Read Dagbani 1 Nanima 18 Bible Online

1 Nanima 18 - Dagbani bible

1 Nanima 18

¹Ka di daa niŋ daba ayi ha yuun’ shɛli din pahir’ ata ni, ka Yawɛ daa ti yɛli Ilaija, “Cham’ ti zaŋ amaŋ’ wuhi Ɛhab, ka n chɛ ka saa mi dunia ni.”

²Ka Ilaija daa yiɣisi chaŋ ni o ti zaŋ omaŋ’ wuhi Naa Ɛhab. Kum daa mii Samarianim’ pam di saha maa.

³Ka Ɛhab daa boli Obadia ŋun daa su nayili tuma fukumsi la na. (Obadia daa nyɛla ninvuɣ’ so ŋun jɛmdi Yawɛ viɛnyɛliŋga;

⁴ka Jɛzibɛl ni daa ti kuri Yawɛ daanabinim’ la, ŋuna n-daa zaŋ anabinim’ kɔbiga m-pirigi ba pihinunu n-sɔɣi vokaba ni, ka tiri ba bindirigu mini kom).

⁵Ka Ɛhab daa yɛl’ o, “Cham’ gili tiŋgbɔŋ ŋɔ kulibɔna mini vinvama zaa ni nti lihi nya ti ni nya mɔri ti ti yuri mini ti buntaansi ŋɔ n-tiligi ba din ni chɛ ka ti ku kɔŋ bɛ shɛba.”

⁶Ka bɛ daa pirigi bɛ ni yɛn kpa tiŋgbani maa yaɣ’ shɛŋa polo ti taba. Ɛhab kɔŋko daa kpala yaɣ’ yini polo; ka Obadia mi kɔŋko kpa yaɣ’ din’ la polo.

⁷Obadia ni daa gbaai chandi, o nini nyabu yim ka o ti nya Ilaija m-baŋ o, ka teei dɔni n-zaŋ o nina kpa tiŋa ka yɛli, “N dan’ Ilaija, nyini m-bala?”

⁸Ka o garigi yɛl’ o, “Mani m-bala, Cham’ ti yɛl’ a dana ‘Nyama, Ilaija be kpe.’ ”

⁹Ka Obadia bɔhi Ilaija, “Tuumbiɛ’ bɔ ka n lee tum ka a bɔri ni a chɛ ka Ɛhab ku man’ ŋun nyɛ a dabili ŋɔ?

¹⁰Hal ka Yawɛ ŋun nyɛ a Naawuni ŋun be ŋɔ zuɣu, zuliya shɛba bee na’ so n-kani ka n dan’ naa bi tim nimaani nti bɔ a; ka bɛ yi yɛli ni a kani, faashee ka dilan’ chɛ ka lala zuliya maa nim’ po ni bɛ shiri bi nya a.

¹¹Ka pumpɔŋɔ ka a ti yɛli ma, ‘Cham’ ti yɛli a dan’ naa, “Nyama, Ilaija be kpe.” ’

¹²Ka n yi kul yi a sani chaŋ, Yawɛ shia ni kana nti kpuɣ’ a kpa shɛli polo n ni ʒi, ka n chaŋ ti yɛli Ɛhab ka o ti bi nya a, o ni ku ma, hal man’ ŋun nyɛ a dabili ŋɔ ni kul nyɛ ŋun doli Yawɛ viɛnyɛliŋga m bilim ni ha la zaa yoli.

¹³Bɛ bi yɛli nyini n dana Jɛzibɛl ni daa ti kuri Yawɛ daanabinim’ la ka n niŋ shɛm? N daa zaŋla anabinim’ kɔbiga m-pirigi ba pihinunu n-sɔɣi vokaba ni, ka niŋdi bindirigu mini kom ti tiri ba.

¹⁴Ka pumpɔŋɔ ka a ti yɛli ma, ‘Cham’ ti yɛl’ a dan’ naa, “Nyama, Ilaija be kpe, ka o ku ma?” ’

¹⁵Ka Ilaija garigi yɛl’ o, “Yawɛ ŋun nyɛ Tɔbbihi Naa ŋun be, ka nyɛ n ni ʒe so tooni ŋɔ zuɣu, n shiri ni zaŋ mmaŋ’ wuhi Ɛhab zuŋɔ dabisili ŋɔ.”

¹⁶Ka Obadia daa ŋmaligi chaŋ ti yɛli Ɛhab, ka o daa chaŋ ni o ti nya Ilaija.

¹⁷Ɛhab ni daa nya Ilaija, o daa bɔh’ o mi, “Nyin’ ŋun nahindi Izraɛlnim’ maa m-bala?”

