Read Dagbani 1 Nanima 3 Bible Online

1 Nanima 3 - Dagbani bible

1 Nanima 3

¹Sulemaana daa laɣi Ijipti naa Firawuna zɔri o bipuɣiŋga kpuɣibu zuɣu. Ka Sulemaana daa kpuɣi Firawuna bipuɣiŋga maa n-zaŋ o na ti niŋ Dauda tiŋ’ la ni hal ka bɛ ti me omaŋmaŋ’ yiŋ’ mini Yawɛ jɛmbu duu ni gooni gili Jɛrusalɛm naai.

²Bɛ ni daa na bi me Yawɛ jɛmbu duu la zuɣu, niriba daa maani sara la maligu bimbina zuɣu.

³Sulemaana daa yuri Yawɛ, ka dol’ o ba Dauda ni daa zal’ o shɛm, o daa naɣ’ maanila sara maligunim’ ka tuɣindi tulaale zim sara maligu bimbina zuɣu.

⁴Ka naa daa ti chaŋ Gibiɔn ni o ti mali sara shɛli nimaani, dama nimaani n-daa nyɛ sara maligu shee din galisi pam. Sulemaana daa yi zaŋdila bɛ ni mali sara maligu shɛli nyɔri buɣim la bin’ tuhili m-maani sara bimbini maa zuɣu.

⁵Gibiɔn maa ka Yawɛ daa ti ka Sulemaana sanna zahindi ni yuŋ nti yɛl’ o, “Suhim’ a ni bɔri ni n ti a shɛli.”

⁶Ka Sulemaana yɛli, “A daa yur’ a dabili m ba Dauda pam, o ni daa dol’ a ni ʒiɛyimtali mini wuntitali ni biɛritibitali o suhu ni la zuɣu, ka a daa yu o yurilim maa tatabo, ka ti o bidibiga ni o ʒin’ o nam ʒiishee zuŋɔ dabisili ŋɔ.

⁷Ka pumpɔŋɔ, Yawɛ ŋun nyɛ Naawuni ŋɔ, a zaŋ mani ŋun nyɛ a dabili ŋɔ leei naa n-ʒili m ba Dauda nam maa ʒiishee hal n ni na kul nyɛ bia ŋɔ zaa yoli, ka m mi bi mi n ni yɛn su niriba shɛm.

⁸Ka mani ŋun nyɛ a dabili ŋɔ nyɛla ŋun be a niriba bɛn nyɛ a ni pii shɛba, ka bɛ galisi pam ka ka kalinli ŋɔ sunsuuni.

⁹Dinzuɣu tim’ man’ ŋun nyɛ a dabili ŋɔ yɛm din ni zaŋ gbib’ a niriba maa, ka tooi baŋ zaɣ’ suŋ ni zaɣ’ biɛɣu woligibu; dama ŋuni n-lee ni tooi gbib’ a niriba bɛn galisi pam ŋɔ?”

¹⁰Ka Naawuni suhu daa paligi Sulemaana ni suhi binshɛli maa zuɣu.

¹¹Ka Naawuni daa yɛl’ o, “A ni suhila yɛm ka bi suhi nyɛvil’ wɔɣinli bee azichi bee a dimnim’ nyaŋbu, amaa ka suhila yɛm din ni chɛ ka a baŋ din tuhi la zuɣu,

¹²nyama, pumpɔŋɔ n ni niŋ a ni yɛli shɛm maa. Nyama, n ti a yɛm mini baŋsim tɛha, ka di chɛ ka ninvuɣ’ shɛb’ bɛn daŋ a tooni puuni so ku ŋman’ a, ka so mi ti ku yiɣis’ a kalinsi nyaaŋa ŋ-ŋman’ a.

¹³Ka n ni lan ti a a ni bi suhi ma shɛli gba pahi. Dina n-nyɛ: N ni ti a azichi mini jilima, ka di chɛ ka bɛ ku zaŋ na’ so m-buɣis’ a hal ni a nyɛvili tariga.

¹⁴Ka a yi ni doli n soya mini n zaligunima ni n fukumsi zalikpana la kaman a ba Dauda ni daa dol’ li shɛm la, dindina n ni ti a nyɛvili wɔɣinli.”

