Read Dagbani 1 Nanima 20 Bible Online

1 Nanima 20 - Dagbani bible

1 Nanima 20

¹Ka Siria Naa Bɛnhadad daa ti laɣim’ o tɔbbihi m-pahi nanim’ pihitanaayi bɛn ʒe o nyaaŋa ni bɛ yuri mini bɛ chɛchɛbunsi n-kana ti liri Samarianima n-teei gili ba ni bɛ tuhi ba.

²Ka o daa tim tuumba tiŋ’ maa puuni Izraɛl Naa Ɛhab sani nti yɛl’ o, “Bɛnhadad

³ni o bɔrila a daanzinfa min’ a salima ni a paɣ’ viɛla ni a bihi.”

⁴Ka Izraɛl naa garigi yɛli, “Yɛlimiya n dan’ naa ni o ni yɛli shɛm maa nyɛla pali, mmaŋmaŋ’ zaŋ tabili n ni mali shɛlikam nyɛla o dini.”

⁵Ka tuumba maa daa ti lan labina nti yɛl’ o, “Bɛnhadad ni yɛli shɛm m-bɔŋɔ, ‘N daa timna ti yɛl’ a ni a zaŋ a daanzinfa min’ a salima ni a paɣiba ni a bihi ti ma na,

⁶amaa biɛɣuni ŋ-ŋɔ tasaha n sa ni tim n tuumba na ka bɛ ti kpe a min’ a kpambaliba yinsi nti vihi, ka bɛ yi kul nya binshɛlikam ka di tiɣi bɛ nini, bɛn’ kpuɣim’ li.’ ”

⁷Di saha ka Izraɛl naa daa laɣim Izraɛl kpamba zaa na nti yɛli ba, “Pumpɔŋɔ, nyamiya doo ŋɔ ni bɔri ti vuri shɛm. O daa pun timna nti yɛli ma ni o bɔrila m paɣiba mini m bihi ni n daanzinfa ni n salima, ka m bi mɔŋ o.”

⁸Ka kpamba maa mini niriba maa zaa daa yɛl’ o, “Di garig’ o shɛli bee n-saɣ’ o ni yɛli shɛm maa.”

⁹Dinzuɣu ka o daa yɛli Bɛnhadad tuumba maa, “Yɛlimiya n dan’ naa, ‘A ni daa daŋ bɔri ni man’ ŋun nyɛ a dabili ŋɔ niŋ shɛlikam zaa la, n saɣiya ni n ni niŋ li, amaa dimbɔŋɔ dindina, n ku tooi niŋ li.’ ” Ka tuumba maa daa ŋmaligi kuli nti lan ʒi yɛtɔɣ’ shɛli labina yaha.

¹⁰Naa Bɛnhadad daa timmina nti yɛl’ o, “Samaria taŋkpaɣu yi ni tooi pali n niriba bɛn doli ma zaa nukurigu yimyim, m buɣa bɛn niŋm’ ma zaɣ’ biɛɣu, hal n niŋ ma zaɣ’ biɛɣu pam gba.”

¹¹Ka Izraɛl Naa daa garigi yɛli, “Yɛlimiy’ o, ‘Tɔbbi’ so ŋun na lɔri kpara bi simdi ka o nyuri bara kaman tɔbbi’ so ŋun lɔrigi kpara ni nyuri bara shɛm.’ ”

¹²Bɛnhadad min’ o natab’ bɛn daa ʒe o nyaaŋa la daa bela bɛ suɣa ni nyuri dam, ka bɛ zaŋ o ni daa yɛli shɛm maa na ti yɛli Bɛnhadad. Ka o daa yɛl’ o tɔbbihi ni bɛ malim’ shili n-chaŋ ti liri Samarianim’ maa, ka bɛ daa teei zani.

¹³Nyama, ka anabi so daa kana ti yɛli Izraɛl Naa Ɛhab, “Yawɛ ni yɛli shɛm m-bɔŋɔ, ‘Yi nya ninvuɣ’ gbaliŋ ŋɔ zaa bebɔ? Nyama, n ni zaŋ ba niŋ a nuu ni zuŋɔ dabisili ŋɔ, ka a baŋ ni mani n-shiri nyɛ Yawɛ.’ ”

¹⁴Ka Ɛhab bɔh’ o, “Ka banima n-lee yɛn gari tooni chaŋ ti liri ba?” Ka anab’ maa garigi yɛli, “Yawɛ ni yɛli shɛm m-bɔŋɔ, bɔba ni yaɣa ni gomnanim’ tɔbbihi la n-yɛn gari tooni.” Ka Ɛhab lan bɔh’ o, “Ka ŋuni nti lee yɛn piligi tɔb’ maa?” Ka o yɛl’ o, “Nyini.”

