹ Juda ŋmanila gbuɣimbila. M bia, a ku a dima, ka ŋmaligi kpe a yiŋa. A teeg’ amaŋ’ dɔni kaman gbuɣinli la. A ŋmanila gbuɣin’ nyaŋ. Ŋuni n-lee ni tooi dam’ a?

¹⁰Nam jaaŋgbee ti ku yi Juda nuu ni. Nam jaaŋgbee mi ti ku yi o zuliya nuu ni hal ka ŋun su li ti kana. Ka niriba ni ti deer’ o noli.

¹¹O zaŋd’ o bumbil’ lɔri wain tia, ka zaŋd’ o bunsaa bia lɔri wain ti’ viɛlli. O zaŋdi wain paɣir’ o situra, ka zaŋdi wain wala kom paɣir’ o binyɛr’ titali.

¹²O ni ti nyu wain ka o nina mɔhi; ka nyu bihim ka o nyina paligi.

¹³“Zɛbulɔn ni ti ʒini n-tabila teeku noli. O kulinoli ni ti nyɛla ŋariŋ’ kara zaashee. O tintariga ti yɛn zaŋmi hal ni Sidɔn.

¹⁴“Isaka ŋmanila bun’ so ŋun mali kpiɔŋ piɛri sunsuuni.

¹⁵O nyaya ka nimaani vuhim shee viɛla, ka di tiŋgbani biɛhigu mali kɔre. Dinzuɣu ka o deei talahi n-tumdi tuma kaman dabili la.

¹⁶“Dan ni ti nyɛla o niriba naa kaman Izraɛl zuliyanim’ ni yino.

¹⁷Dan ni ti ŋmanila sokpaŋ’ tinvurigu. O nyɛla sokpaŋ’ gariŋga ŋun dimdi wɔhu napɔŋkpaa, ka ŋun bar’ o lɛbiri lur’ o kpali zuɣu.

¹⁸“Yawɛ, n guhirila saha shɛli a ni yɛn tiligi ma.

¹⁹“Ŋmɛnditɔya ni ti liri Gaad, amaa o ni ti kari doli ba ti fa bɛ nɛma.

²⁰“Asha tiŋgban’ ni ni ti mali bindir’ suma. O ni ti mali bindir’ shɛŋa di ni simdi ni naa di.

²¹“Naftali ŋmanila walinyaŋ so ŋun gɔr’ o yubu, ka dɔɣi bi’ viɛla.

²²“Yisifu ŋmanila ti’ shɛli din wandi wala, ka nyɛ din ʒe n-tab’ kulibɔŋ, ka di wula zooi yaɣi kuligbiriŋ zuɣu.

²³Peentɔriba ni ti lir’ o, ka di bi viɛla. Bɛ ni ti to o piɛma, ka nahim o pam.

²⁴Amaa o tɔbu ku kabi, ka ti yaannim’ Naawuni ŋun nyɛ kpiɔŋlan’ ŋɔ ni chɛ ka o nuhi mali kpiɔŋ ŋuna ŋun nyɛ Izraɛlnim’ gula, ka yihiri ba barina ni ŋɔ yuli zuɣu.

²⁵A ba Naawuni ni sɔŋ a. Naawuni ŋun nyɛ Kpiɔŋlan’ Naa ŋɔ ni chɛ ka saa mi a. O ni chɛ ka kom yi tiŋgbani puuni na a zuɣu. O ni ti a bihi mini niɣi pam.

²⁶A ba daalibarika mali kpiɔŋ gari zoya din doya sahakam ŋɔ mini kuŋkuna din kul beni sahakam ŋɔ daalibarika. Naawuni chɛ ka o daalibarika ŋɔ zaa be Yisifu ŋun min’ o mabihi daa woligi ŋɔ zuɣu ni, ka be o gbɛɣu zuɣu.

²⁷Bɛnjamin ŋmanila kundun biɛɣu. O gbahiri binyara asiba ni zaawuni ŋubira.”

²⁸Bɛmbɔŋɔ zaa n-nyɛ Izraɛl zuliya pinaayi la. O ni daa yɛli ba shɛm ka niŋ alibarika shɛŋa din simdi bɛ zaa yinoyino niŋ bɛ ni shɛm m-bala.

²⁹Dimbɔŋɔ nyaaŋa ka o daa yɛl’ o bihi maa, “N yɛn chaŋ ti pahila n yaannim’ ni pumpɔŋɔ. Zaŋmiya ma ti sɔɣi siliga din be Ɛfurɔn ŋun nyɛ Hiti nir’ la puu la ni m-pahi n yaannim’ zuɣu.

³⁰ Siliga maa bela Makipɛla pu’ shɛli din be Mamri wulimpuhili polo Keenan tiŋgbɔŋ ni la. Ibrahimma n-daa da siliga maa Ɛfurɔn ŋun nyɛ Hiti nir’ la sani n-leeg’ o dini ni di nyɛ o ni yɛn sɔɣir’ o kpiimba luɣ’ shɛli.

³¹ Nimaani ka bɛ daa sɔɣi Ibrahimma min’ o paɣ’ Zara ni Yisahaku min’ o paɣ’ Ribɛka; ka n gba daa sɔɣi Liya nimaani.

³²Ti daa da puu maa mini siliga din be di ni maa la Hitinim’ sani.”

³³ Yaakubu ni daa tɔɣis’ o bihi maa yɛtɔɣa ŋɔ naai, o daa vuui la o naba pa o bindoo zuɣu dɔni n-leei Naawuni dini pah’ o yaannim’ zuɣu.