¹⁸Ka Ilaija garigi yɛl’ o, “Pa mani n-nyɛ ŋun nahindi Izraɛlnima, amaa a min’ a daŋ niriba n-nahindi Izraɛlnima. Dama yinima n-zaɣisi Yawɛ zaligunim’ dolibu, ka jɛmdila Baal buɣa.

¹⁹Dinzuɣu pumpɔŋɔ timmi laɣim Izraɛlnim’ zaa mini Baal anabinim’ kɔbisinahi ni pihinu ni Ashɛra anabinim’ kɔbisinahi bɛn diri Jɛzibɛl yiŋ’ la n-zaŋ ba ka n sanna Kamɛl Zoli zuɣu.

²⁰Ka Ɛhab daa tim ti laɣim Izraɛlnim’ zaa mini anabinim’ maa na Kamɛl Zoli zuɣu.

²¹Ka Ilaija daa kana ti zani miri niriba maa zaa ka bɔhi ba, “Bɔ saha ka yi leei kul yɛn chɛ yi tɛha buyiyi ŋɔ? Yawɛ n-yi nyɛ Naawuni, yin’ doliy’ o, ka Baal n-yi nyɛ Naawuni, yin’ doliy’ o.” Ka niriba maa daa bi garigi yɛl’ o shɛli.

²²Di saha ka Ilaija daa lan yɛli niriba maa, “N kɔŋko n-kul kpalim nyɛ Yawɛ daanabi, amaa ka Baal ŋun’ mali anabinim’ kɔbisinahi ni pihinu.

²³Timiya ti naɣilah’ ayi, ka chɛ ka bɛ pii naɣila’ yino kɔrigi ŋ-ŋmahiŋmah’ o pa dari zuɣu, ka di niŋ buɣim niŋ li; ka n gba kɔrigi naɣila’ ŋun’ la ŋ-ŋmahiŋmah’ o pa dari zuɣu ka ku niŋ buɣim niŋ li.

²⁴Ka yi suhi yi Naawuni maa, ka n gba suhi Yawɛ, ka Naawuni so ŋun chɛ ka buɣim taai nimdi maa, ŋuna n-nyɛ Naawuni.” Ka Niriba maa zaa yɛli, “A ni yɛli shɛm maa viɛla.”

²⁵Di saha ka Ilaija daa yɛli Baal anabinim’ maa, “Yi ni galisi maa zuɣu, daŋmiya pii yi naɣilaa kɔrigi ŋ-ŋmahiŋmah’ o pa, ka suhi yi buɣili maa; amaa ka lee di niŋ buɣim niŋ li.

²⁶Ka bɛ daa zaŋ bɛ ni zaŋ naɣila’ so ti ba kɔrigi ŋ-ŋmahiŋmahi pa, ka gbaai Baal maa suhibu asiba hal ni wuntaŋ’ zuɣusaa saha n-kul yɛra, “Baal, garigim’ ti!” Ka bɛ daa kul yiɣirimi jɛmdi gindi bimbin’ shɛli bɛ ni me n-zali maa, amaa ka bi wum so kukoli, ka so mi bi garigi ba.

²⁷Ka di daa mali ti paai wuntaŋ’ zuɣusaa saha, ka Ilaija gbaai ba ansarisi malibu yɛra, “O nyɛla Naawuni, dinzuɣu suhimiya pampam, dama di pa shɛli o na bɔhirila o suhi bee o na yimi bee o go n-chaŋla tinshee katiŋa bee ŋun’ gbihirimi, ka di simdi ni yi neeg’ o.”

²⁸Ka anabinim’ maa daa kul kuhiri pampam, ka mali suhi mini kpana ŋ-ŋmari bɛmaŋa ka chɔhiri bɛmaŋa kaman bɛ taara ni daa nyɛ shɛm hal ka ʒim ti puhiri yiri bɛ niŋgbuna ni na.

²⁹Ka bɛ daa kul niŋdi lala hal ka wuntaŋ’ zuɣusaa saha ti gari, ka bɛ kul mali lala hal ti paai zaawuni sara malibu saha, ka bi wum so kukoli, ka so mi bi garigi ba.

³⁰Di saha maa ka Ilaija daa yɛli niriba maa zaa, “Mirimiya ma na” ka niriba maa zaa daa vu m-mir’ o. Ka o daa mali me Yawɛ sara maligu bimbin’ shɛli bɛ ni daa daai luhi la zali.

