Read Dagbani Piligu 7 Bible Online

Piligu 7 - Dagbani bible

Piligu 7

¹Di saha maa ka Yawɛ daa yɛli Nuhu, “A min’ a malibu zaa kpɛm’ ŋariŋ maa ni, dama n nyaya ka nyini n-nyɛ wuntizɔra n sani ʒiɛmani ŋɔ ni.

²Zaŋm’ biŋkɔb’ shɛb’ bɛn be kasi la zaɣ’ lɔri ayopɔin mini zaɣ’ nyama ayopɔin, ka zaŋ biŋkɔb’ shɛb’ bɛn bi be kasi la zaɣ’ lɔɣu mini zaɣ’ nyaŋ,

³ka zaŋ noonsi gba zaɣ’ lɔri ayopɔin mini zaɣ’ nyama ayopɔin niŋ ŋariŋ maa ni n-gbib’ ba ka bɛ birili ku kpihim dunia ŋɔ ni.

⁴Dama zaŋ chaŋ daba ayopɔin dali, n ni chɛ ka saa lu dunia ni na m-mi wuntaŋ’ ni mini yuŋ zaa biɛɣ’ pihinahi n-ku n ni nam binshɛɣukam niŋ tiŋgban’ ni ŋɔ zaa.”

⁵Ka Nuhu daa niŋ Yawɛ ni yɛl’ o ni o niŋ shɛm maa zaa.

⁶Nuhu yuma daa nyɛla yuun’ kɔbisiyɔbu saha shɛli kom ni daa di dunia maa.

⁷ Ka Nuhu min’ o paɣa ni o bidibisi ni bɛ paɣiba daa kpe ŋariŋ maa ni ni bɛ yi kom maa dibu ni.

⁸Ka biŋkɔb’ shɛb’ bɛn be kasi mini biŋkɔb’ shɛb’ bɛn bi be kasi ni noonsi ni binnɛma bɛn gbamdi tiŋ’ zaa bɛba ayiyi, zaɣ’ lɔɣu mini zaɣ’ nyaŋ

⁹daa kpe ŋariŋ maa ni m-pahi Nuhu zuɣu kaman Naawuni ni daa pun yɛli Nuhu shɛm.

¹⁰Daba ayopɔin nyaaŋa ka kokpɛɣu daa kpe m-pali dunia ŋɔ.

¹¹ Nuhu yuun’ kɔbisiyɔbu puuni gol’ so ŋun pah’ ayi biɛɣ’ pinaayopɔin dali, ka tiŋgban’ ni kɔbil’ nin’ kara zaa daa puhigi, ka zuɣusaa sagbana kɔsoya gba yooi.

¹²Ka saa daa luna m-mi wuntaŋ’ ni mini yuŋ biɛɣ’ pihinahi.

¹³Dindali maa ka Nuhu min’ o paɣa ni o bidibisi bɛn yuya daa booni Shɛm mini Ham ni Jafɛt ni o bidibisi maa paɣiba ata la daa kpe ŋariŋ maa ni.

¹⁴Bɛ mini mɔɣu ni biŋkɔbiri balibu kam ni yiŋ’ biŋkɔbiri balibu kam ni biŋgbamda balibu kam ni noonsi balibu kam ni binyiɣira zaa n-daa kpe di ni.

¹⁵Ka binnɛma balibu kam zaa bɛba ayiyi bɛn mali nyɛvili daa kpe ŋariŋ maa ni m-pahi Nuhu zuɣu.

¹⁶Ka binnɛma balibu kam zaa zaɣ’ lɔɣu mini zaɣ’ nyaŋ daa kpe ŋariŋ maa ni kaman Yawɛ ni daa pun yɛli Nuhu shɛm; ka Naawuni daa yo Nuhu niŋ ŋariŋ maa ni.

¹⁷Ka kokpɛɣu din galisi pam maa daa kul kpɛri pahiri hal ti paai biɛɣu pihinahi, ka kom maa kul zoori pahira, ka kpuɣi ŋariŋ maa zuɣusaa, ka di du ka chɛ tiŋgbani.

¹⁸Ka kom maa daa kpe m-pali dunia, ka ŋariŋ maa du m-pa di zuɣu.

¹⁹Ka kom maa daa kpe pam pali dunia hal ka zoya din du pam zaa ti lim.

²⁰Ka kom maa daa zooi lim zoya maa, ka di ziliŋ daa nyɛ mita ayopɔin zoya maa zuɣu.

²¹Ka binnɛɔŋ balibu kam bɛn be dunia ŋɔ ni, noonsi mini yiŋ’ biŋkɔbiri ni mɔɣu ni biŋkɔbiri ni binnɛma balibu kam zaa bɛn be dunia ni zaŋ tabili ninsalinim’ zaa

²²ni binshɛɣukam din mali nyɛvili be dunia ŋɔ ni zaa daa kpi.

²³O daa kpihim binnɛma balibu kam bɛn be dunia ŋɔ ni birili; ninsalinim’ zaŋ tabili biŋkɔbiri ni biŋgbamda ni noonsi zaa bɛn be dunia ŋɔ ni. Kulla Nuhu mini ninvuɣ’ shɛb’ bɛn daa be o sani ŋariŋ maa ni kɔŋko n-daa naɣ’ tiligi.

²⁴Ka kom maa daa kul be lala dunia ŋɔ ni hal ti paai biɛɣ’ kɔbiga ni pihinu.