¹⁵Di saha ka o daa laɣim bɔba ni yaɣa ni gomnanim’ maa tɔbbihi maa, ka bɛ kalinli daa yiɣisi kɔbisiyi ni pihitanaayi. Di nyaaŋa ka o daa laɣim Izraɛl tɔbbihi zaa, ka bɛ kalinli yiɣisi tusaayopɔin.

¹⁶Ka bɛ daa chaŋ wuntaŋ’ zuɣusaa saha nti liri ba, saha shɛli Bɛnhadad mini nanim’ pihitanaayi bɛn daa sɔŋd’ o la ni daa nyu dam buɣi be bɛ suɣa ni.

¹⁷Bɔba ni yaɣa ni gomnanim’ maa ni daa su tɔbbi’ shɛb’ fukumsi la n-daa daŋ tooni. Ka Bɛnhadad daa tim o naazɔnim’ ni bɛ yina ti nya, ka bɛ daa yina ti nya ka lab’ ti yɛl’ o, “Niriba n-yi Samaria kanna.”

¹⁸Ka o yɛli ba, “Bɛ yi kanimina ni bɛ ti tuhi ti bee bɛ yi kanimina ni bɛ ti niŋ sandaani niŋ ti yin’ gbahimiya ba zaɣ’ nɛma.”

¹⁹Ka bɔba ni yaɣa ni gomnanim’ tɔbbihi mini tɔbbi’ shɛb’ bɛn daa dol’ ba daa yi n-chaŋ.

²⁰Ka bɛ zaɣ’ yino kam daa ku o mini ŋun nyɔɣu yo taba. Ka Sirianim’ maa daa ŋmaligi guui, ka Izraɛlnim’ kari doli ba, amaa ka Siria Naa Bɛnhadad daa ba wɔhu pahi wɔribariba ni n-zo n-tiligi.

²¹Ka Izraɛl naa daa kari doli ba nti fa bɛ yuri mini bɛ chɛchɛbunsi, ka ku Sirianim’ maa pam.

²²Di nyaaŋa ka anabi la daa lan lab’ Izraɛl naa sanna ti yɛl’ o, “Lan malimiya shili gu, ka baŋ yi ni yɛn niŋ shɛm, dama zaŋ chaŋ shɛɣuni, Siria naa ni lan labina ti liri ya.”

²³Di saha ka Siria naa kpambaliba daa yɛl’ o, “Izraɛlnim’ Naawuni nyɛla zoya zuɣu Naawuni, dina n-chɛ ka bɛ mali kpiɔŋ gari ti maa, amaa chɛliya ka ti tuhi ba la bɔpiɛligu ni, biɛhiŋ kani, ti ni nyaŋ ba.

²⁴Dinzuɣu a ni yɛn niŋ shɛm m-bɔŋɔ, yihim’ nanim’ pihitanaayi la zaa nam ni, ka zaŋ sapashin’ kpamba zali bɛ zaashɛhi maa

²⁵ka bo tɔbbihi bɛn galisi kaman a ni daa kɔŋ tɔbbi’ shɛb’ la zaashee, ka bo yuri zali wɔr’ shɛb’ bɛn daa kan’ la zali bɛ zaashee, ka ti mini ba ti zaŋ ti nyɔri yo taba bɔpiɛligu ni; ka biɛhiŋ kani ti ni nyaŋ ba.” Ka o daa saɣi bɛ ni yɛli shɛm maa, ka shiri niŋ lala.

²⁶Ka di daa ti niŋ shɛɣuni, ka Bɛnhadad laɣim Siria tɔbbihi n-chaŋ Afɛk ni o ti tuhi Izraɛlnima.

²⁷Ka bɛ daa laɣim Izraɛl tɔbbihi na nti ti ba bidibbina ni bɛ yi n-chaŋ ti tuhi ba. Bɛ daa pirigila buyi dɔni kaman buhi biɛla la, amaa ka Siria tɔbbihi maa bɛn’ kul yɛrigila luɣilikam zaa.

²⁸Ka Naawuni nir’ daa ka Izraɛl naa sanna ti yɛl’ o, “Yawɛ ni yɛli shɛm m-bɔŋɔ, ‘Sirianim’ ni yɛli ni man’ Yawɛ nyɛla zoya zuɣu Naawuni ka pa vinvama ni Naawuni la zuɣu, n ni chɛ ka yi nyaŋ tɔbbi’ gbaliŋ maa zaa, ka yi baŋ ni mani n-shiri nyɛ Yawɛ.’ ”

²⁹Ka bɛ zaa daa do bɛ sansana ni n-lihiri taba daba ayopɔin. Ka bɛ daa ti gbaai tab’ tuhibu daba ayopɔin maa dali. Ka Izraɛlnim’ daa ku Sirianim’ tɔbbihi bɛn chan’ tiŋ’ tuhi’ kɔbiga dindali maa.

