Read Dagbani 1 Nanima 15 Bible Online

1 Nanima 15 - Dagbani bible

1 Nanima 15

¹Naa Jɛrɔbɔam ŋun daa nyɛ Nɛbat bia la ni daa di nam zaŋ chaŋ yuun’ pisaayika saha ka Abijam daa leei Juda naa.

²O daa diya ʒini Jɛrusalɛm la yuma ata. O ma daa nyɛla Absalom bia, ka o yuli booni Maaka.

³O daa tum alahichi shɛŋa zaa o ba ni daa tum la, ka o suhu daa bi ʒe Yawɛ ŋun nyɛ o Naawuni la yim kaman o yab’ Dauda suhu ni daa ʒiɛya shɛm la.

⁴ Amaa Dauda zuɣu ka Yawɛ ŋun nyɛ o Naawuni daa ti Abijam firila Jɛrusalɛm n-chɛ ka o bia di nam zan’ o zaani gbib’ Jɛrusalɛm.

⁵ Dauda ni daa tum din tuhi Yawɛ sani, ka bi zaɣis’ o noli o ni zal’ o zaligu shɛŋa zaa ni, naɣila Yuria Hiti nir’ la yɛla la zuɣu ka o daa niŋ lala maa.

⁶ Abijam mini Jɛrɔbɔam daa kul tuhirila tab’ tɔbu hal ni o nyɛvili tariga.

⁷Abijam ni daa tum tuun’ shɛŋa pahi min’ o ni daa pun tum shɛlikam zaa bɛ sab’ di yɛla niŋ Juda nanim’ litaafi ni. Abijam mini Jɛrɔbɔam daa kul tuhirila tab’ tɔbu.

⁸Ka Abijam daa ti leei ŋun kani, ka bɛ zaŋ o sɔɣi Dauda tiŋ’ la ni; ka o bia Asa daa di nam zan’ o zaani.

⁹Izraɛl Naa Jɛrɔbɔam ni daa di nam zaŋ chaŋ yuun’ pisi saha ka Asa daa leei Juda naa.

¹⁰O daa dila nam maa yuun’ pihinahi ni yini Jɛrusalɛm. O yabipaɣa n-daa nyɛ Absalom bipuɣiŋga Maaka.

¹¹Ka Asa daa tum din tuhi Yawɛ sani kaman o yab’ Dauda ni daa tum shɛm la.

¹² O daa kari dɔbba dagɔr’ tuma tiŋgbani maa ni, ka wurim buɣ’ shɛŋa zaa o yaannim’ ni daa me n-zal’ la.

¹³O daa lan yih’ o yabipaɣ’ Maaka napaɣ’ nam ni, o ni daa me Ashɛra binnan’ shɛli din chihiri zal’ la zuɣu. Ka Asa daa ŋme n kab’ o binnani maa luhi n-zaŋ li ti nyo buɣim Kidirɔn kulibɔŋ ni.

¹⁴Asa daa bi wurim luɣ’ shɛŋa bɛ ni daa jɛmdi buɣa la, amaa di zaa yoli, o daa ʒe Yawɛ yim o suhu ni hal ni o nyɛvili tariga.

¹⁵O daa zaŋ o ba ni daa zaŋ pin’ shɛŋa la min’ omaŋmaŋ’ ni daa zaŋ pin’ shɛŋa ti Yawɛ ka di nyɛ anzinfa mini salima ni lahi la ti zali Naawuni jɛmbu duu.

¹⁶Asa mini Izraɛl Naa Baasha daa kul tuhirila tab’ tɔbu hal ni bɛ nyɛviya tariga.

¹⁷Izraɛl Naa Baasha daa ti chaŋmi ti liri Judanima, ka me Rama zali ni o chɛ ka so ku lan tooi yi Juda Naa Asa sani chaŋ luɣ’ shɛli bee n-yi shɛli polo ka o sanna.

¹⁸Di saha ka Asa daa zaŋ anzinfa mini salima din zaa be Yawɛ jɛmbu duu mini nayili n-ti o kpambaliba n-tim ba ni bɛ zaŋm’ li ti ti Siria Naa Bɛnhadad ŋun daa nyɛ Tabirimmɔn bia, ka nyɛ Hɛziɔn yaaŋa ka be Damaskus la, ka yɛl’ o,

¹⁹“Chɛ ka ti laɣ’ tab’ zɔri m-be kaman m ba min’ a ba ni daa be shɛm la. Nyama, n zaŋla anzinfa mini salima ŋɔ ti a pini. Saɣimm’ a mini Izraɛl Naa Baasha zɔtal’ la, ka di zuɣu chɛ ka o zaŋ o tɔbbihi yiɣisi ka chɛ ma.”

