Read Dagbani 2 Samuɛl 2 Bible Online

2 Samuɛl 2 - Dagbani bible

2 Samuɛl 2

¹Dimbɔŋɔ nyaaŋa ka Dauda daa bɔhi Yawɛ, “N cham’ Juda tin’ shɛl’ ni ti ʒini?” Ka Yawɛ yɛl’ o, “Chama.” Ka Dauda lan bɔhi, “N cham’ tiŋ’ kani?” Ka o yɛl’ o, “Cham’ Hiburɔn.”

² Di saha ka Dauda daa zaŋ o paɣiba ayi la Ahinɔam ŋun daa yi Jɛziriil na la mini Abigeel Nabal pakoli ŋun mi daa yi Kamɛl na la chaŋ Hiburɔn.

³Ka Dauda daa zaŋ ninvuɣ’ shɛb’ bɛn zaa be o sani mini bɛ malibu na ka bɛ ti ʒini Hiburɔn fɔndi ni.

⁴ Ka Judanim’ daa kana ti booi kpam bahi Dauda zuɣu ni nimaani n-zaŋ o leei Judanim’ naa. Ka bɛ daa yɛli Dauda ni Jabɛshigiliadnima n-daa sɔɣi Sool.

⁵Ka Dauda daa tim tuumba Jabɛshigiliadnim’ maa sani ti yɛli ba, “Yawɛ niŋmi alibarika niŋ yi ni yi ni daa wuhi yi ʒiɛyimtali ni nyɛ shɛm zaŋ chaŋ yi dan’ Naa Sool sani, ka sɔɣ’ o la zuɣu.

⁶Pumpɔŋɔ Yawɛ ni wuhi ya o yurilim min’ o ʒiɛyimtali ni nyɛ shɛm zaŋ chaŋ yi sani; ka man’ gba ni niŋ ya zaɣ’ viɛlli yi ni daa tum tuun’ shɛli maa zuɣu.

⁷Dinzuɣu pumpɔŋɔ kpaŋsimiya yimaŋa ka mali suhukpeeni, dama yi dan’ Sool kpiya ka Judanim’ mi zaŋ ma leei bɛ naa.”

⁸Ka Sool tɔbbihi sapashin’ kpɛm’ Abinɛr ŋun daa nyɛ Nɛr bia la daa zaŋ Sool bia Ishibɔshɛt n-zo chaŋ Mahanaim

⁹nti zaŋ o leei naa ni o su Giliad mini Ashur ni Jɛziriil ni Ifriim ni Bɛnjamin tiŋgbana ni Izraɛl tiŋgbɔŋ zaa.

¹⁰Sool bia Ishibɔshɛt yuma daa nyɛla yuun’ pihinahi saha shɛl’ o ni daa di nam n-su Izraɛlnim’ maa, o daa dila nam maa yuma ayi. Amaa Judanim’ bɛn daa dolila Dauda.

¹¹Saha shɛli Dauda ni daa di nam ʒi Hiburɔn n-su Judanim’ maa yuma daa nyɛla yuma ayopɔin ni chira ayɔbu.

¹²Ka Abinɛr ŋun daa nyɛ Nɛr bia la mini Sool bia Ishibɔshɛt la tɔbbihi daa yi Mahanaim chaŋ Gibiɔn.

¹³Ka Jɔab ŋun daa nyɛ Zɛruya bia la mini Dauda tɔbbihi mi daa yi n-chaŋ ti paai ba Gibiɔn biaŋ ni n-chaŋ ti ʒini biaŋ maa yaɣ’ yini polo ka bɛn’ la mi chaŋ ti ʒini biaŋ maa yaɣ’ din’ la polo.

¹⁴Ka Abinɛr daa yɛli Jɔab, “Chɛ ka nachimba maa yiɣisi diɛm ka ti nya,” Ka Jɔab yɛli, “Chɛ ka bɛ yiɣisi.”

¹⁵Di saha ka bɛ daa yiɣisi kaman bɛ kalinli ni nyɛ shɛm, ka ninvuɣ’ pinaayi daa yi Bɛnjamin mini Ishibɔshɛt Sool bia maa polo na, ka ninvuɣ’ pinaayi mi yi Dauda tɔbbihi maa polo na.

¹⁶Ka bɛ zaa ti gbahi tab’ zuɣuri, ka zaŋ takɔbiri kuhi tab’ puluɣa ni, ka bɛ zaa laɣim lu n-kpi. Dinzuɣu ka bɛ daa boli nimaani Hɛlikatihazurim,[1] ka di be Gibiɔn.

