Read Dagbani 2 Samuɛl 12 Bible Online

2 Samuɛl 12 - Dagbani bible

2 Samuɛl 12

¹Ka Yawɛ daa tim Neetan Dauda sani, ka o daa chaŋ ti yɛl’ o, “Niriba ayi n-daa be tin’ shɛli, yino daa nyɛla bundana, ka ŋun’ la mi nyɛ faralana.

²Bundan’ maa daa mali piɛri mini niɣi pam,

³amaa faralan’ maa ŋun’ daa ka shɛli n-naɣ’ pahila piɛsabil’ kɔŋko. O daa dala piɛsaa maa n-wubis’ o ka o zoog’ o min’ o bihi sani; o ni daa diri shɛli, dina ka piɛsaa maa gba daa dira, o kɔnyuri ŋman’ ni ka piɛsaa maa daa nyuri kom, ka o daa zaŋdi piɛsaa maa sɔŋd’ o tooni. O mini piɛsabil’ maa biɛhigu daa ŋmanila omaŋmaŋ’ ni dɔɣi bipuɣimbil’ so.

⁴Ka sana daa ti paai bundana maa, ka o je ni o piig’ o piɛri maa ni bee o niɣi maa yino n-niŋ o saani, amaa ka daa chaŋ ti gbaala faralan’ maa piɛsaa la na nti niŋ o san’ maa saani.”

⁵Di saha ka Dauda suhu daa yiɣisi pam bahi ninvuɣ’ so ŋun niŋ lala maa zuɣu, ka o yɛli Neetan, “Hal ka Yawɛ ŋun be ŋɔ zuɣu, ninvuɣ’ so ŋun niŋ lala maa simdila kubu.

⁶Ka di simdi ka o yo faralan’ maa piɛr’ anahi, o ni tum shɛm maa min’ o ni bi zɔri nambɔɣu la zuɣu.”

⁷Ka Neetan daa yɛli Dauda, “Nyini n-nyɛ lala nir’ maa. Yawɛ ŋun nyɛ Izraɛlnim’ Naawuni ŋɔ ni yɛli shɛm m-bɔŋɔ: ‘Mani n-daa piig’ a leei Izraɛlnim’ naa, ka daa fa a Sool nuu ni bahi,

⁸ka daa zaŋ a dan’ maa yili ti a, ka zaŋ o paɣiba ti a, ka zaŋ Izraɛl mini Juda ti a pahi. Ka dimbɔŋɔ yi di pɔra, n naan ti a din gari lala pahi.

⁹Ka bɔ n-niŋ ka a lihi ʒiɛm man’ Yawɛ yɛligu ka tum zaɣ’ biɛɣu ŋɔ man’ Yawɛ ninni? Nyini n-ku Yuria ŋun nyɛ Hiti nir’ la. Nyini n-daa chɛ ka Ammɔnnim’ zaŋ takɔbi ku o, ka a kpuɣ’ o paɣa n-leeg’ a paɣa.

¹⁰Dinzuɣu pumpɔŋɔ a ni lihi ʒiɛm ma ka kpuɣi Yuria ŋun nyɛ Hiti nir’ la paɣa maa zuɣu, ninvuɣ’ kubo kul ku milig’ a yili ŋɔ.’

¹¹Yawɛ yɛliya, ‘Nyama, n ni chɛ ka zaɣ’ biɛɣu yi a yiŋ’ dundɔŋ ni na n-lu a zuɣu; ka n ti zaŋ a paɣiba ti a ʒiʒiinikpee ka o zaŋ ba dɔni palo ni wuntaŋ’ ni a ninni.

¹² Dama nyin’ daa niŋ li la ashilɔni, amaa man’ yɛn niŋ li la palɔni wuntaŋ’ ni Izraɛlnim’ zaa ninni.’ ”

¹³Ka Dauda daa yɛli Neetan, “N tum alahichi Yawɛ sani.” Ka Neetan garigi yɛl’ o, “Yawɛ chɛ a taali maa, a ku lan kpi.

¹⁴Amaa di zaa yoli, a ni bi lihi nya Yawɛ ka tum tuun’ shɛli ŋɔ zuɣu, paɣ’ maa ni yɛn dɔɣi bi’ so ti a maa ni kpi.”

¹⁵Di nyaaŋa ka Neetan daa yiɣisi kul’ o yiŋa. Ka Yawɛ daa chɛ ka dɔro gbaai Yuria paɣ’ ni dɔɣi bidib’ so ti Dauda maa.

