Read Dagbani 1 Nanima 10 Bible Online

1 Nanima 10 - Dagbani bible

1 Nanima 10

¹Shiiba naa ŋun nyɛ paɣa daa wum Sulemaana yɛla zaŋ chaŋ Yawɛ jɛmbu polo, ka kana nti bɔh’ o bɔhigu shɛŋa din kpɛma ni o buɣis’ o nya.

²O daa ʒila niriba pam pahi laakumnim’ bɛn ʒiri tulaale zim mini salima pam ni kuɣ’ viɛla n-ka Jɛrusalɛm na. O ni daa paai Sulemaana sani, o daa yɛl’ o din be o suhu ni zaa.

³Ka Sulemaana daa garigi paɣ’ maa ni bɔh’ o bɔhigu shɛŋa zaa; ka shɛli daa kani ka naa kɔŋ li kahigi wuh’ o.

⁴Ka Shiiba naa ŋun nyɛ paɣ’ maa ni daa nya Sulemaana yɛm tuma maa zaa min’ o ni daa me yil’ shɛl’ la

⁵ni o ni daa diri bindir’ shɛŋa ni o kpambaliba ni ʒiini shɛm ni nayili bihi ni jɛmd’ o shɛm ni bɛ situra ni bɛn kpuɣir’ o bindirigu min’ o binnyura na ti tir’ o ni sara maligu shɛŋa o ni daa maani n-zaŋdi nyɔri buɣim Yawɛ jɛmbu duu la, ka di gar’ o pam ka o liɣi ʒiya.

⁶Di nyaaŋa ka o daa yɛli naa, “N ni daa be n ya ka wum a yɛla ni a yɛm yɛla shɛm shiri nyɛla yɛlimaŋli,

⁷amaa n daa bi niŋ n ni wum shɛm maa yɛda hal ti kana ka mmaŋmaŋ’ nini ti dii nya li ŋɔ. Nyama, hal bɛ ni daa yɛli ma di yɛla shɛm bi paai di pirigili gba. A yɛm min’ a tɔŋbu yɛla gari n ni wum di yɛla shɛm.

⁸A paɣiba ni mali suhupiɛlli! Ka a nayili bihi bɛn kul ʒiini a tooni wumd’ a yɛm yɛtɔɣa ŋɔ gba mali suhupiɛlli!

⁹Yawɛ ŋun nyɛ a Naawuni ŋun nini tiɣ’ a, ka zaŋ a ʒili Izraɛl nam ʒiishee ŋɔ simdi paɣibu. Yawɛ ni kul yuri Izraɛlnim’ saha shɛlikam la zuɣu ka o piig’ a leei bɛ naa ni a doli yɛlimaŋli mini wuntia soli su ba.”

¹⁰ Di saha ka o daa zaŋ pin’ shɛŋa o ni ʒina ka di nyɛ salima din tibisim gari kilɔgiram tusaanahi mini tulaale pam ni kuɣ’ viɛla ti naa. Ka so n-daa bi ti Naa Sulemaana tulaale ka di galisi paai Shiiba naa ŋun nyɛ paɣ’ maa ni daa ti o tulaale shɛli maa.

¹¹Ka Naa Hiram ŋariŋ shɛli din daa chaŋ Ofiri nti ʒi salima la na daa lan ʒi alimug dari pam mini kuɣ’ viɛla gba n-yi Ofiri maa na.

¹²Ka naa daa zaŋ alimug dari maa sa n-tuɣi tab’ gili Yawɛ jɛmbu duu min’ o yil’ la, ka zaŋ shɛli m-mali mɔɣilɔnim’ mini goonjɛnima n-ti baansi; ka so m-bi lan nya alimug dari maa tatabo hal ni zuŋɔ.

¹³Ka Sulemaana daa ti Shiiba naa ŋun nyɛ paɣ’ maa o ni daa suh’ o shɛlikam m-pahi ŋun’ Naa Sulemaana ni daa pun niŋ o nirilim ti o pin’ shɛŋa zuɣu. Di nyaaŋa ka o min’ o niriba daa lab’ kul o ya Shiiba.

¹⁴Sulemaana daa nyarila salima din tibisim nyɛ kaman kilɔgiram tuhi’ pisinaata yuun’ yini puuni

¹⁵m-pah’ o ni daa deeri salima shɛli daabihi mini kɔhigɔriba ni Areebia tiŋgbɔŋ ni nanim’ zaa ni Izraɛl tiŋgbɔŋ ni gomnanim’ san’ la zuɣu.

