Read Dagbani 1 Nanima 12 Bible Online

1 Nanima 12 - Dagbani bible

1 Nanima 12

¹Di saha ka Rɛhɔbɔam daa chaŋ Shɛkɛm, dama nimaani ka Izraɛlnim’ zaa daa laɣim ni bɛ leeg’ o nam.

²Ka Nɛbat bia Jɛrɔbɔam ŋun daa zo n-kuli Ijipti ni o yi Naa Sulemaana nuu ni ka o ku paag’ o ku o la daa wum di yɛla, ka yi Ijipti maa kuna.

³Ka Izraɛlnim’ maa daa tim ti boli Jɛrɔbɔam na, ka Jɛrɔbɔam mini Izraɛlnim’ maa zaa ti chaŋ Rɛhɔbɔam sani ti yɛl’ o,

⁴“A ba daa ʒil’ ti ʒi’ tibisili pam, dinzuɣu pumpɔŋɔ, filimm’ a ba ni daa chɛ ka ti tumdi tuun’ kpeen’ shɛŋa la, ka lan filim o ni daa ʒil’ ti ʒitibisi’ shɛl’ la; ka ti jɛm a.”

⁵Ka o yɛli ba, “Kulimiya ka labina dabisi’ shɛli din pahir’ ata dali.” Ka niriba maa daa kuli.

⁶Di saha ka Naa Rɛhɔbɔam daa mali ninkur’ shɛb’ bɛn daa pun ʒiini o ba Sulemaana tooni o ni daa na be o nyɛvil’ ni saha shɛl’ la saawara ka bɔhi ba, “Yi lee tɛhiya ni di simdi ni n yɛli niriba maa la wula?”

⁷Ka bɛ yɛl’ o, “A yi ni jɛm niriba maa zuŋɔ, ka zaŋ zilin’ balli yɛtɔɣa n-tɔɣisi ba, bɛ ni jɛmd’ a sahakam.”

⁸Amaa ka o daa zaɣisi ninkura maa yɛligu maa wumbu, ka dolila o bipalitab’ bɛn min’ o laɣim zooi ka bɛ be o san’ la yɛligu.

⁹O daa bɔh’ o bipalitab’ maa mi, “Yi lee tɛhiya ni wula ka di simdi ni ti yɛli niriba bɛn yɛli ma, ‘Filimmi ʒi’ tibisi’ shɛl’ a ba ni daa ʒil’ ti la’? ”

¹⁰Ka o bipalitab’ bɛn min’ o daa laɣim zooi maa yɛl’ o, “Di ni simdi ni a yɛli ninvuɣ’ shɛb’ bɛn yɛl’ a, ‘A ba daa ʒil’ ti ʒi’ tibisa pam, amaa nyin’ filimmi li ti ti la’ shɛm m-bɔŋɔ, yɛlim’ ba, ‘Man’ nubil’ kpaliŋga bari gari m ba shee!

¹¹M ba daa ʒili ya ʒi’ tibisili, amaa pumpɔŋɔ man’ yɛn maan pahi li la tibisim. M ba daa malila barazim fiɛbiri ya, amaa man’ yɛn zaŋla nɔnsi fiɛb’ ya!’ ”

¹²Ka dabisi’ shɛli din pahir’ ata maa dali daa ti paai, ka Jɛrɔbɔam mini niriba maa zaa ka Rɛhɔbɔam sanna kaman o ni daa pun yɛli ba ni bɛ labina dabisi’ shɛli din pahir’ ata dali shɛm la.

¹³Ka naa daa zaɣisi ninkura la yɛligu la, ka zaŋla halibiɛɣu yɛtɔɣa n-tɔɣisi niriba maa.

¹⁴O daa zaŋla o bipalitab’ la ni daa yɛl’ o shɛm la yɛli ba. O daa yɛli ba mi, “M ba daa ʒili ya ʒi’ tibisili, amaa man’ maan yɛn pahi li la tibisim. M ba daa malila barazim fiɛbiri ya, amaa nɔnsi ka man’ yɛn zaŋ fiɛb’ ya.”

¹⁵Yawɛ ni daa chɛ ka Ahija ŋun nyɛ Shilo nir’ la yɛli Nɛbat bia Jɛrɔbɔam shɛm la palibu zuɣu n-daa chɛ ka Rɛhɔbɔam bi saɣi ti niriba maa.

¹⁶ Izraɛlnim’ ni daa nya ka naa zaɣisi bɛ ni yɛli shɛm maa ka bɛ daa yɛli, “Ti malila tarili Dauda yilinim’ sani? Ti mi bi diri Jɛsi bia fali. Dinzuɣu Izraɛlnima, Kulimiya yi yinsi. Dauda yilinim’ lihim’ bɛmaŋ’ yɛla.” Ka Izraɛlnim’ daa ŋmaligi kuli.

¹⁷Ka Rɛhɔbɔam daa sula Izraɛlnim’ shɛb’ bɛn daa be Juda tinsi ni la kɔŋko.

