Read Dagbani 2 Samuɛl 22 Bible Online

2 Samuɛl 22 - Dagbani bible

2 Samuɛl 22

¹Ka Dauda daa zaŋ yɛtɔɣa ŋɔ n-yili yilli paɣi Yawɛ dahin’ shɛli Yawɛ ni daa fa o o dimnim’ zaa nuu ni bahi, ka lan fa o Sool gba nuu ni bahi la nyaaŋa.

²O daa yɛliya, “Yawɛ n-nyɛ n tampiŋ ni m birini ni ŋun fari ma bahira.

³N Naawuni, n tampiŋ, n ni sɔɣiri so sani. N nyɔtaɣirigu mini kpiɔŋlana ŋun tiligi ma. M birini mini n sɔɣisili shee, nyini n-nyɛ n tiligira ŋun tiligiri ma barina ni.

⁴N daa kuhi boli Yawɛ ŋun simdi paɣibu ŋɔ, ka tiligi n dimnim’ nuu ni.

⁵Kum kɔgbana daa gili ma niŋ sunsuuni, ka bahi yoli kɔgbana liri ma.

⁶Kpiimba biɛhigu shee mihi daa vili ma gbibi, ka kum zana daa do n tooni.

⁷N daa kuhi boli Yawɛ n nandahima puuni. N Naawuni ka n daa boli maa. Ka o daa be o jɛmbu duu puuni ka wum n kukoli; ka n kuhigu maa daa lu o tiba ni.

⁸Di saha ka tiŋgbani daa sɔhigi ka dam; ka zuɣusaa tanzahi daa sɔhigi ka dam o suhuyiɣisili zuɣu.

⁹Ka nyɔhi daa yir’ o nyɛvoya ni na, ka buɣimniɛm din diri binyɛra yir’ o nol’ ni na; ka sala buɣimniɛm yir’ o sanna.

¹⁰O daa chɛ ka sagbana bɔɣi ka o siɣina; ka zibisim titali be o naba tiŋli.

¹¹O daa ba chɛrubi yiɣi; ka bɛ daa nya o ka o bela pɔhim ni chana.

¹²O daa zaŋ zibisim din gil’ o leeg’ o sampaa, ka sagban’ tibisa leeg’ o kom dooshee.

¹³Ka sala buɣimniɛm yiri neesim shɛli din be o sani maa ni na.

¹⁴Yawɛ daa be alizanda ni ka tahi bahina, ka bɛ daa wum Zallakudura Naa kukoli.

¹⁵Ka o daa to piɛma n-wurim ba bahi; ka chɛ ka saa nyaɣisi niŋ ba ka bɛ ŋmaligi guui.

¹⁶Ka niriba nya teeku puuni kɔsoya, ka dunia ni tam tanza’ shɛŋa zuɣu yi zahira Yawɛ tahigu mini pɔhim shɛli din yiri o nyɛvoya ni na vuri zuɣu.

¹⁷Ka o daa teeg’ o nuu zuɣusaa ha n-tirina gbaai ma n-vooi ma yihi kom pam puuni na.

¹⁸O daa fa ma n dim’ ŋun nyɛ yaalan’ nuu ni bahi, ka tiligi ma bɛn je ma nuu ni, dama bɛ daa gari ma yaa.

¹⁹Nandahima ni daa mali ma dahin’ shɛli, ka bɛ daa kana ti liri ma; amaa ka Yawɛ daa nyɛ ŋun guli ma.

²⁰O daa zaŋ ma zali pal’ tital’ ni. O daa tiligi ma, dama o nini daa tiɣi ma.

²¹Yawɛ daa ti ma laara n wuntitali zuɣu; o yo ma samli n ni ka galimi zuɣu.

²²Dama n daa doli Yawɛ zaligunima, ka daa bi tum ninvuɣ’ biɛtali tuma ŋ-ŋmaligi ka chɛ ŋuna ŋun nyɛ n Naawuni maa.

²³N daa kul dolila o zaligu shɛŋa din pahi zaa, ka bi birig’ o zaligunim’ maa shɛli.

²⁴N daa ka galimi o sani, dama n daa bi tum taal’ shɛli.

²⁵Dinzuɣu ka Yawɛ ti ma laara n wuntitali mini m biɛrisuntali zaŋ chaŋ o sani zuɣu.

²⁶Ninvuɣ’ shɛb’ bɛn ʒe a yim, a gba ʒe ba la yim; ka ninvuɣ’ so ŋun ka galimi, a wuhir’ o a gba ni ka galimi shɛm.

²⁷Ninvuɣ’ shɛb’ bɛn be kasi, a wuhiri ba ni a gba bela kasi, ka ninvuɣ’ shɛb’ bɛn mi nyɛ ninvuɣ’ biɛri, a wuhiri ba a ninkuunsi ni nyɛ shɛm.

