Read Dagbani 1 Nanima 14 Bible Online

1 Nanima 14 - Dagbani bible

1 Nanima 14

¹Di saha maa ka dɔro daa gbaai naa bia Abija.

²Ka Jɛrɔbɔam daa yɛl’ o paɣa, “Yiɣisima n-taɣ’ a biɛhigu ka so ku baŋ ni a nyɛla Jɛrɔbɔam paɣa n-chaŋ Shilo Anabi Ahija ni be luɣ’ shɛl’ la. Nyama, Anabi Ahija ŋun daa yɛli ma ni n ni leei Izraɛlnim’ naa la be nimaani.

³Ʒim’ bɔrɔbɔro kpil’ pia mini maha ni shi’ luɣuluɣu n-chaŋ o sani, o ni ti yɛl’ a din yɛn niŋ bia maa.”

⁴Ka Jɛrɔbɔam paɣ’ maa daa shiri niŋ lala n-yiɣisi chaŋ Shilo nti chaŋ Ahija yiŋa. Di saha maa Ahija ni daa kurigi zuɣu daa chɛ ka o nina niŋla liti ka o bi lan tooi nyari viɛnyɛliŋga.

⁵Ka Yawɛ daa yɛli Ahija, “Nyama, Naa Jɛrɔbɔam paɣ’ kanna ni o ti bɔh’ a nya din yɛn niŋ o bia ŋun ka alaafee. A ni ti yɛn yɛl’ o shɛm m-bɔŋɔ:” O ni daa ti paai, o daa taɣila o biɛhigu ni o be kaman paɣ’ so la.

⁶Amaa o ni daa ti kul kpɛri ha m-be dunol’ ni, ka Ahija wum o naba vubu ka yɛli, “Jɛrɔbɔam paɣa, kpɛmina; bɔ n-niŋ ka a taɣ’ a biɛhigu ni a be kaman paɣ’ so la. M mali yɛtɔɣ’ kpɛma ni n yɛl’ a.

⁷Cham’ ti yɛli Jɛrɔbɔam ni Yawɛ ŋun nyɛ Izraɛlnim’ Naawuni ŋɔ ni yɛli shɛm m-bɔŋɔ: ‘Mani n-daa duh’ a niriba ni, ka piig’ a leei n niriba Izraɛlnim’ naa.

⁸N daa darigi deei nam maa la Dauda daŋ ni ti a, amaa ka a ti bi be kaman n dabili Dauda ŋun daa doli n zalikpana, ka doli ma ni o suhu zaa ka tumdi din tuhi n san’ la.

⁹Amaa nyin’ tum alahichi n-gari ninvuɣ’ shɛb’ bɛn daŋ a tooni. A daai ma baɣil’ a nyaaŋa ka me buɣa, ka mali binnana zali n-chɛ ka n suhu yiɣisi.

¹⁰ Dinzuɣu nyama, n ni chɛ ka zaɣ’ biɛɣu niŋ Jɛrɔbɔam daŋ niriba. N ni ku Jɛrɔbɔam daŋ puuni dɔbba bɛn nyɛ bilichinnim’ mini daba zaa Izraɛl tiŋgbɔŋ ni. N ni kpihim Jɛrɔbɔam daŋ birili, ka di be kaman nir’ ni yi niŋ buɣim nyo naɣibindi ka di di li zaa shɛm la.

¹¹Ka Jɛrɔbɔam daŋ ni ŋunkam kpi yiŋa, bahi ni ŋub’ o; ka ŋunkam mi kpi mɔɣu ni, juri ni di o.’ Man’ Yawɛ n-yɛli lala maa.”

¹²Dinzuɣu yiɣisim’ kuli. A napɔŋ yi ti kul zani tiŋ’ puuni, bia maa ni leei Naawuni dini.

¹³Ka Izraɛlnim’ zaa ni kum o kuli, ka sɔɣ’ o, dama o kɔŋko n-nyɛ Jɛrɔbɔam bi’ so bɛ ni yɛn zaŋ sɔɣi gballi ni; dama o kɔŋko ka Yawɛ ŋun nyɛ Izraɛlnim’ Naawuni ŋɔ nini tiɣi Jɛrɔbɔam daŋ ni.

¹⁴Ka din pahi nyɛla, Yawɛ ni pii so n-leei naa ka o su Izraɛlnima; ka lala naa maa kpihim Jɛrɔbɔam daŋ niriba birili zuŋɔ.

¹⁵“Ka pumpɔŋɔ zaŋ chana, Naawuni ni darigi Izraɛlnim’ tibili, ka bɛ ni sɔhiri kaman gbiŋgbaŋ din sa kom ni la, ka yihi ba tiŋgban’ sun’ shɛli o ni daa zaŋ ti bɛ yaannim’ ŋɔ ni; ka wurim ba ka bɛ chaŋ ti be Yufretiiz Mɔɣili duli ha, bɛ ni ŋmaligi jɛmdi buɣili Ashɛrim n-chɛ ka o suhu yiɣisi la zuɣu.

