Read Dagbani 2 Samuɛl 13 Bible Online

2 Samuɛl 13 - Dagbani bible

2 Samuɛl 13

¹Dauda bia Absalom daa mali tizɔpaɣ’ viɛlli ka o yuli booni Tama. Dahin shɛli ka Dauda bia Amnɔn kɔre daa ti kpe o ni.

²Ka Amnɔn daa zaŋ di yɛla muɣis’ omaŋ’ hal ti gbaai dɔro o tizɔpaɣ’ Tama maa zuɣu. Dama Tama daa na ʒi doo, ka di zuɣu daa chɛ ka Amnɔn kɔŋ o ni yɛn niŋ o shɛm.

³Amaa Amnɔn daa mal’ o zo so ka o yuli booni Jɔnadab, o daa nyɛla Dauda mabia Shamma dapala, ka daa mali yɛm pam.

⁴Ka Jɔnadab daa bɔhi Amnɔn, “Nabia, bɔ n-niŋ ka a kpalim mali suhugarigu biɛɣukam lala? Yɛlim’ ma din muɣis’ a. Ka Amnɔn daa yɛl’ o, “N kɔre n-kpe m mabia Absalom tizɔpaɣ’ Tama ni.”

⁵Ka Jɔnadab daa yɛli Amnɔn, “Dɔnim’ a garo zuɣu n-niŋ kaman a biɛrimi la, ka a ba yi ti kana ni o ti kaag’ a, nyin’ yɛlim’ o, ‘Chɛ ka n tizɔpaɣ’ Tama kana ti mali bɔrɔbɔro ti ma ka n ŋubi, ka yuun’ o ka o duɣi bindirigu kpe n-zaŋ li na ti gbib’ o nuu ni ka n di.’ ”

⁶Di saha ka Amnɔn daa dɔni n-shiri niŋ kaman o biɛrimi la. Ka naa daa ti kana ni o ti kaag’ o, ka Amnɔn yɛl’ o, “Naa, chɛ ka Tama kana ti mali maha ti ma n ninni, ka zaŋ li na ti gbib’ o nuu ni ka n ŋubi.”

⁷Di saha ka Dauda daa tim ti yɛli Tama, “Cham’ a tizɔdoo Amnɔn yiŋa nti niŋ bindirigu ti o.”

⁸Ka Tama daa chaŋ o tizɔdoo Amnɔn yiŋa ka o ti domi. Ka o daa niŋ zim ŋɔri mahibiɛli m-mali maha o nini maa ni

⁹n-yaai li mahilaa ni ti zal’ o tooni, ka o zaɣisi li ŋubbu, ka yɛl’ o, “Karimi sokam ka bɛ yi ka chɛ ma,” ka bɛ zaa daa yi.

¹⁰Di saha ka Amnɔn daa yɛli Tama, “Zaŋmi bindirigu maa kpɛhi n dugbɛrili puuni nti gbib’ li a nuu ni ka n di.” Ka Tama daa zaŋ o ni mali mahi’ shɛŋa maa kpɛh’ o tizɔdoo Amnɔn dugbɛrili maa ni.

¹¹Amaa o ni daa ti zaŋ li mir’ o na ni o di ka o dii gɔh’ o nuu ni ka yɛl’ o, “N tizɔpaɣa, chɛ ka m min’ a dɔni.”

¹²Ka o daa garigi yɛl’ o, “Aai, m biɛli, di zaŋ kiŋkansi doli ma, dama tuuni ŋɔ na ʒi n-tum Izraɛl tiŋgbɔŋ ŋɔ ni, di tum jɛrilim tuuni ŋɔ.

¹³Ka ya polo ka n lee yɛn zaŋ vi ŋɔ kpe? Ka sokam ni bol’ a jɛrigu Izraɛl tiŋgbɔŋ ni, dinzuɣu jaande, yɛlim’ naa, o ni zaŋ ma ti a.”

¹⁴Amaa ka o daa zaɣisi wumbu. Ka o ni daa mali yaa gari Tama maa zuɣu, ka o zaŋ kpeengarigu dɔn’ o.

¹⁵Di nyaaŋa ka Amnɔn daa kul lan je Tama yɛlli zaa, hal ka o ni daa je o shɛm maa gar’ o ni daa yur’ o shɛm la gba. Di saha ka Amnɔn daa yɛl’ o, “Yiɣisim’ yi.”

¹⁶Amaa ka o daa garigi yɛl’ o, “Aai, m biɛli, a ni kariti ma shɛm ŋɔ n-lee bie n-gari a ni niŋ ma shɛm maa gba.” Amaa ka Amnɔn daa zaɣis’ o yɛligu maa wumbu;

¹⁷ka daa boli nachimbil’ so ŋun daa tumd’ o tuma na ti yɛl’ o, “Zaŋm’ paɣ’ ŋɔ yihi ka kpari dunoli.”

¹⁸Di saha o daa yɛla saalo’ bɔɣiwɔɣila, dama di saha maa nabipuɣinsi bɛn daa na ʒi dɔbba ni daa yi yɛri saalo’ shɛŋa m-bala. Ka o tumtumda maa daa daag’ o yihi ka kpari dunoli.

¹⁹Ka Tama daa niŋ tampiligim buɣ’ o zuɣu ka darigi cheeg’ o ni daa ye saalo’ shɛli maa, ka kah’ o nuhi pa o zuɣu ni n-kuhiri pampam chana.