¹⁵Ka Sulemaana daa neei, ka nya ka di nyɛla zahindi ka o zahim maa. Ka o daa chaŋ Jɛrusalɛm nti zani Yawɛ Daalikauli Adaka la tooni m-mali sara shɛli bɛ ni zaŋdi nyɔri buɣim la mini suhudoo sara, ka laɣim’ o kpambaliba zaa na ka bɛ ti puhi chuɣu.

¹⁶Dimbɔŋɔ nyaaŋa ka pagɔra ayi daa ti kana ti gbani naa tooni.

¹⁷Ka paɣ’ yino yɛli, “N dana, m mini paɣ’ ŋɔ n-laɣim be yil’ yini, ka n daa ti dɔɣi, ka o kul bela yili maa ni.

¹⁸Ka n ni daa dɔɣi maa nyaaŋa, di daba ata dali, ka paɣ’ ŋɔ gba daa dɔɣi, m min’ o kɔŋko n-kul be yili maa ni, ka so ka ti sani n-kul pahila ti niriba ayi maa kɔŋko.

¹⁹Ka paɣ’ ŋɔ ti dɔni marig’ o bia yuŋ ka o kpi.

²⁰Ka o yiɣisi yuntisuɣu n-kpuɣi man’ a dab’ paɣ’ ŋɔ bia ŋun do m-baɣi maa nti sɔŋ o tooni, ka zaŋ o bi’ kpiŋ maa na nti sɔŋ n tooni saha shɛli n ni daa gbihira.

²¹Ka n daa ti yiɣis’ asiba ni o mɔɣi, ka nya ka o kpimi. Amaa ka n daa lih’ o viɛnyɛliŋga asiba maa n-nya ka o pala m bi’ so n ni daa dɔɣi maa.”

²²Amaa ka paɣ’ ŋuni maa yɛli, “Aai! M bia n-nyɛ bi’ nɛɔŋ ŋɔ, ka a bia nyɛ bi’ kpiɔŋ ŋɔ!” Ka paɣ’ so ŋun daŋ tooni maa yɛli, “Aai! A bia n-nyɛ bi’ kpiɔŋ ŋɔ, ka m bia nyɛ bi’ nɛɔŋ ŋɔ!” Lala ka bɛ daa yɛri naa maa tooni.

²³Di saha ka naa daa yɛli, “Yi ni yino yɛliya, ‘M bia n-nyɛ bi’ nɛɔŋ ŋɔ, ka bi’ kpiɔŋ ŋɔ nyɛ a bia,’ ka ŋun’ la mi yɛli, ‘Aai! M bia n-nyɛ bi’ nɛɔŋ maa, ka bi’ kpiɔŋ ŋɔ nyɛ a bia.’ ”

²⁴Ka naa daa yɛli, “Zaŋmiya takɔbi ti ma na.” Ka bɛ daa zaŋ takɔb’ na nti ti naa.

²⁵Ka naa yɛli, “Pirigimiya bi’ nɛɔŋ maa buyi n-zaŋ o pirigili ti yino, ka zaŋ o pirigili din’ la n-ti ŋun’ la mi.”

²⁶Ka paɣ’ so ŋun daa su bi’ nɛɔŋ maa puu daa biɛr’ o bia maa zuɣu, ka o yɛli naa, “N dana, zaŋm’ bia maa ti o ka di ku o.” Amaa ka paɣ’ ŋun’ la yɛli, “Pirigim’ o buyi, ka o lan pa n dini bee o dini.”

²⁷Di saha ka naa daa yɛli, “Zaŋmiya bi’ nɛɔŋ maa ti paɣ’ so ŋun daŋ tooni ŋɔ ka di ku o, ŋuna n-nyɛ bia maa ma.”

²⁸Ka Izraɛlnim’ zaa daa wum naa ni kari saria maa ŋ-ŋmaai li shɛm maa, ka bɛ daa lu naa maa sizuura, dama bɛ daa baŋya ni Naawuni yɛm be o ni, ka o ni kariti saria ka di doli zaligu soli.