¹⁶Jɛrɔbɔam ni tum alahichi shɛŋa min’ o ni chɛ ka Izraɛlnim’ gba tum alahichi shɛŋa la zuɣu ka o yɛn chɛ Izraɛlnim’ bahi.”

¹⁷Di saha ka Jɛrɔbɔam paɣ’ maa daa yiɣisi kuli Tiriza. O ni daa kul mali ti kpɛri bɛ yiŋ’ dunol’ ni, ka bia maa dii leei Naawuni dini.

¹⁸Ka Izraɛlnim’ zaa daa kum o kuli, ka zaŋ o ti sɔɣi kaman Yawɛ ni daa chɛ ka o dabili anabi Ahija yɛli shɛm la.

¹⁹Jɛrɔbɔam ni daa tum tuun’ shɛŋa zaa pahi min’ o ni daa tuhi tɔbu shɛm ni o ni daa di nam shɛm zaa yɛla sab’ niŋ Izraɛl nanim’ Litaafi ni.

²⁰Jɛrɔbɔam daa di nam n-niŋ nam maa ni la yuun’ pisinaayi, ka naanyi yi dunia yili; ka o bia Nadab daa di nam zan’ o zaani.

²¹Sulemaana bia Rɛhɔbɔam daa nyɛla yuun’ pihinahi ni yini nir’ saha shɛl’ o ni daa di nam su Judanima. O daa di nam maa ʒini Jɛrusalɛm la yuun’ pinaayopɔin. Jɛrusalɛm daa nyɛla Yawɛ ni pii tin’ shɛli Izraɛl tinsi ni n-leeg’ o jɛmbu shee. O ma ŋun daa nyɛ Ammɔn paɣ’ la yuli n-daa booni Naama.

²²Judanim’ daa tum din bie Naawuni sani. Bɛ daa tum alahichi gari bɛ yaannim’ ni daa tum shɛm n-chɛ ka Yawɛ suhu yiɣisi pam.

²³ Dama bɛ daa lan mɛla buɣa jɛmbu shee mini binchunchuna zali, ka me buɣili Ashɛrim binnana n-tamtam zoli kam zuɣu; ka me shɛŋa mi zali timahili kam gbini.

²⁴ Ka din pahi nyɛla, dɔbba gba daa tumdila dagɔr’ tuma bɛ buɣa maa malibu shee. Judanim’ daa tum din chihiri shɛlikam ninvuɣ’ shɛb’ bɛn daa pun be tiŋgbɔŋ maa ni, ka Yawɛ ti kari ba ka chɛ ka Izraɛlnim’ maa kana ti ʒini maa ni daa tumdi la.

²⁵ Rɛhɔbɔam ni daa di nam zaŋ ti paai di yuma anu saha, ka Ijipti Naa Shishak daa kana ti tuhi Jɛrusalɛmnima.

²⁶ Ka o daa kpuɣi neen’ shɛŋa din be Yawɛ jɛmbu duu mini neen’ shɛŋa din be nayili zaa chaŋ; ka daa lan kpuɣi salima nyɔtaɣirisi shɛŋa Sulemaana ni daa chɛ ka bɛ mali la.

²⁷Ka Naa Rɛhɔbɔam daa chɛ ka bɛ zaŋ daanya mali nyɔtaɣirisi zali di zaani, ka o zaŋ li niŋ tɔbbi’ shɛb’ bɛn daa ʒe n-guli nayili dunol’ la kpamba nuu ni.

²⁸Ka naa daa yi ti kul chani Yawɛ jɛmbu duu saha shɛlikam, tɔbbi’ shɛb’ bɛn guli nayili dunoli maa kpuɣirila nyɔtaɣirisi maa dol’ o chaŋ, ka ti lan zaŋ li ti niŋ bɛ duu yaha.

²⁹Ka Rɛhɔbɔam tuma din pahi min’ o ni daa pun tum shɛlikam zaa, bɛ sab’ di yɛla niŋ Juda nanim’ litaafi ni.

³⁰Rɛhɔbɔam mini Jɛrɔbɔam daa kul tuhirila tab’ tɔbu waawaayili.

³¹Ka Rɛhɔbɔam daa ti paɣ’ Naawuni, ka bɛ zaŋ o sɔɣi pah’ o yaannim’ zuɣu Dauda tiŋ’ la ni. O ma ŋun daa nyɛ Ammɔn paɣ’ la yuli n-daa booni Naama. Ka o bia Abijam daa di nam zan’ o ba zaani.