Read Dagbani 2 Samuɛl 10 Bible Online

2 Samuɛl 10 - Dagbani bible

2 Samuɛl 10

¹Dimbɔŋɔ nyaaŋa ka Ammɔnnim’ naa daa ti kpi ka o bia Hanun daa di nam zan’ o ba zaani.

²Ka Dauda daa yɛli, “N ni be Hanun Nahash bia ŋɔ yɛlimaŋli biɛhigu kaman o ba ni daa be ma yɛlimaŋli biɛhigu shɛm la.” Dinzuɣu ka o daa tim tuumba ni bɛ chaŋ ti sɔɣi Nahash kuli maa ti o. Ka Dauda tuumba maa daa ti paai Ammɔnnim’ maa tiŋgbɔŋ ni,

³amaa ka Ammɔn nabihi daa yɛli bɛ dan’ Hanun, “A tɛhiya ni Dauda ni tim tuumba na ka bɛ ti sɔɣi kuli maa wuhiri ni yɛlimaŋli biɛhigu ka o be a maa? Dauda timla niriba ŋɔ na ni bɛ ti vihi baŋ yaŋɔ daashili zaa ka tuhi nyaŋ ti.”

⁴Dinzuɣu ka Hanun daa chɛ ka bɛ gbahi Dauda tuumba maa m-pini bɛ zaa teensi pirigilipirigili bahi ka chɛ pirigilipirigili, ka daa lan ŋmahi bɛ binyɛra bɛ sakpuɣa zuɣu bahi ka chɛ ka bɛ chaŋ.

⁵Ka bɛ daa yɛli Dauda, ka o tim ni bɛ ti tuhi ba soli, dama vi daa mali tuumba maa pam. Ka naa daa yɛli ba, “Kpalimmiya be Jɛriko hal ka yi teensi maa ti bili, ka yi naanyi kuna.”

⁶Ammɔnnim’ ni daa baŋ ni bɛ leei Dauda dimnim’ maa, ka bɛ daa chaŋ Sirianim’ tinsi ni Bɛtirɛhɔb mini Zɔba nti da Sirianim’ tɔbbi’ shɛb’ bɛn’ nyɛ tinchandiba tuhi’ pisi, ka Maaka naa daa yina ni tɔbbihi tuhili, ka Tɔbinim’ gba daa yina ni tɔbbihi tuhi’ pinaayi.

⁷Ka Dauda daa wum lala ka chɛ ka Jɔab zaŋ o tɔbbi’ kpɛma zaa chaŋ bɛ tuhibu.

⁸Ka Ammɔnnim’ maa daa yina nti teei zani tiŋ’ maa dunol’ ni, ka Siria tɔbbihi bɛn daa yi Zɔba mini Rɛhɔb ni Tɔb ni Maaka na la mi laɣim ʒe mɔɣu ni mɔɣu ni.

⁹Jɔab ni daa nya ka tɔb’ maa be n-gil’ o tooni ni o nyaaŋa zaa maa, ka o pii Izraɛl tɔbutuhiri’ biinsi ni bɛ chaŋ ti tuhi Sirianim’ maa.

¹⁰Ka o daa zaŋ tɔbbi’ shɛb’ bɛn kpalim maa niŋ o mabia Abishai nuu ni ni bɛ chaŋ ti tuhi Ammɔnnim’ maa.

¹¹Ka o daa yɛli ba, “Yi yi ti nya ka Sirianim’ maa yɛn nyaŋ ma, yin’ zomiya n kuŋa, ka m mi yi ti nya ka Ammɔnnim’ maa yɛn nyaŋ ya, n ni zo yi kuŋa.

¹²Maliya suhukpeeni ka ti zabi ti niriba mini ti Naawuni tinsi ŋɔ zuɣu, ka chɛ ka ŋun’ Yawɛ niŋ o ni nya ka shɛli viɛl’ o sani.”

¹³Di saha ka Jɔab mini ninvuɣ’ shɛb’ bɛn daa be o sani daa vu m-miri ni bɛ ti tuhi Sirianim’ maa, ka bɛ daa ŋmaligi guui.

¹⁴Ammɔnnim’ ni daa nya ka Sirianim’ maa ŋmaligi guui maa, ka bɛ gba daa ŋmaligi Abishai tooni guui ti kpe bɛ tiŋ’ maa puuni. Di saha ka Jɔab daa yi Ammɔnnim’ maa tuhibu yɔɣu n-lab’ Jɛrusalɛm.

¹⁵Amaa Sirianim’ maa ni daa nya ka Izraɛlnim’ tuhi nyaŋ ba maa, ka bɛ laɣim taba.

¹⁶Ka Hadadɛza daa tim ti zaŋ Sirianim’ bɛn be Yufretiiz Mɔɣili dul’ la n-ka Hɛlam na, ka Shɔbak ŋun daa nyɛ Hadadɛza kamɔna’ kpɛm’ la leei bɛ zuɣulana.

¹⁷Ka bɛ daa yɛli Dauda di yɛla, ka o laɣim Izraɛlnim’ zaa ka bɛ chaŋ ti gbaai Jɔɔdɛn Mɔɣili du n-ka Hɛlam na. Ka Sirianim’ maa daa niŋ shili yina ti liri Dauda ka bɛ min’ o zaŋ nya taba.

¹⁸Ka Dauda daa ku ba hal ka bɛ ti ŋmaligi guui. Dauda daa kula Siria chɛchɛbumbariba kɔbisiyopɔin, ka ku wɔribariba mi tuhi’ pihinahi, ka daa ti Shɔbak ŋun daa nyɛ kamɔna’ kpɛm’ maa daŋa, ka o kpi nimaani.

¹⁹Ka na’ shɛb’ zaa bɛn daa be Hadadɛza sulinsi ni nya Izraɛlnim’ ni tuhi nyaŋ ba maa, ka bɛ daa kana ti tim sandaani niŋ Izraɛlnim’ maa ka zaŋ bɛmaŋ’ ti ba. Di saha zaŋ chana ka Sirianim’ maa daa zɔri dabiɛm ni bɛ lan sɔŋ Ammɔnnim’ yaha.