Read Dagbani 2 Samuɛl 24 Bible Online

2 Samuɛl 24 - Dagbani bible

2 Samuɛl 24

¹Ka Yawɛ suhu daa ti lan yiɣisi bahi Izraɛlnim’ zuɣu, ka o piɛli Dauda bahi bɛ zuɣu ka yɛl’ o, “Cham’ ti kali Izraɛlnim’ mini Judanima.”

²Di saha ka naa daa yɛli Jɔab min’ o sapashin’ kpamba bɛn daa be o sani la, “Chamiya gili Izraɛl zuliyanim’ zaa ni, zaŋ Dan hal ti kpa Bɛrishiiba n-kali niriba maa ka m-baŋ bɛ kalinli ni nyɛ shɛm.”

³Amaa ka Jɔab daa yɛl’ o, “Yawɛ ŋun nyɛ a Naawuni ŋɔ ni chɛ ka niriba maa galisi kaman ʒii bukɔbiga zuɣu pahi, ka chɛ ka n dan’ naa nini nya li, ka bɔzuɣu ka nyin’ n dan’ naa lan bɔr’ ni a niŋ dimbɔŋɔ yaha?”

⁴Amaa ka naa yɛligu maa daa ŋme n-kpihim Jɔab min’ o sapashin’ kpamba dini. Di saha ka Jɔab mini sapashin’ kpamba maa daa yiɣisi naa sani yi n-chaŋ ni bɛ ti kali Izraɛlnim’ maa.

⁵Ka bɛ daa chaŋ ti gbaai Jɔɔdɛn Mɔɣili du n-chaŋ ti piligi Aroa mini fɔn’ tin’ shɛli din daa be vinvamli sunsuuni zaŋ kpa Gaad din be Jaza polo la.

⁶Di nyaaŋa ka bɛ daa chaŋ Giliad mini Kadɛshi din be Hitinim’ tiŋgbɔŋ ni la nti yi nimaani chaŋ Dan n-yi Dan zaŋ goligi Sidɔn polo

⁷n-chaŋ Taai birini la mini Hivinim’ ni Keenannim’ tinsi zaa ni. Ka bɛ daa lan yi nimaani chaŋ Nɛgɛb din be Juda tiŋgban’ ni Bɛrishiiba polo la.

⁸Dinzuɣu chira awɛi ni biɛɣ’ pisi ka bɛ daa zaŋ gili tiŋgbɔŋ maa ni zaa ka labi Jɛrusalɛm.

⁹Ka Jɔab daa zaŋ niriba maa kalinli ni nyɛ shɛm ti ti naa. Izraɛl tiŋgban’ ni, dɔbba bɛn daa naan tooi chaŋ tɔbu kalinli daa nyɛla ninvuɣ’ tuhi’ kɔbisinii. Ka Juda tiŋgban’ ni mi nyɛ ninvuɣ’ tuhi’ kɔbisinu.

¹⁰Amaa bɛ ni daa kali niriba maa naai nyaaŋa ka Dauda suhu daa saɣim pam, ka o yɛli Yawɛ, “N tum alahichi n ni niŋ shɛm maa zuɣu. Amaa pumpɔŋɔ, Yawɛ, n suhir’ a mi, kpihimi man’ ŋun nyɛ a dabili ŋɔ daalahichi maa; dama n tum jɛrilim pam.”

¹¹Ka Dauda daa yiɣisi biɛɣ’ asiba, ka Yawɛ daa zaŋ o yɛligu ti anab’ Gaad ŋun daa nyɛ Dauda daanab’ la n-yɛl’ o,

¹²“Cham’ ti yɛli Dauda ni man’ Yawɛ yɛliya ni bini diba ata ka n zal’ o, ni o piimi di ni zaɣ’ yini ka n niŋ li ti o.”

¹³Ka Gaad daa kana ti yɛli Dauda ka bɔh’ o, “A lee bɔri ni kum n-lu a zuɣu a tiŋgbɔŋ ŋɔ ni yuma ata bee a bɔr’ ni a dimnim’ kar’ a kpɛhi yɔɣu n-dol’ a chira ata bee a bɔr’ ni alɔbo lu a tiŋgbɔŋ ŋɔ ni daba ata? Pumpɔŋɔ tɛhimi ka yɛli ma n ni yɛn lab’ ti yɛli ŋun tim ma na maa shɛm.”