¹⁷Ka nimmoo tɔb’ daa bili dindali maa, ka Naa Dauda tɔbbihi maa daa tuhi nyaŋ Abinɛr mini Izraɛlnim’ maa.

¹⁸Ka Zɛruya bidibis’ ata daa be nimaani, bɛna n-nyɛ Jɔab mini Abishai ni Asahɛl. Asahɛl daa guurimi kaman molifu la.

¹⁹Ka o daa kari doli Abinɛr, o ni daa kariti dol’ o maa, o daa kul sula o gbini ka bi ŋmaligi kpa o nudirigu polo bee nuzaa polo.

²⁰Ka Abinɛr daa ti ŋmaligi lih’ o nyaaŋa nya o ka bɔh’ o, “Asahɛl, nyini m-bala?” Ka o yɛli, “Mani m-bala.”

²¹Ka Abinɛr yɛl’ o, “Ŋmaligim’ a nudirigu bee a nuzaa polo n-gbaai nachimba ŋɔ ni yino n-fa o ni mali shɛli.” Amaa ka Asahɛl bi ŋmaligi ka chɛ o dolibu.

²²Ka Abinɛr ti lan yɛl’ o, “Ŋmaligim’ ka chɛ ma dolibu; bɔ n-niŋ ka a yɛn chɛ ka n ku a? N yi ku a wula ka n lee yɛn niŋ lih’ a biɛli Jɔab ninni?”

²³Amaa ka o daa zaɣisi ni o ku ŋmaligi; dinzuɣu ka Abinɛr daa zaŋ o kpani zuɣu polo to o pul’ ni ka di pili yi o yaaŋa zuɣu, ka o daa lu nimaani kpi. Ka bɛn zaa daa paai Asahɛl ni lu luɣ’ shɛli kpi maa kpalim zani baalim.

²⁴Amaa ka Jɔab mini Abishai bɛn’ daa kari doli Abinɛr, zaŋ chaŋ wuntan’ luhili saha ka bɛ daa paai Amma Zoli din be Gia polo Gibiɔn mɔɣu ni soli zuɣu la gbini.

²⁵Ka Bɛnjamin zuliya niriba daa ti laɣim zaŋ bɛ noya naai Abinɛr ka bɛ min’ o leei zaɣ’ yini n-du zoli maa zuɣu ti zani.

²⁶Ka Abinɛr daa ti kuhi bahi Jɔab ha bɔh’ o, “Ti kul yɛn zaŋla takɔbiri ŋɔ n-kuri tab’ hal ni saha din ka bahigu? A bi mi ni di bahigu ti yɛn nyɛla dimdi din ku naai? Bɔ saha ka a yɛn yɛl’ a niriba maa ka bɛ chɛ bɛ mabihi ŋɔ kari doli?”

²⁷Ka Jɔab daa yɛli, “Hal ka Naawuni ŋun be ŋɔ zuɣu, a yi di bi yɛli shɛli, biɛhiŋ kani, n niriba ŋɔ naan kari doli bɛ mabihi maa hal ni biɛɣuni asiba.”

²⁸Di saha ka Jɔab daa piɛbi kikaa, ka niriba maa kpalim zani ka bi lan kariti doli Izraɛlnim’ maa bee n-lan tuhiri ba.

²⁹Ka Abinɛr min’ o niriba maa daa chaŋ yuŋ maa zaa n-gari Araba ti gbaai Jɔɔdɛn Mɔɣili du, zaŋ chaŋ wuntaŋ’ daa ti yɛn zani zuɣu ni ka bɛ paai Mahanaim.

³⁰Ka Jɔab daa yi Abinɛr karibu maa yɔɣu labina nti laɣim Dauda tɔbbihi maa zali ka bɛ ni ninvuɣ’ pisiyinika daa kani m-pahi Asahɛl zuɣu.

³¹Amaa Dauda tɔbbihi maa bɛn’ daa kula Bɛnjamin zuliya niriba bɛn daa nyɛ Abinɛr tɔbbihi maa ninvuɣ’ kɔbisita ni pihiyɔbu.

³²Ka bɛ daa zaŋ Asahɛl chaŋ Bɛtilihɛm ti sɔɣ’ o o ba siliga din daa be nimaani la puuni. Ka Jɔab min’ o niriba maa daa ŋmaligi doli tab’ yuŋ labi, zaŋ chaŋ biɛɣu daa ti yɛn neei, ka bɛ paai Hiburɔn.