³¹ O daa piila kuɣa pinaayi n-saɣisi Yaakubu so Yawɛ ni daa yɛli, “A yuli n-nyɛ Izraɛl” la bidibisi kalinli

³²n-daa zaŋ kuɣa maa me Yawɛ jɛmbu sara maligu bimbini maa zali, ka chɛ ka bɛ gaai bɔɣili gil’ li; ka bɔɣili maa ni tooi deei kom kaman lita pinaanahi laasabu.

³³Ka o daa kab’ dari pa bimbin’ maa zuɣu, ka ŋmahiŋmahi naɣilaa maa nimdi pa dari maa zuɣu, ka yɛli ba, “Niŋmiya kom pali koyuya anahi n-kpaai li tɛli sara shɛli bɛ ni zaŋdi nyɔri buɣim ŋɔ mini dari maa.”

³⁴Ka o lan yɛli, “Niŋmiya lala pahi buyi.” Ka bɛ niŋ lala pahi buyi. Ka o lan yɛli, “Niŋmiya lala pahi buta.” Ka bɛ niŋ lala pahi buta.

³⁵Ka kom maa daa zo n-gili bimbini maa, ka pali bɔɣili la gba.

³⁶Ka sara malibu saha daa ti paai, ka anabi Ilaija vu m-miri sara maligu bimbini maa ka suhi Naawuni yɛli, “Yawɛ ŋun nyɛ Ibrahimma mini Yisahaku ni Izraɛl Naawuni ŋɔ, zuŋɔ dabisili ŋɔ, chɛ ka niriba ŋɔ baŋ ni nyini n-nyɛ Naawuni Izraɛl tiŋgbɔŋ ŋɔ ni; ka baŋ ni n nyɛla a dabili, ka lan baŋ ni a ni wuhi ma shɛm ka n niŋ ŋɔ.

³⁷Yawɛ, Garigim’ ma, garigim’ ma din ni chɛ ka niriba ŋɔ baŋ ni nyini Yawɛ n-nyɛ Naawuni, ka lan nyɛ ŋun ŋmaligi bɛ suhuri labis’ a sanna.”

³⁸Ka Yawɛ daa chɛ ka buɣim kana ti taai di nimdi maa mini dari maa ni kuɣa ni taŋkpaɣu, ka chɛ ka ko’ shɛli din daa be bɔɣili maa ni farifari nyuui.

³⁹Ka niriba maa zaa ni daa nya lala maa, ka bɛ teei dɔni n-zaŋ bɛ nina kpa tiŋa ka yɛra, “Yawɛ n-shiri nyɛ Naawuni, Yawɛ n-shiri nyɛ Naawuni”

⁴⁰Ka Ilaija daa yɛli niriba maa, “Gbahimiya Baal daanabinim’ maa, ka di chɛliya ka bɛ ni so zo n-tiligi.” Ka bɛ daa gbahi ba, ka Ilaija zaŋ ba sirigi Kishɔn kulibɔŋ ni nti ku ba nimaani.

⁴¹Di saha ka Ilaija daa yɛli Ɛhab, “Cham’ ti di ka nyu, dama saa vura.”

⁴²Ka Ɛhab ni daa chaŋ ni o ti di ka nyu saha shɛli maa, ka Ilaija daa du Kamɛl Zoli zuɣu nti kurim n-zaŋ o nini kpa o duna;

⁴³ka yɛl’ o tumo, “Cham’ ti lihi teeku polo.” Ka o daa chaŋ ti lihi ka yɛli, “M bi nya shɛli.” Ka Ilaija yɛl’ o, “Labimi yaha n-niŋ lala hal ti paai siɣimsiɣim buyopɔin.”

⁴⁴Napɔŋ din pahir’ ayopɔin maa ni, ka o daa ti yɛli, “N nya sagban’ bila ka di be kaman ninsal’ nuu la n-yi teeku polo na.” Ka o yɛl’ o, “Cham’ ti yɛli Ɛhab, ‘Malim’ a chɛchɛbuŋ’ shili n-yiɣisi kuli, di yi pa lala saa ni taɣ’ a sɔŋ.’ ”

⁴⁵ Di daa bi yuui ka saa ku n-zibigi, ka pɔhim gbaai ʒiɛbu, ka sa’ kurili dii piligi mibu. Ka Ɛhab daa kpe o chɛchɛbuŋ’ ni n-zo nti kpe Jɛziriil.

⁴⁶Ka Yawɛ yiko daa kpe Ilaija ni, ka o voog’ o shɛlɔrigu lo n-zo n-daŋ Ɛhab tooni ti paai Jɛziriil dunɔdali gbini.