¹⁴Ka Dauda daa yɛli Gaad, Nandahima gbaai ma pam. Chɛ ka ti kpalimla Yawɛ nuu ni, dama o nambɔzɔbo galisiya. Amaa di chɛ ka n kpalim ninsalinim’ nuu ni.

¹⁵Ka Yawɛ daa chɛ ka alɔbo lu Izraɛl tiŋgbɔŋ maa ni asiba m-mal’ lala hal ti paai saha shɛl’ o ni daa zal’ li. Ka ninvuɣ’ shɛb’ bɛn daa kpi Dan zaŋ ti kpa Bɛrishiiba kalinli daa nyɛla ninvuɣ’ tuhi’ pisopɔin.

¹⁶Ka malaika maa daa teeg’ o nuu kpa Jɛrusalɛm polo ni o bahi li yoli, ka Yawɛ daa taɣ’ o tɛha zaŋ chaŋ tuumbiɛɣu maa polo, ka yɛli malaika so ŋun daa tumdi alɔbo tuma maa, “Di saɣiya, zaŋm’ a nuu siɣisi tiŋa.” Yawɛ malaika maa daa bela Aruna ŋun daa nyɛ Jɛbusi nir’ la kabɔɣili ni.

¹⁷Dauda ni daa nya ka malaika maa kuri niriba maa, di saha ka o daa yɛli Yawɛ, “Nyama, n tum taali, Mani n-tum zaɣ’ biɛɣ’ maa, ka bɔ ka piɛri ŋɔ mi lee niŋ? Dinzuɣu n suhir’ a mi, darigim’ la m mini n daŋ niriba kɔŋko tibili.”

¹⁸Ka Gaad daa ka Dauda sanna dindali maa ti yɛl’ o, “Cham’ Aruna Jɛbusi nir’ la kabɔɣili la ni ti me sara maligu bimbini ti Yawɛ nimaani.”

¹⁹Ka Dauda daa wum Gaad yɛligu maa ka chaŋ kaman Yawɛ ni daa zal’ o shɛm maa.

²⁰Ka Aruna daa ti lihi nya Naa Dauda min’ o kpamba ni kani o sanna, ka o daa tuhi ba soli ti lu naa sizuura n-damdi zaŋ o zuɣu silim tiŋa

²¹ka yɛli, “Ka bɔ n-niŋ ka n dan’ naa ti kani man’ ŋun nyɛ o dabili ŋɔ sanna?” Ka Dauda yɛl’ o, “N yɛn dala a kabɔɣili ŋɔ m-me sara maligu bimbini ti Yawɛ, ka di chɛ ka o vuug’ alɔbo ŋɔ ka chɛ niriba maa.”

²²Ka Aruna daa yɛli Dauda, “N dana, zaŋmi li tum a ni nya ka shɛli viɛl’ a sani. Naɣikɔra m-bɔŋɔ, a ni tooi kɔri ba nyo buɣim mali sara, bɛ nyiŋgoya ni dapuhi mini kaburi dari din ni mali buɣim mi m-bɔŋɔ.

²³Naa, mani Aruna zaŋ dimbɔŋɔ zaa ti a.” Ka Aruna daa lan yɛli naa, “Yawɛ ŋun nyɛ a Naawuni ŋɔ ni deeg’ a suhigu maa.”

²⁴Amaa ka naa daa yɛli; “Aai, di simdi ni n da li kaman di liɣiri ni nyɛ shɛm, dama n ku zaŋ n ni bi da binshɛli n-nyo buɣim mali sara ti Yawɛ ŋun nyɛ n Naawuni ŋɔ.” Ka Dauda daa da kabɔɣili maa mini naɣikɔra maa anzinfa laɣibaligu pihinu.

²⁵Ka Dauda daa me sara maligu bimbini nimaani m-mali suhudoo sara maligu mini bɛ ni zaŋdi sara shɛli nyɔri buɣim la ti Yawɛ, ka Yawɛ daa wum bɛ ni suh’ o Izraɛl tiŋgbani maa zuɣu shɛm maa, ka vuug’ alɔbo maa ka chɛ Izraɛlnima.