Read Dagbani 1 Nanima 11 Bible Online

1 Nanima 11 - Dagbani bible

1 Nanima 11

¹ Naa Sulemaana daa yuri tinzun paɣiba pam. O ni daa kpuɣi Ijipti Firawuna bipuɣiŋga la nyaaŋa, o daa lan kpuɣi Mɔab paɣiba mini Ammɔn paɣiba ni Hiti paɣiba ni Sidɔn paɣiba ni Ɛdom paɣiba

² bɛn nyɛ zuliya shɛb’ Yawɛ ni daa pun yɛli Izraɛlnima “Miriya ka yi kpuɣi bɛ bipuɣinsi n-niŋ yi paɣiba bee n-chɛ ka bɛ gba kpuɣi yi bipuɣinsi n-niŋ bɛ paɣiba; dama biɛhiŋ kani, bɛ ni ti ŋmaligi yi suhuri labisi bɛ buɣa jɛmbu polo.” Amaa ka Sulemaana ŋun’ daa yu ba pam.

³O daa malila paɣiba kɔbisiyopɔin bɛn nyɛ nabipuɣinsi, ka mali mamanim’ mi kɔbisita; ka o paɣiba maa daa ti chɛ ka o birigi.

⁴Saha shɛli Sulemaana ni daa ti kurigi, o paɣiba maa daa shiri ŋmalig’ o suhu n-labisi buɣa jɛmbu polo; ka o daa bi lan doli Yawɛ ŋun nyɛ o Naawuni ŋɔ o suhu ni ni yɛlimaŋli kaman o ba Dauda la.

⁵Dama Sulemaana daa ŋmaligi dolila Sidɔnnim’ buɣili Asitati din nyɛ paɣ’ la mini Ammɔnnim’ buɣili Milikom din nyɛ daɣiri la.

⁶Sulemaana daa tum din nyɛ alahichi Yawɛ sani, ka daa bi lan doli Yawɛ viɛnyɛliŋga kaman o ba Dauda la.

⁷Ka Sulemaana daa me Mɔabnim’ buɣili Chɛmɔshi din nyɛ daɣiri la jɛmbu shee mini Ammɔnnim’ buɣili Molɛk din nyɛ daɣiri la jɛmbu shee zali Jɛrusalɛm wulimpuhili polo zoli zuɣu.

⁸Lala ka o daa me buɣa jɛmbu shee ti o tinzun paɣiba la zaa, ka bɛ daa kɔriti biŋkɔbiri m-maani bɛ buɣa maa, ka tuɣindi li tulaale zim.

⁹Yawɛ ŋun nyɛ Izraɛlnim’ Naawuni ŋɔ ni daa ka o sanna siɣimsiɣim buyi nti yɛl’ o ni o miri ka o jɛm buɣa la zaa yoli; Sulemaana daa zaɣisi Yawɛ noli ka ŋmaligi ka chɛ o jɛmbu. Ka Yawɛ daa je suli niŋ Sulemaana,

¹¹ka yɛl’ o, “Di ni nyɛ a suhuyubu ni ka a zaɣis’ a ni daa lo ma alikauli shɛl’ la mini n ni daa zal’ a zaligu shɛŋa la dolibu zuɣu, n ni deeg’ a nam maa n-zaŋ li ti a kpambal’ so.

¹²Amaa a ba Dauda zuɣu, n ku niŋ li a ʒiɛmani ŋɔ ni, n ni ti darigi deei nam maa la a bia nuu ni.

¹³Amaa n ti ku darigi deei nam maa zaa o nuu ni, dama n ni ti zaŋ zuliya yini ti a bia maa n dabili Dauda mini Jɛrusalɛm din nyɛ n ni pii shɛli leegi n tiŋ’ la zuɣu.”

¹⁴Di saha ka Yawɛ daa chɛ ka Hadad ŋun daa nyɛ Ɛdom nabia la leei Sulemaana dima n-yiɣisi lu o zuɣu.