¹⁸Ka Naa Rɛhɔbɔam daa ti tim Adɔram ŋun daa su o tuun’ kpɛma tumbu fukumsi la Izraɛlnim’ sani, ka Izraɛlnim’ zaa daa pihi kuɣa lab’ ku o. Ka Naa Rɛhɔbɔam daa niŋ yomyom kpe o chɛchɛbuŋ’ lɔɣu ni n-zo kuli Jɛrusalɛm.

¹⁹Dinzuɣu n-chɛ ka Izraɛlnim’ na kul mali duŋ ni Dauda yilinim’ hal ni zuŋɔ.

²⁰Ka Izraɛlnim’ zaa ni daa ti wum ni Jɛrɔbɔam kuna, ka bɛ daa laɣim ka tim ti bol’ o na nti zaŋ o leei Izraɛlnim’ zaa naa. Dinzuɣu Juda zuliya niriba la kɔŋko n-daa doli Dauda yilinim’ maa, amaa ka bɛn kpalim la zaa daa zaɣisi ba dolibu.

²¹Rɛhɔbɔam ni daa paai Jɛrusalɛm, o daa laɣimla Juda mini Bɛnjamin zuliya niriba tɔbbihi tuhi’ kɔbiga ni tusaanii ni bɛ chaŋ ti tuhi Izraɛlnima n-fa nam maa ti ŋun’ Naa Sulemaana bia Rɛhɔbɔam.

²²Amaa ka Naawuni daa yɛli anabi Shɛmaya,

²³“Yɛlim’ Naa Rɛhɔbɔam ŋun nyɛ Sulemaana bia ka nyɛ Juda naa la mini Juda zuliya niriba ni Bɛnjamin zuliya niriba zaa ni man’ Yawɛ yɛliya,

²⁴‘Di chaŋya ti tuhi Izraɛlnim’ bɛn nyɛ yi mabihi maa. Labimiya kuli, n sani ka din niŋ maa yina.’ ” Ka bɛ daa wum Yawɛ ni yɛli shɛm maa ka lab’ kuli kaman Yawɛ ni daa shiri yɛli ba shɛm maa.

²⁵Di saha ka Jɛrɔbɔam daa mali Shɛkɛm din be Ifriim zuliya niriba tiŋgban’ ni zoya ni la me m-be nimaani; ka daa ti lan yi nimaani n-chaŋ ti me Pɛnuɛl.

²⁶Jɛrɔbɔam daa yɛlila o suhu ni, “N yi bi baŋ, nam ŋɔ ni bahi lab’ Dauda daŋ niriba ŋɔ sani.

²⁷Niriba ŋɔ yi chani Jɛrusalɛm ti maani sara Yawɛ jɛmbu duu, bɛ suhuri ni ti ŋmaligi kpa bɛ dan’ Rɛhɔbɔam ŋun nyɛ Juda naa la polo; ka bɛ ku ma, ka ŋmaligi labi Rɛhɔbɔam ŋun nyɛ Juda naa maa polo.”

²⁸ Ka naa maa daa mali saawara, ka zaŋ salima mali naɣilabih’ ayi zali; ka yɛli niriba maa, “Yi chani Jɛrusalɛm ka di saha wɔɣa. Izraɛlnima, nyamiya yi buɣa bɛn daa yihi ya Ijipti tiŋgbɔŋ ni na la.”

²⁹Ka o daa zaŋ salima naɣibil’ yino zali Bɛtɛl, ka zaŋ yino mi zali Dan.

³⁰Ka niriba maa daa chani Bɛtɛl ti jɛmdi salima naɣibil’ din be nimaani la; ka shɛb’ mi chani hal Dan nti jɛmdi salima naɣibil’ ŋun’ la. Ka niriba maa ni daa niŋ shɛm maa leeg’ alahichi.

³¹Ka Jɛrɔbɔam daa lan me duri zali buɣa jɛmbu shee, ka pii niriba maa ni shɛb’ bɛn pa Lɛvi zuliya n-leei maligumaaniba.

³²Ka Jɛrɔbɔam daa zali chuɣu puhibu gol’ so ŋun pahir’ anii la biɛɣ’ pinaanu dali, ka di be kaman bɛ ni daa puhiri chu’ shɛli Juda tiŋgbɔŋ ni la; ka o daa kɔri biŋkɔbiri mali sara, sara maligu bimbini zuɣu. O daa lan niŋ lala Bɛtɛl gba n-kɔri biŋkɔbiri mali salima naɣilabihi shɛba o ni daa mali zal’ la. Ka o daa lan bo tindaannim’ zali Bɛtɛl luɣ’ shɛŋa zaa o ni daa me buɣa zali.

³³ Ka o daa ti chaŋ bimbin’ shɛli o ni daa me n-zali Bɛtɛl la gbini gol’ so ŋun pahir’ anii biɛɣ’ pinaanu dali din nyɛ omaŋmaŋ’ ni daa zali dabisi’ shɛli la ni o ti tuɣili tulaale zim o ni daa zali chu’ shɛli n-ti Izraɛlnim’ la puhibu dali.