²⁸A tiligiri tarimba, ka pa nina lihiri karimbaannima ni a filim ba.

²⁹Yɛlimaŋli, Yawɛ, nyini n-nyɛ n firila, Yawɛ tiri ma neesim n zibisim ni.

³⁰Yɛlimaŋli, a zuɣu n ni tooi nyaŋ ninvuɣ’ gbaliŋ. N Naawuni zuɣu, n ni tooi kpahi yaɣi gooni.

³¹Naawuni ŋɔ soli nyɛla din be tibi. Yawɛ daalikauli niŋdi pali. O nyɛla nyɔtaɣirigu n-taɣiri ninvuɣ’ shɛb’ bɛn zaa zɔr’ kpɛr’ o yuli.

³²Dama ŋuni n-lee lan nyɛ Naawuni ka pa ni nyini Yawɛ? Ka ŋuni n-lee lan nyɛ tampiŋ ka pa ni ti Naawuni ŋɔ?

³³Naawuni ŋɔ n-nyɛ n sɔɣibu shee din mali kpiɔŋ; ka chɛ ka barina shɛli ka n soli zuɣu.

³⁴ O chɛ ka n naba ŋmanila naba anahilan’ nyaaŋa naba, ka chɛ ka m be zoya zuɣu chana ka barina shɛli kani.

³⁵O wuhi n nuhi tɔbu tuhibu; ka di chɛ ka n ni tooi zaŋ n nuhi dahim daanya tɔbu.

³⁶Nyini n-ti ma a tiliginsim nyɔtaɣirigu; ka a sɔŋsim chɛ ka n lee wɔɣirili.

³⁷Nyini n-daa ti ma pal’ yɛlinli ka n yaari n naba chana, ka n naba daa bi sarigi.

³⁸N daa kari doli n dimnima nti ku ba, ka n daa bi ŋmaligi labi n nyaaŋa hal ka ti naai bɛ balibu zaa.

³⁹N daa to ba la kpani ka di pili yi, ka bɛ lu n naba ni ka kɔŋ yiɣisibu, ka n ku bɛ zaa.

⁴⁰Dama nyini n-daa ti ma kpiɔŋ ni n tuhi tɔbu. Nyini n-daa chɛ ka n no n dimnim’ firi tiŋa.

⁴¹Nyini n-daa chɛ ka n dimnim’ ŋmaligi guui ka chɛ ma, ka chɛ ka n ku bɛn je ma la.

⁴²Bɛ daa lihiya, amaa ka so daa kani ŋun ni tiligi ba. Bɛ daa fabili niŋ Yawɛ, amaa ka o daa bi garigi ba.

⁴³N daa bu n-nuɣisi ba kaman taŋkpa’ zim la. N daa burisi ba ka no n-taai ba kaman soli zuɣu batibati la.

⁴⁴Nyini n-daa fa ma m mini ninvuɣ’ shɛb’ bɛn zabiri nuu ni bahi. Nyini n-zaŋ ma leei zuliya bɔbili zuɣulana; ka n ni daa bi mi ninvuɣ’ shɛb’ zaa jɛmdi ma mi.

⁴⁵Tinzunnim’ kanna ti damdiri ma la tiŋa. Bɛ yi kul wum ka n yɛli shɛlikam, bɛ deerila n noli.

⁴⁶Dabiɛm gbahi tinzunnima, ka bɛ yiri bɛ ni me birini gili bɛ tiŋ’ shɛŋa ni n-kani n sanna, ka bɛ ni sɔhira.

⁴⁷Yawɛ nyɛla ŋun be, ŋun nyɛ n tampiŋ ŋɔ mali alibarika, Tibigimiya n Naawuni ŋun nyɛ n tiliginsim tampiŋ ŋɔ.

⁴⁸Naawuni n-nyɛ ŋun daa bɔhi biɛri ti ma, ka zaŋ niriba ti ma ni n su ba.

⁴⁹Nyini n-nyɛ ŋun daa yihi ma n dimnim’ nuu ni. Nyini n-daa duhi ma gari n dimnima. Nyini n-daa fa ma ninvuɣ’ shɛb’ bɛn taai duŋ nuu ni bahi.

⁵⁰ Yawɛ, n ni paɣ’ a dimbɔŋɔ zuɣu zuliya bɔbili sunsuuni; ka yili yila paɣ’ a yuli.

⁵¹O ti o naa nasara pam, ka wuh’ o yurilim ni galisi shɛm zaŋ chaŋ o ninvuɣ’ gahindili Dauda min’ o zuliya sani hal ni saha din ka bahigu.”