²⁰Ka Bɛnhadad daa wum Naa Asa ni yɛli shɛm maa, ka tim o sapashin’ kpamba mini bɛ tɔbbihi ka bɛ chaŋ ti liri Izraɛlnim’ fɔntinsi n-tuhi nyaŋ Ijɔn mini Dan ni Ɛbɛlibɛtimaaka ni Kinɛrɔt zaa zaŋ tabili Naftali tiŋgbani zaa.

²¹Baasha ni daa wum lala, ka o chɛ Rama mɛbu, ka be Tiriza.

²²Ka Naa Asa daa chɛ ka bɛ moli molo Juda tiŋgbɔŋ ni zaa, o mi daa bi yihi so nuu. Ka bɛ daa va Baasha ni daa mali kuɣ’ shɛŋa mini da’ shɛŋa mɛri Rama maa na, ka ŋun’ Naa Asa daa chɛ ka bɛ zaŋ li me Gɛba din be Bɛnjamin tiŋgban’ ni la mini Mizipa.

²³Asa tuun’ shɛŋa din pahi min’ o kpiɔŋ ni o ni daa tum shɛlikam zaa ni o ni daa me tin’ shɛŋa zaa, bɛ sab’ di yɛla niŋ Juda nanim’ litaafi ni. Amaa o ni daa ti kurigi, naba polo dɔro n-daa gbaag’ o.

²⁴Ka Asa daa ti niŋ ŋun kani, ka bɛ zaŋ sɔɣi pah’ o yaannim’ zuɣu o yab’ Dauda tiŋ’ la ni. Ka o bia Jɛhɔshafat daa di nam zan’ o zaani.

²⁵Naa Asa ni daa di nam zaŋ chaŋ yuma ayi saha, ka Nadab Jɛrɔbɔam bia daa leei Izraɛl naa. O daa diya su Izraɛlnim’ la yuma ayi.

²⁶O daa tum alahichi Yawɛ sani, ka dol’ o ba soli tum alahichi ka chɛ ka Izraɛlnim’ gba tum alahichi.

²⁷Ka Baasha ŋun daa nyɛ Ahija ŋun yi Isaka zuliya ni na bia la daa lo nia n-chaŋ ti liri Nadab n-ku o Gibɛtɔn din be Filistia tiŋgbɔŋ ni la; dama Nadab mini Izraɛlnim’ zaa daa teei gilila Gibɛtɔn.

²⁸Juda Naa Asa ni daa di nam zaŋ chaŋ yuma ata saha ka Baasha daa ku Nadab, ka di nam zan’ o zaani.

²⁹ Baasha ni daa kul di nam maa, di daa bi yuui ka o ku Jɛrɔbɔam yiŋnim’ zaa kaman Yawɛ ni daa chɛ ka anabi Ahija Shilo nir’ la yɛli shɛm la. O daa bi chɛ hal bɛ ni ninvuɣ’ yino gba; o daa kula bɛ zaa.

³⁰Jɛrɔbɔam ni daa tum alahichi shɛŋa la min’ o ni daa chɛ ka Izraɛlnim’ tum alahichi ni o ni daa niŋ shɛm n-chɛ ka Yawɛ ŋun nyɛ Izraɛlnim’ Naawuni ŋɔ suhu yiɣisi la zuɣu ka lala daa niŋ maa.

³¹Nadab ni daa tum tuun’ shɛŋa pahi min’ o ni daa pun tum tuun’ shɛlikam zaa, bɛ sab’ di yɛla niŋ Izraɛl nanim’ litaafi ni.

³²Asa mini Izraɛl Naa Baasha daa kul tuhirila tab’ tɔbu hal ni bɛ nyɛviya tariga.

³³Juda Naa Asa ni daa di nam zaŋ chaŋ yuma ata saha, ka Ahija bia Baasha daa leei Izraɛlnim’ zaa naa n-ʒi Tiriza. O daa niŋla nam maa ni yuun’ pisinaanahi.

³⁴O daa tum alahichi Yawɛ sani, ka daa doli Jɛrɔbɔam daalahichi tumbu soli min’ o ni daa chɛ ka Izraɛlnim’ tum alahichi shɛl’ la soli.