Read Dagbani 2 Samuɛl 8 Bible Online

2 Samuɛl 8 - Dagbani bible

2 Samuɛl 8

¹Dimbɔŋɔ nyaaŋa, ka Dauda daa chaŋ ti tuhi nyaŋ Filistianima, ka bɛ nini baligi ka o deei Mɛtɛgama bɛ nuu ni.

²Ka o daa lan chaŋ ti tuhi nyaŋ Mɔabnima, ka chɛ ka bɛ dɔni tiŋa m-pie taba ʒii buta zuɣu, ka o chɛ ka bɛ ku ʒii buyi zuɣu niriba zaa ka chɛ yim zuɣu niriba. Ka Mɔabnim’ maa daa leei Dauda daba, ka yɔri farigu o sani.

³Ka Dauda daa lan chaŋ ti tuhi nyaŋ Hadadɛza ŋun daa nyɛ Rɛhɔb bia ka nyɛ Zɔba naa la, saha shɛli ŋun Hadadɛza ni daa chaŋ ni o ti tuhi deei Yufretiiz Mɔɣili polo la.

⁴Ka Dauda daa gbahi wɔribariba tuhili ni kɔbisiyopɔin mini tɔbbihi bɛn chani tiŋa tuhi’ pisi; ka daa yihi chɛchɛbunsi kɔbiga yuri zali ka chɛ n-chihi wɔr’ shɛb’ bɛn kpalim zaa jila.

⁵Ka Sirianim’ bɛn daa yi Damaskus na ni bɛ ti sɔŋ Hadadɛza ŋun daa nyɛ Zɔba naa maa, ka Dauda daa lu bɛ zuɣu n-ku bɛ ninvuɣ’ tuhi’ pisinaayi.

⁶Di saha ka Dauda daa tahi tɔbbihi ti ʒili Damaskus ka Sirianim’ maa daa leei Dauda ni su shɛba, ka bɛ yɔri farigu o sani. Ka Yawɛ daa chɛ ka Dauda kul diri nasara o ni chaŋ luɣ’ shɛlikam.

⁷Ka Dauda daa fa Hadadɛza sapashin’ kpamba ni daa mali salima nyɔtaɣiri’ shɛŋa n-zaŋ li kuli Jɛrusalɛm.

⁸Ka Naa Dauda daa lan kpuɣi daanya pam Bɛta mini Bɛrɔtai din daa nyɛ Hadadɛza ni su fɔntin’ shɛŋa la ni.

⁹Ka Tɔi ŋun daa nyɛ Hamat naa daa wum ni Dauda tuhi nyaŋ Hadadɛza min’ o tɔbbihi zaa;

¹⁰ka o daa tim o bia Jɔram ni o cham’ ti puhi Naa Dauda ni o zuɣusuŋ, o ni daa tuhi nyaŋ Hadadɛza ka di nasara maa zuɣu. Dama ŋun’ Tɔi mini Hadadɛza daa kul tuhirila tab’ waawaayili. Ka Jɔram daa zaŋ pina din nyɛ salima mini anzinfa ni daanya n-chaŋ ti ti Naa Dauda.

¹¹Ka Naa Dauda daa zaŋ o ni daa tuhi nyaŋ zuliya shɛb’ zaa ka va anzinfa mini salim’ shɛŋa la pahi di zuɣu ti Yawɛ.

¹²O daa fa li la Ɛdomnim’ mini Mɔabnim’ ni Ammɔnnim’ ni Filistianim’ ni Amalɛknim’ sani, ni o ni daa tuhi nyaŋ Hadadɛza Rɛhɔb bia ŋun daa nyɛ Zɔba naa la ka di neen’ shɛŋa la zaa.

¹³Ka Dauda daa chaŋ ti ku Ɛdomnim’ ninvuɣ’ tuhi’ pisaayika Yalim vinvamli ni ka labina, ka o yuli daa maan du pam.

¹⁴Ka o daa tahi tɔbbihi ti ʒili Ɛdom; o daa ʒili tɔbbihi Ɛdom tiŋgbɔŋ ni luɣilikam. Ka Ɛdomnim’ maa zaa daa leei ŋun’ Dauda ni su shɛba. Ka Yawɛ daa kul tiri Dauda nasara luɣ’ shɛlikam zaa o ni chaŋ.

¹⁵Dauda ni daa su Izraɛlnim’ zaa shɛm m-bala. O daa zaŋla yɛlimaŋli mini fukumsi zaligu dolibu gbib’ o niriba zaa.

¹⁶Ka Zɛruya bia Jɔab la daa su tɔbbihi fukumsi ka Jɛhɔshafat Ahilud bia la nyɛ gbansabira wulana.

¹⁷Ka Ahitub bia Zadok mini Abiata bia Ahimɛlɛk nyɛ maligumaaniba, ka Sɛraya nyɛ gbansabira.

¹⁸Ka Jɛhɔiada bia Bɛnaaya su tɔbbi’ shɛb’ bɛ ni daa booni Chɛrɛtinim’ mini Pɛlɛtinim’ la fukumsi. Ka Dauda bidibisi gba daa nyɛ maligumaaniba.