¹⁶Ka Naa Sulemaana daa chɛ ka bɛ zaŋ salim’ zim mali nyɔtaɣirisi zaɣ’ yɛlima kɔbisiyi. Ka bɛ ni daa zaŋ salim’ paɣila mali di zaɣ’ yini kam tibisim daa nyɛ kaman kilɔgiram ayopɔin.

¹⁷Ka o daa ti lan chɛ ka bɛ zaŋ salim’ zim mali nyɔtaɣirisi kɔbisita. Ka bɛ ni daa zaŋ salim’ zim shɛli mali di zaɣ’ yini kam tibisim daa nyɛ kaman kilɔgiram ayi. Ka naa daa zaŋ li niŋ Lɛbanɔn Nyɔŋ ni Yil’ la ni.

¹⁸Ka naa daa lan chɛ ka bɛ zaŋ wɔbinyina m-mali nam ʒiishee zaɣ’ titali, ka chɛ ka bɛ dooi salima din nyɛ zaɣ’ viɛlli zaa m-pa di zuɣu.

¹⁹Nam ʒiishee maa daa malila dunɔdura ayɔbu, ka bɛ mali gbuɣima pinaayi kɔtomsi n-tamtam dunɔdura maa yaɣ’ ayi maa zaa naŋgbaŋgbirima zuɣu; ka mali naɣilaa zuɣu kɔtomsi tabili nam ʒiishee maa nyaaŋa polo. Ka di kuɣ’ maa mali nuhi pabu shee, ka bɛ mali gbuɣima kɔtomsi tabili nuhi pabu shee maa. Ka nam ʒiishee maa tatabo daa ka nam tin’ shɛli ni.

²¹Naa Sulemaana kɔnyuri kopunim’ min’ o binnyura kopunim’ zaa daa nyɛla bɛ ni zaŋ salima mali shɛŋa. Hal Lɛbanɔn tiŋgbɔŋ ni Nyɔŋ puuni Yil’ la gba puuni kopunim’ zaa daa nyɛla bɛ ni zaŋ salima din nyɛ alali mali shɛŋa. Ka bɛ daa bi zaŋ anzinfa mali di shɛli, dama Sulemaana ʒiɛmani maa ni, bɛ daa bi lihi anzinfa ka di nyɛ shɛli.

²²Naa daa malila ŋariŋ shɛŋa din yi Tarishish na m-pahi Hiram ŋarima zuɣu ka di be teeku ni, ka nyɛ din zɔri pam. Ka ŋarima din daa yi Tarishish na maa daa yi ʒirila salima mini anzinfa ni wɔbinyina ni kpara ni noon’ shɛb’ bɛn ŋmani tɔrotɔronim’[6] na.

²³Naa Sulemaana daa nyɛla bundana ni yɛndana n-gari dunia ŋɔ ni nanim’ zaa.

²⁴Ka dunia ŋɔ salinim’ zaa daa bɔri ni bɛ ka Sulemaana sanna nti wum Naawuni ni ti o yɛm shɛli maa yɛtɔɣa.

²⁵Ka ninvuɣ’ shɛb’ bɛn daa kanna maa zaa daa yi ʒirila bɛ pina din nyɛ anzinfa mini salima ni kpariti ni mɛɛr ni tulaale ni yuri ni buntaansi na ti tir’ o yuuni kam.

²⁶ Sulemaana daa laɣim chɛchɛbunsi mini wɔribariba. O daa malila chɛchɛbunsi tuhili ni kɔbisinahi mini wɔribariba tuhi’ pinaayi, ka daa zaŋ chɛchɛbunsi maa shɛŋa zali tin’ shɛŋa ni, ka zaŋ di shɛŋa mi zali Jɛrusalɛm ŋun’ naa sani.

²⁷ Naa daa chɛ ka anzinfa kul yɛrigila Jɛrusalɛm kaman kuɣa la, ka chɛ ka sida dari gba yɛrigi nimaani kaman Shɛfɛla sinsabisi la.

²⁸ Sulemaana daa dari yuri la Ijipti mini Silisia.[7] O kɔhigɔriba n-daa dari ba Silisia na kaman bɛ daa ni nyɛ shɛm.

²⁹Bɛ daa dari chɛchɛbunsi Ijipti la anzinfa laɣibaligu kɔbisiyɔbu; ka dari yuri mi anzinfa laɣibaligu kɔbiga ni pihinu. Ka naa kɔhigɔriba maa mi daa mali yuri maa n-tomdi kɔhiri Hitinim’ mini Siria nanim’ zaa zuɣu.