¹⁵Dama saha shɛli Dauda ni daa be Ɛdom la, ka Jɔab ŋun daa nyɛ o sapashin’ kpɛm’ la daa chaŋ nimaani ni o ti sɔɣi bɛ ni daa ku ninvuɣ’ shɛba,

¹⁶ka o daa ku doo kam ŋun be Ɛdom (dama Jɔab mini Izraɛlnim’ zaa daa niŋla chira ayɔbu nimaani, hal ka o ti ku doo kam ŋun be Ɛdom);

¹⁷amaa ka Hadad min’ o ba tumtumdiba shɛb’ bɛn daa nyɛ Ɛdomnim’ la shɛba daa tiligi n-zo n-kuli Ijipti. (Di saha maa Hadad daa na nyɛla bia.)

¹⁸Bɛ daa yila Midian chaŋ Paran ti zaŋ ninvuɣ’ shɛba m-pahi bɛmaŋ’ zuɣu, ka bɛ mini ba zo n-kuli Ijipti nti chaŋ Ijipti naa Firawuna sani. Ka naa maa daa ti Hadad yili mini tiŋgbani ni bindirigu.

¹⁹Ka Firawuna suhu daa yu Hadad pam hal ka o ti gbaag’ o paɣ’ Tapɛnis tizo n-ti o paɣ’ pini.

²⁰Ka paɣ’ maa daa dɔɣi bidibiga n-ti Hadad, ka bɛ bol’ o yuli Gɛnubat, ka napaɣ’ maa daa wums’ o nayili maa; ka bia maa mini Firawuna bidibisi daa laɣim be nayili maa.

²¹Amaa ka Hadad daa be Ijipti maa ka ti wum ni Dauda min’ o sapashin’ kpɛm’ Jɔab zaa kpiya, ka o daa yɛli Firawuna, “Tim ma soli ka n lab’ kuli n ya.”

²²Ka Firawuna daa bɔh’ o, “Bɔ m-poog’ a n sani ka a bɔri ni a kul’ a ya pumpɔŋɔ?” Ka Hadad yɛl’ o, “Kul chɛ ka n kuli.”

²³Ka Naawuni daa lan chɛ ka Ɛliada bia Rɛzɔn ŋun daa zo o lan’ Zɔba Naa Hadadɛza san’ la leei Sulemaana dima.

²⁴Ka o daa laɣim ninvuɣ’ yoya pah’ omaŋ’ zuɣu n-leei bɛ salo maa zuɣulana. Dauda ni daa ku o dimnim’ Sirianim’ la nyaaŋa ka dimbɔŋɔ daa niŋ maa. Ka Rɛzɔn min’ o niriba maa daa chaŋ ti ʒini Damaskus, ka bɛ daa zaŋ o leei Damaskus naa.

²⁵Rɛzɔn daa nyɛla Izraɛlnim’ dima Naa Sulemaana ʒiɛman’ ni, ka daa tumdi ba din bie kaman Hadad ni daa niŋdi ba shɛm la; ka daa zaɣisi Izraɛlnima, ka di nam su Sirianima.

²⁶Ka Nɛbat bia Jɛrɔbɔam ŋun daa nyɛ Ifriim zuliya ni nir’ ŋun yi Zɛrɛda na, ka nyɛ Sulemaana kpambala, ka o ma nyɛ pako’ so ŋun yuli daa booni Zɛrua la gba daa leei naa dima.

²⁷Ka daliri din chɛ ka o daa leei Naa Sulemaana dim’ maa m-bɔŋɔ: Sulemaana daa mɛla Millo gooni ŋari foliŋga din daa be o ba Dauda tiŋ’ la ni la.

²⁸Jɛrɔbɔam daa nyɛla nachimbil’ so ŋun mali kpiɔŋ, ka Sulemaana daa kpahim nya o ni nyɛ tumtumdi’ biiŋa maa, ka zaŋ o leei Yisifu zuliya niriba tuun’ kpɛma zaa zuɣulana.

