Read Dagbani 2 Samuɛl 9 Bible Online

2 Samuɛl 9 - Dagbani bible

2 Samuɛl 9

¹ Dahin shɛli ka Dauda daa ti bɔhi, “Sool daŋ ni ninvuɣ’ so na beni ka n ni niŋ o nirilim Jɔnatan zuɣu?”

²Ka ninvuɣ’ so ŋun daa nyɛ Sool tumtumda ka o yuli booni Ziba la daa be nimaani, ka bɛ daa bol’ o ti Naa Dauda ka o ti bɔh’ o, “Nyini n-nyɛ Ziba?” Ka o garigi yɛli’, “Naa, mani.”

³ Ka naa daa bɔh’ o “So na be Sool daŋ ni ka n ni niŋ o nirilim kaman Naawuni ni bɔri shɛm?” Ka Ziba daa yɛli naa, “Jɔnatan bidibiga na beni, o mi nyɛla gbarigu.”

⁴Ka naa bɔh’ o, “O be ya?” Ka Ziba daa yɛli naa, “O be Ammiɛl bia Makiri la yiŋa Lɔdɛba.”

⁵Di saha ka Naa Dauda daa chɛ ka bɛ chaŋ Lɔdɛba Ammiɛl bia Makiri maa yiŋ’ ti zaŋ o na.

⁶Ka Sool yaaŋa Mɛfibɔshɛt ŋun daa nyɛ Jɔnatan bia maa daa ka Naa Dauda sanna nti lu n-gbani Dauda tooni lu o sizuura. Ka Dauda bol’ o, “Mɛfibɔshɛt.” Ka o garigi yɛli, “N-nyɛ mani ŋun nyɛ a dabili maa.”

⁷Ka Dauda daa yɛl’ o, “Di zɔri dabiɛm, dama n ni niŋ a nirilim a ba Jɔnatan zuɣu, ka zaŋ a yab’ Sool ni daa su tiŋgban’ shɛli zaa ti a, ka lan chɛ ka m min’ a laɣindi ʒiini diri sahakam.”

⁸Ka o daa lan lu Dauda sizuura ka yɛli, “Ka mani ŋun nyɛ a dabili ŋɔ mi lee nyɛ ŋuni, ka a ti lihi nya mani ŋun nyɛ ba’ kpiŋ ŋɔ lala”

⁹Di saha ka naa daa boli Ziba ŋun daa nyɛ Sool tumtumda la na ti yɛl’ o, “Sool min’ o daŋ zaa ni daa su shɛlikam zaa n ni zaŋ li ti a dan’ yaaŋa ŋɔ.

¹⁰Ka a min’ a bihi ni a tumtumdiba zaa yɛn kɔrila o yaaŋa ŋɔ puri din ni chɛ ka a dan’ yaaŋa maa nyari bindirigu dira. Amaa m min’ a dan’ yaaŋa Mɛfibɔshɛt n-yɛn laɣindi diri sahakam.” Ziba daa malila bidibisi pinaanu ni tumtumdiba pisi.

¹¹Di saha ka Ziba daa yɛli naa, “N dana, mani ŋun nyɛ a dabili ŋɔ ni niŋ a ni yɛli ni n niŋ shɛlikam maa zaa.” Ka Mɛfibɔshɛt mini Dauda daa kul laɣindi timdi diri kaman naa maŋmaŋ’ bidibisi ni yino n-nyɛ o la.

¹²Mɛfibɔshɛt dapala daa nyɛla bidibbil’ sariŋga ka o yuli booni Maika, ka ninvuɣ’ shɛb’ bɛn zaa daa be Ziba yiŋa daa leei Mɛfibɔshɛt tumtumdiba.

¹³Ka Mɛfibɔshɛt daa kul be Jɛrusalɛm, ka o mini naa daa kul laɣindi ʒiini diri sahakam. O daa nyɛla gbarigu.