³⁰Ka bɛn kpalim daa zo nti kpe Afɛk, ka tiŋ’ maa gooni daa lu bɛ zuɣu n-ku bɛ ninvuɣ’ tuhi’ pisinaayopɔin bɛn kpalim. Ka Bɛnhadad gba daa zo nti kpe tiŋ’ maa ni sɔɣi.

³¹Ka o kpambaliba daa yɛl’ o, “Nyama, ti wumya ni Izraɛl nanim’ nyɛla nambɔzɔriba, dinzuɣu chɛ ka ti zaŋ buri so, ka zaŋ gabisi n-kaŋka n-vili ti zuɣuri chaŋ Izraɛl Naa maa sani, di pa shɛli ka o tilig’ a nyɛvili.”

³²Ka bɛ daa zaŋ buri maa so, ka zaŋ gabisi maa vili bɛ zuɣuri chaŋ Izraɛl naa maa sani ti yɛl’ o, “A dabili Bɛnhadad yɛliya ni o suhirila o nyɛvili.” Ka Naa Ɛhab daa garigi bɔhi ba, “O na be o nyɛvil’ ni? O nyɛla m mabia.”

³³Di saha maa, niriba maa daa kpahindimi ni bɛ nya shihirili shɛli. Ka bɛ daa dii deeg’ o ni yɛli shɛm maa, ka yɛli, “Iin, a mabia Bɛnhadad.” Ka o yɛli ba, “Chamiya ti zaŋ o na.” Ka Bɛnhadad daa ka o sanna, ka o ti chɛ ka o kpe chɛchɛbuŋ’ ni pah’ o zuɣu.

³⁴Ka Bɛnhadad daa yɛl’ o, “M ba ni daa fa tin’ shɛŋa a ba san’ la, n ni labisi li ti a. Ka a ni tooi ka Damaskus na nti me feeranim’ zali kaman m ba ni daa niŋ shɛm Samaria la.” Ka Izraɛl naa maa daa yɛl’ o, “A ni yɛli shɛm ŋɔ zuɣu, n ni bah’ a.” Ka daa lo o alikauli, ka chɛ ka o chaŋ.

³⁵Ka Yawɛ daa yɛl’ anabinim’ yino ni o yɛlim’ o kpee, “Ŋmɛm’ ma.” Amaa ka o kpee maa daa zaɣisi ni o ku ŋme o.

³⁶ Di saha ka o daa yɛl’ o, “Nyama, a ni zaɣisi Yawɛ noli zuɣu, a yi ŋmaligi n sani chana, di ku yuui ka gbuɣinli gbaag’ a ku.” Ka o ni daa kul ŋmalig’ o sani, ka gbuɣinli shiri chirig’ o gbaag’ o ku.

³⁷Ka anab’ maa daa lan chaŋ do’ so sani ti yɛl’ o, “Ŋmɛm’ ma.” Ka doo maa daa ŋme o, ŋ-ŋme n-ti o daŋa.

³⁸Ka anab’ maa daa bo tani n-lo o nini n-taɣ’ o biɛhigu ŋ-ŋmaligi yi sol’ ni ti ʒiɛya guhiri naa.

³⁹Ka naa maa daa ti garita, ka anab’ maa daa kuhi yɛli naa maa, “Man’ ŋun nyɛ a dabili ŋɔ daa ti chaŋ tɔb’ ni, ka tɔbbi’ so ti zaŋ do’ so na nti ti ma ka yɛli ma, ‘Gbib’ doo maa viɛnyɛliŋga, a yi chɛ ka o faai zo, a ni zaŋla a nyɛvili n-yo o nyɛvili samli, ka di yi pa lala, a ni yo anzinfa laɣibaligu tusaata[9].’

⁴⁰Amaa ka a dabili nini daa ti moog’ o tuma zuɣu, ka doo maa zo n-tiligi.” Ka Izraɛl naa maa yɛl’ o, “A saria karibu ni nyɛ shɛm m-bala; dama amaŋmaŋ’ pun wuhi samli ni nyɛ shɛm.”

⁴¹Ka anab’ maa daa viligi tan’ shɛli o ni zaŋ lo o ninni maa, ka Izraɛl naa maa baŋ ni o nyɛla anabinim’ ni yino.

⁴²Ka anab’ maa yɛl’ o, “Yawɛ yɛliya, ‘A ni zaŋ n ni yɛl’ a ni a ku do’ so la bahila zuɣu, a ni zaŋ a nyɛvili yo o nyɛvili samli; ka zaŋ a tɔbbihi gba nyɛviya yo o tɔbbihi nyɛviya samli.’ ”

⁴³Ka Izraɛl naa maa daa kul’ o yiŋa Samaria ni sujee ti fo n-ʒiya.