Read Dagbani 2 Samuɛl 1 Bible Online

2 Samuɛl 1 - Dagbani bible

2 Samuɛl 1

¹Dauda ni daa tuhi Amalɛknim’ maa ka labina Naa Sool kum maa nyaaŋa, o daa kpalimla Zikilag daba ayi.

²Nyama di daba ata dali ka do’ so daa ti yi Sool sansan’ ni n-zo m-paana ka o binyɛra chahi, ka taŋkpaɣu puɣ’ o zuɣu. O ni daa ti paai Dauda sani, o daa lumi gbani Dauda tooni lu o sizuura.

³Ka Dauda daa bɔh’ o, “Ya ka a yina?” Ka o garigi yɛl’ o, “Izraɛlnim’ sansan’ ni ka n yi n-zo na maa.”

⁴Ka Dauda yɛl’ o, “Yɛlim’ ma din niŋ.” Ka o yɛl’ o, “Tɔbbihi maa ŋmaligimi guui, ka bɛ pam lu tɔb’ maa ni, ka Sool min’ o bia Jɔnatan gba lu tɔb’ maa ni.”

⁵Di saha ka Dauda daa bɔhi nachimbil’ so ŋun yɛl’ o li maa, “Wula ka a lee niŋ baŋ ni Sool min’ o bia Jɔnatan lu tɔb’ maa ni?”

⁶Ka nachimbil’ so ŋun daa yɛl’ o li maa yɛli, “Di daa niŋla daliri ka n chaŋ Gilibɔa Zoli zuɣu nti chirigi Sool ka o zaŋ omaŋ’ dalim’ o kpani, ka chɛchɛbunsi mini wɔribariba daa kabiri kani o sanna.

⁷Ka o daa ŋmaligi lih’ o nyaaŋa nya ma ka boli ma, ka n garigi yɛl’ o, ‘N-nyɛ ma.’

⁸Ka o bɔhi n ni nyɛ ninvuɣ’ so, ka n yɛl’ o, ‘N nyɛla Amalɛk nira.’

⁹Ka o yɛli ma, ‘Kamina ti zani baɣili ma n-ku ma, dama n nya daŋ pam, ka m mi shia na bi siɣi.’

¹⁰ Di saha ka n daa chaŋ ti zani baɣil’ o n-ku o, ka pilig’ o zuɣupiligu din be o zuɣu ni, ka lan pirigi baŋ’ din be o nuu ni na, dama n daa baŋya ni o ni lu n-doya shɛm maa, o ku lan gali. Dinzuɣu ka n zaŋ o nɛma maa na ni n ti ti nyini n dana.”

¹¹Di saha ka Dauda daa gbaag’ omaŋmaŋ’ binyɛra n-dar’ chahi li, ka bɛnkam daa be o sani gba daa niŋ lala.

¹²Ka bɛ daa kum ka fabili pam, ka lo noli Sool min’ o bia Jɔnatan ni Yawɛ niriba Izraɛlnim’ zuɣu dindali hal ni zaawuni, bɛ ni daa zaŋ takɔbiri ku ba maa zuɣu.

¹³Ka Dauda daa bɔhi nachimbil’ so ŋun daa yɛl’ o li maa, “Tiŋ’ kani ka a lee yina?” Ka o garigi yɛl’ o, “N nyɛla Amalɛk saan’ so ŋun be a tiŋgbani ŋɔ ni bia.”

¹⁴Ka Dauda bɔh’ o, “Bɔ n-niŋ ka a daa yɛn ku Yawɛ ni pii ninvuɣ’ so maa ka dabiɛm bi mal’ a?”

¹⁵Di saha ka Dauda daa boli nachimba maa ni yino na nti yɛl’ o, “Cham’ ti ku o.” Ka o daa ŋme n-ku o.

¹⁶Ka Dauda yɛl’ o, “A ʒim yihibu taali ʒi a zuɣu, dama amaŋmaŋ’ noli n-di a shɛhira yɛli, ‘Mani n-ku Yawɛ ni pii ninvuɣ’ so maa.’ ”

¹⁷Ka Dauda daa fabili fabila ŋɔ Sool min’ o bia Jɔnatan zuɣu,

¹⁸ ka yɛli ni di simdi ka bɛ wuhi Judanima ni di sabi Jashar litaafi puuni yɛli,

¹⁹Bɛ ku Izraɛl jilima zoya din du pam zuɣu, ka wɔɣira lu.

²⁰Di moliya di yɛla gili Gaat fɔŋ ni; yi mi di moliya di yɛla doli Ashikɛlɔn solɔri, ka di zuɣu chɛ ka Filistia bipuɣinsi yiɣi jam, bee n-chɛ ka bɛn bi gundi ŋɔ bipuɣinsi suhuri paligi.

²¹“Yinim’ Gilibɔa zoya, maligim bee saa ku lan lu yi zuɣu na bee bimbilima ti lan bili yi zolɔna ni. Dama nimaani ka kpiɔŋlaannim’ bidibbina nya filiŋ. Ka Sool nyɔtaɣirigu bi lan nya kpam ʒe.

²²Jɔnatan tɔbu daa ʒi n-lab’ kuli ka pa ni o ni ku ninvuɣ’ shɛb’ ʒim mini kpiɔŋlaannim’ kpam n-varim li. Ka Sool mi takɔbi na ʒi n-chɛ n-ziŋ.

²³Sool mini Jɔnatan, n yurinima bɛn veeni yurilim. Bɛ daa bi woligi taba bɛ nyɛviya ni mini bɛ kum ni. Bɛ daa valim gari tɔrili. Bɛ daa mali kpiɔŋ gari gbuɣima.

²⁴Yinim’ Izraɛl bipuɣinsi, kummiya Sool zuɣu. Ŋuna n-zaŋ mulifu viɛlli soli ya. Ŋuna n-zaŋ salima yɛri yɛli ya.

²⁵Nyam’ kpiɔŋlaannim’ ni lu tɔb’ sunsuuni shɛm! Bɛ ku Jɔnatan sɔŋ zoya zuɣu!

²⁶M mabia Jɔnatan, n suhu saɣimya pam a zuɣu. M min’ a biɛhigu daa lu n-taɣili tab’ pam. A yurilim zaŋ chaŋ n sani daa mali alahiziba, ka galisi pam gari paɣ’ ni mali yurilim shɛm.

²⁷Nyam’ kpiɔŋlaannim’ ni lu tɔb’ sunsuuni shɛm, ka bɛ bidibbina bahi yoli!