¹⁶Ka Dauda daa lo noli, ka kpe duu nti teei dɔni tiŋgban’ ni suhiri Naawuni bia maa zuɣu din dali maa yuŋ zaa.

¹⁷Ka kpambaliba bɛn daa be o yiŋa kana ti zan’ o sani ni bɛ kpuɣ’ o yiɣisi, amaa ka o bi saɣi bee n-chɛ ka o mini ba laɣim ʒini di bindirigu.

¹⁸Di daba ayopɔin dali ka bia maa daa kpi. Ka kpambaliba maa daa zɔri ni bɛ garigi Dauda o bia maa kuli; dama bɛ daa yɛlimi, “Nyama, bia ŋɔ daa na nɛmi ka ti tɔɣis’ o yɛtɔɣa ka o zaɣisi wumbu la, ka wula ka ti lee yɛn tooi yɛl’ o ni bia maa kpiya? Di pa shɛli ka o ti tum omaŋ’ barina.”

¹⁹Amaa Dauda ni daa nya ka o kpambaliba maa sɔɣiri yɛri tab’ maa ka o baŋ ni bia maa kpiya; ka bɔh’ o kpamba maa, “Bia maa kpiya?” Ka bɛ yɛl’ o, “O kpiya.”

²⁰Di saha ka Dauda daa yiɣisi tiŋgban’ ni n-chaŋ ti su kom ka ʒe kpam, ka taɣi binyɛra ye n-chaŋ ti kpe Yawɛ jɛmbu duu jɛm o. Di nyaaŋa ka o daa yi n-kuli yiŋa nti bɔhi bindirigu yɛla, ka bɛ daa zaŋ bindirigu na ti ti o ka o di.

²¹Di saha ka o kpamba maa daa bɔh’ o, “Wula ka a lee niŋ shɛm maa? Bia maa ni daa na ne, a daa lola noli ka kum o zuɣu pam, amaa ka o ti lee kpi ka a yiɣisi di bindirigu?”

²²Ka Dauda daa garigi yɛli ba, “O ni daa na ne ka n lo noli ka kumd’ o zuɣu maa, n daa yɛlimi, ‘Di pa shɛli Yawɛ ni zo ma nambɔɣu ka chɛ ka o ku kpi.

²³Amaa pumpɔŋɔ o kpiya, ka bɔ zuɣu ka n lee lan yɛn lo noli yaha? N ni tooi lan chɛ ka o labina? Mani n-naɣi ni ti chaŋ o sani, amaa ŋun’ ku lan labi n sanna.’ ”

²⁴Di nyaaŋa ka Dauda daa maag’ o paɣa Batishiiba suhu, ka o min’ o daa lan dɔni ka o dɔɣi bidibiga, ka o bol’ o yuli Sulemaana. Ka Yawɛ daa yur’ o pam,

²⁵ka daa zaŋ o zilinli ti anab’ Neetan ka o kana m-mi ti boli bia maa yuli Jɛdidia;[4] di gbinni nyɛla Yawɛ ni yuri so.

²⁶Di saha maa Jɔab daa na kul tuhirila Ammɔnnim’ bɛ tin’ zuɣu din nyɛ Raba la ni.

²⁷Ka o daa ti tim ti yɛli Dauda, “N tuhi nyaŋ Rabanim’ maa hal ka fa bɛ tin’ shɛli din mali kom la gba.

²⁸Dinzuɣu pumpɔŋɔ laɣimmi ninvuɣ’ shɛb’ bɛn kpalim la na nti tuhi deei tiŋ’ maa amaŋmaŋa, di yi pa lala n yi tuhi deei tiŋ’ maa, bɛ ni zaŋ n yuli bol’ li.”

²⁹Di saha ka Dauda daa laɣim niriba maa zaa chaŋ Raba ti tuhi deei li.

³⁰Ka Dauda daa piligi bɛ naa salima zuɣupiligu o zuɣu ni, ka di tibisim nyɛ kilɔgiram pihitanaanu, ka kuɣ’ viɛlli daa be di ni, ka bɛ daa zaŋ li pili Dauda zuɣu ni, ka o daa va bɛ ni tuhi di neen’ shɛŋa tiŋ’ maa ni pam.

³¹Ka o daa chɛ ka tiŋ’ maa niriba zaŋ suhi din mali nyina mini kuriti kuya ni kuriti lɛri n-tumd’ o tuma, ka ŋmar’ o bilichiisi; lala ka o daa niŋ Ammɔnnim’ tinsi maa zaa. Di nyaaŋa ka Dauda min’ o niriba maa zaa daa lab’ Jɛrusalɛm.