Read Dagbani 2 Samuɛl 21 Bible Online

2 Samuɛl 21 - Dagbani bible

2 Samuɛl 21

¹Dauda ʒiɛman’ maa ni kum daa ti lu yuma ata doli taba. Ka Dauda daa bɔhi Yawɛ ni o baŋ din tahi li. Ka Yawɛ daa yɛl’ o, “Ninsalinim’ ʒim yihibu taali n-ʒi Naa Sool min’ o daŋ zuɣu, dama o daa ku Gibiɔnnima.”

² Ka naa daa boli Gibiɔnnim’ maa na, Gibiɔnnim’ daa pala Izraɛlnima, amaa bɛ daa nyɛla Amɔrinim’ ninvuɣ’ shɛb’ bɛn daa kpalim. Ka Izraɛlnim’ ni daa kul po pɔri ni bɛ ku ku ba la zaa yoli, Sool daa bahi ku ba o ni daa bɔri ni o niŋ Izraɛlnim’ mini Judanim’ yubu la zuɣu.

³Ka Dauda daa bɔhi Gibiɔnnim’ maa, “Bɔ ka n lee yɛn niŋ tin ya? Bee bɔ ka n lee yɛn zaŋ yɔn ya ti ni daa tum ya taal’ shɛli maa samli, ka yi suhi alibarika niŋ Yawɛ ni su shɛli ŋɔ ni?”

⁴Ka Gibiɔnnim’ maa daa yɛli Dauda, Anzinfa bee salima din’ pala din ni mali ti mini Sool ni o zuliya maa yɛlli maa, di mi pala ti bɔrimi ni ti ku Izraɛl ninvuɣ’ so. Ka Dauda daa bɔhi ba, “Ka bɔ ka yi lee bɔri ni n niŋ tin ya?”

⁵Ka bɛ daa yɛli naa “Ninvuɣ’ so ŋun daa ku ti ka lo ni o kpihim ti birili Izraɛl tiŋgbɔŋ ni zaa maa,

⁶chɛ ka bɛ zaŋ o bidibis’ ayopɔin ti ti ka ti zaŋ ba chaŋ Gibiɔn nti ku ba Yawɛ zol’ la zuɣu ŋun’ Yawɛ tooni.” Ka naa daa yɛli, “N ni zaŋ ba tin ya.”

⁷ Amaa naa daa bi saɣi zaŋ Mɛfibɔshɛt ŋun daa nyɛ Jɔnatan bia ka nyɛ Sool yaaŋa la ŋun’ ti ba, ŋun’ Dauda mini Sool bia Jɔnatan ni daa lo tab’ alikauli shɛli Yawɛ tooni la zuɣu.

⁸ Ka naa daa zaŋ Rizipa ŋun daa nyɛ Aiya bipuɣiŋga la bidibis’ ayi shɛb’ o ni daa dɔɣi Sool yiŋa ka bɛ yuya booni Arimɔni ni Mɛfibɔshɛt la mini Sool bipuɣiŋga Mɛrab bidibis’ anu shɛba o ni daa dɔɣi Barizillai ŋun daa nyɛ Mɛholat nir’ la bia Adiriɛl yiŋa la

⁹n-ti Gibiɔnnim’ maa, ka bɛ daa zaŋ ba chaŋ ti ku ba zoli maa zuɣu Yawɛ tooni, ka bɛ niriba ayopɔin maa zaa daa laɣim kpi. Puu atam kpuɣibu saha, kachɛɣu piligu ni ka bɛ daa ku ba maa.

¹⁰Ka Aiya bipuɣiŋga Rizipa maa daa zaŋ kuntu chaŋ ti yɛrigi sɔŋ zoli maa zuɣu n-do nimaani kariti juri wuntaŋ’ ni, ka kariti mɔɣu ni biŋkɔbiri mi yuŋ m-mali lala hal ka saa daa ti mi m-bahi bɛ zuɣu.

¹¹Ka bɛ daa yɛli Dauda Aiya bipuɣiŋga Rizipa ŋun daa nyɛ Sool mam la ni niŋ shɛm maa,

¹² ka ŋun’ Dauda daa chaŋ Jabɛshigiliadnim’ sani nti yihi Sool min’ o bia Jɔnatan kɔba. Bɛna n-daa nyɛ bɛn chaŋ Bɛtishan zama laɣiŋgu palo ni, luɣ’ shɛli Filistianim’ ni daa zaŋ Sool mini Jɔnatan yili la nti sɔɣi yihi ba Filistianim’ ni daa ku Sool Gilibɔa dahin shɛl’ la.

¹³Ka o daa zaŋ Sool min’ o bia Jɔnatan kɔba maa na nti laɣisi bɛ ni ku shɛb’ maa kɔba m-pahi di zuɣu.

¹⁴Ka bɛ daa zaŋ Sool min’ o bia Jɔnatan kɔba maa ti sɔɣi Sool ba Kish siliga ni Zɛla Bɛnjamin tiŋgban’ ni, ka daa niŋ naa ni daa zali ni bɛ niŋm’ shɛlikam zaa. Di nyaaŋa ka Naawuni daa naanyi deei bɛ suhigu bɛ tiŋgbɔŋ maa ni.

¹⁵Ka Filistianim’ daa ti lan lo tɔbu ni bɛ tuhi Izraɛlnima, ka Dauda daa pah’ o tɔbbihi zuɣu ka bɛ chaŋ, ka bɛ mini Filistianim’ maa daa ti tuhi hal ka di ti gbarigi Dauda.

¹⁶Di saha ka Ishibibɛnɔb ŋun daa nyɛ tiyaawumya zuliya, ka o kpani tibisim nyɛ kilɔgiram ata ni pirigili, ka takɔb’ palli lo o sheeni la daa tɛhi ni o ni tooi ku Dauda.

¹⁷ Amaa ka Zɛruya bia Abishai daa kana ti sɔŋ Dauda n-ku Filistia doo maa. Di saha ka Dauda niriba maa daa po pɔri yɛl’ o, “A ku lan doli ti chaŋ tɔb’ ni, di yi pa lala a ni ti chɛ ka Izraɛlnim’ firila kpi.”

¹⁸Dimbɔŋɔ nyaaŋa ka bɛ mini Filistianim’ maa daa ti lan tuhiri tɔbu Gɔb, ka Sibɛkai ŋun daa nyɛ Husha nir’ la daa ku Saf ŋun daa nyɛ tiyaawumyanim’ zuliya ni nir’ la.

¹⁹Ka tɔb’ daa ti lan lu Izraɛlnim’ maa mini Filistianim’ sunsuuni Gɔb yaha, ka Jaariɔrigim ŋun daa nyɛ Bɛtilihɛm nir’ la bia Ɛlhanan gba daa lan ku Goliat ŋun daa nyɛ Gaat nira ka o kpani dɔɣu daa be kaman kpalua dapua la.

²⁰Ka tɔb’ shɛli daa ti lan lu bɛ sunsuuni Gaat, ka wɔɣiri tital’ so daa beni. O daa malila nubih’ ayɔbuyɔbu ni napombih’ ayɔbuyɔbu. Ka di zaa kalinli daa yiɣisi pisinaanahi. O gba daa yila tiyaawumyanim’ maa zuliya ni na.

²¹Ka o daa dihiri Izraɛlnim’ vi, ka Dauda mabia Shimɛi bia Jɔnatan mi daa ku o.

²²Bɛ niriba anahi ŋɔ daa nyɛla bɛn yi Gaat tiyaawumyanim’ la zuliya ni na. Ka Dauda min’ o tɔbbihi maa daa ku bɛ zaa.