²⁰Ka o tizɔdoo Absalom daa nya o ka bɔh’ o, “A tizɔdoo Amnɔn zaŋ a mi dɔni yɔɣu?” Ka daa yɛl’ o, “N tizɔpaɣa niŋmi suɣilo, a tizɔdoo m-bala, di chɛ ka di muɣis’ a.” Di saha ka Tama daa leei bɛ ni ku lan bo paɣ’ so, ka o kpalim ʒi o tizɔdoo Absalom yiŋa.

²¹Naa Dauda ni daa wum yɛla ŋɔ zaa o suhu daa yiɣisiya pam.

²²Amaa Absalom daa bi yɛli Amnɔn zaɣ’ biɛɣu bee zaɣ’ viɛlli, dama o daa lan je Amnɔn yɛlli o ni daa zaŋ kiŋkansi niŋ o tizɔpaɣ’ Tama shɛm maa zuɣu.

²³Di yuma ayi nyaaŋa ka Absalom daa ti yɛn chɛ o piɛri kɔbiri Baalihazɔr din mini Ifriim bi wɔɣ’ ni tab’ la, ka daa boli nabihi zaa ni bɛ kana.

²⁴Ka Absalom daa chaŋ naa sani ti yɛl’ o, “Naa nyama, a dabili yɛn chɛla o piɛri kɔbiri, ka bɔri ni naa min’ o kpamba zaa kana.”

²⁵Amaa ka naa daa yɛli Absalom, “Aai, m bia, di chɛ ka ti zaa kana, di yi nyɛ lala, ti yɛla ni ti muɣis’ a pam.” Ka Absalom daa kpaŋ omaŋa ni o chɛ ka o chaŋ, amaa ka o daa zaɣisi, ka naɣ’ suhila alibarika niŋ o ni.

²⁶Di saha ka Absalom daa yɛli naa, “ N suhir’ a mi, a yi ku chaŋ, nyin’ lee chɛ ka ti mini m mabia Amnɔn chaŋ.” Ka naa daa bɔh’ o, “Bɔzuɣu ka a lee bɔri ni yi min’ o chaŋ?”

²⁷Amaa ka Absalom daa kpaŋ omaŋ’ hal ka o ti saɣi ka Amnɔn mini nabihi maa zaa daa dol’ o chaŋ.

²⁸Di saha ka Absalom daa yɛl’ o tumtumdiba, “Lihimiya, yi yi ti nya ka Amnɔn nyu wain kuli ka n yɛli ya, ‘Kumiya Amnɔn,’ yin’ kumiy’ o. Di zɔriya dabiɛm, mani m-puhi ya. Maliya suhukpeeni ka tum bidibilim tuma.”

²⁹Ka Absalom tumtumdiba maa daa shiri niŋ Amnɔn kaman Absalom ni wuhi ba ni bɛ niŋ o shɛm maa. Di saha ka nabihi maa zaa daa dii yiɣisi ba bɛ buntaansi zo.

³⁰Bɛ ni daa na be soli kuna ka lahibali ti nti to Dauda, “Absalom ku nabihi la zaa, hal bɛ yino bi lan kpalim.”

³¹Di saha ka naa daa yiɣisi dari chah’ o binyɛra, ka teei dɔni tiŋgban’ ni ka kpambaliba bɛn daa be o sani gba dari chahi bɛ binyɛra.

³²Amaa ka Dauda mabia Shamma dapala Jɔnadab daa yɛli, “N dana, di tɛhi ni bɛ ku nabihi maa zaa, Amnɔn kɔŋko n-kpi. Absalom n-chɛ ka bɛ ku o, ka dimbɔŋɔ maa nyɛla o ni pun lo shɛli dahin’ shɛli o ni daa zaŋ kiŋkansi dɔn’ o tizɔpaɣa Tama la zuɣu.

³³Dinzuɣu pumpɔŋɔ n dan’ naa, di chɛ ka di muɣis’ a kaman a bihi maa zaa n-shiri kpi la, dama Amnɔn kɔŋko n-kpi.”

³⁴Amaa ka Absalom daa zo. Ka nachimbil’ so ŋun daa guli nayili maa daa ti kpuɣ’ o zuɣu lihi nya niriba pam ni doli Hɔrɔnaim soli m-baɣisiri zoli kanna.

³⁵Ka Jɔnadab daa yɛli naa, “Nyama, nabihi maa kunna kaman mani ŋun nyɛ a dabili ŋɔ ni pun yɛl’ a shɛm la.”

³⁶Nyama, o ni daa kul yɛri maa o noli daa na bi lu tiŋa, ka nabihi maa dii kpɛna nti duhi bɛ yee kumda, ka naa min’ o kpamba zaa gba daa kum pam.

³⁷ Amaa ka Absalom daa zo n-chaŋ Gɛshur Naa Ammihud bia Talimai sani. Ka Naa Dauda daa kul kumd’ o bia Amnɔn zuɣu dabisili kam.

³⁸Ka Absalom daa zo nti be Gɛshur maa yuma ata.

³⁹Ka naa suhu daa ti giri zaŋ chaŋ Amnɔn kum maa polo, o ni daa nya ka o lan kani maa zuɣu, ka o suhu lan yu ni o kari Absalom naba.