²⁹Di saha maa ka Jɛrɔbɔam daa ti yi Jɛrusalɛm chana, ka anabi Ahija ŋun daa nyɛ Shilo nir’ la chirig’ o sol’ ni. Anabi Ahija daa yɛla binyɛr’ palli; ka bɛ niriba ayi maa kɔŋko daa be mɔɣu maa ni chana.

³⁰Ka Ahija daa ti gbaag’ o ni ye binyɛr’ shɛli maa n-dari tɔhi li zaɣ’ tolima pinaayi,

³¹ka yɛli Jɛrɔbɔam, “Piim’ di ni zaɣ’ tolima pia, dama Yawɛ ŋun nyɛ Izraɛlnim’ Naawuni ŋɔ yɛliya, ‘Nyama, n dari tɔhila Izraɛl nam Sulemaana nuu ni,

³²ka zaŋ zuliya pia ti a, ka zaŋ zuliya yini n-ti o n dabili Dauda mini Jɛrusalɛm din nyɛ n ni pii tin’ shɛli Izraɛl tiŋgbɔŋ zaa ni la zuɣu.

³³Ka di nyɛla o ni zaɣisi ma ka jɛmdila Sidɔnnim’ buɣili Asitati din nyɛ paɣ’ la mini Mɔabnim’ buɣili Chɛmɔshi ni Ammɔnnim’ buɣili Milikom, ka bi doli n soya n-tumdi din tuhi n sani ni n zaligunim’ mini n kaya kaman o ba Dauda ni daa niŋdi shɛm la zuɣu.

³⁴Dimbɔŋɔ zaa yoli, n ku deei nam maa zaa o nuu ni, n ni chɛ ka o kul nyɛ naa hal ni o nyɛvili tariga n dabili Dauda ŋun nyɛ n ni daa pii so ka o doli n zalikpana mini n zaligu shɛŋa din pahi la zuɣu.

³⁵Amaa n ni ti deei nam maa o bia nuu ni n-zaŋ li ti nyin’ ŋun su zuliya pia ŋɔ.

³⁶Amaa n ni ti zaŋ zuliya yini n-ti o bia maa, ka di chɛ ka n dabili Dauda zuliya kul diri nam Jɛrusalɛm din nyɛ n ni pii tin’ shɛli leei n jɛmbu shee la.

³⁷N ni zaŋ a leei Izraɛl naa, ka chɛ ka a su a suhu ni bɔri tiŋgbani shɛm tariga zaa.

³⁸Ka a yi ni doli n ni zal’ a zaligu shɛŋa zaa, ka doli n soya ka niŋdi din tuhi n sani, ka doli n zalikpana mini n zaligu shɛŋa din pahi kaman n dabili Dauda ni daa niŋ shɛm la, n ni be a sani, ka chɛ ka a zuliya yɛligi kaman n ni daa chɛ ka Dauda zuliya yɛligi shɛm la, ka n zaŋ Izraɛl ti a.

³⁹Ka n ni darigi Dauda zuliya tibili, amaa m bi yɛn darigi li hal ni saha din ka bahigu.’ ”

⁴⁰Ka Sulemaana daa ti lo nia ni o ku Jɛrɔbɔam, amaa ka Jɛrɔbɔam daa zo n-kuli Ijipti Naa Shishak sani nti be Ijipti maa hal ka Sulemaana ti kpi.

⁴¹Sulemaana ni daa pun tum tuun’ shɛŋa zaa min’ o ni daa tum tuun’ shɛŋa din pahi ni o yɛm tuma la yɛla sab’ be Sulemaana tuma litaafi ni.

⁴²Sulemaana daa di nam m-be Jɛrusalɛm n-su Izraɛlnim’ zaa la yuun’ pihinahi.

⁴³Ka Sulemaana daa ti vuhi ka bɛ zaŋ o ti sɔɣ’ o ba Dauda tiŋ’ la ni; ka o bia Rɛhɔbɔam daa di nam zan’ o zaashee.