Read Dagbani 1 Nanima 4 Bible Online

1 Nanima 4 - Dagbani bible

1 Nanima 4

¹Naa Sulemaana n-daa diri nam n-su Izraɛlnim’ zaa.

²Ninvuɣ’ shɛb’ bɛn daa nyɛ o tuma zuɣulaannim’ yuya m-bɔŋɔ: Zadok bia Azaria n-daa nyɛ maligumaana.

³Ka Shisha bihi Ɛlihɔrɛf mini Ahija nyɛ gbansabiriba. Ka Ahilud bia Jɛhɔshafat nyɛ ŋun su gbana gbibbu fukumsi.

⁴Ka Jɛhɔiada bia Bɛnaaya nyɛ tɔbbihi sapashin’ kpɛma. Ka Zadok mini Abiata nyɛ maligumaaniba.

⁵Ka Neetan bia Azaria nyɛ tuma kpamba zuɣulana. Ka Neetan bia Zabud nyɛ maligumaana ni naa zɔsimo.

⁶Ka Ahishar nyɛ ŋun su nayili fukumsi. Ka Abida bia Adɔniram mi nyɛ bɛn tumdi tuun’ kpɛma zuɣulana.

⁷Sulemaana daa piila zuɣulaannim’ pinaayi ni bɛ su Izraɛl tiŋgbɔŋ zaa. Bɛ tuma daa nyɛla bɛ bɔri bindira na nti tiri ŋun’ naa min’ o yiŋnima, bɛ zaa yinoyino daa yi sula bindira maa bɔbu goli yiniyini yuuni kam puuni.

⁸Bɛ yuya m-bɔŋɔ: Bɛnhur ŋun daa be Ifriim tiŋgban’ ni zoya zuɣu tinsi ni la

⁹mini Bɛndɛka ŋun daa be Makaz la ni Shaalibim ni Bɛtishɛmɛshi ni Ɛlɔnbɛtihanan

¹⁰ni Bɛnhɛsɛd (ŋun daa be Arubɔt ka su Soko mini Hɛfa) tiŋgbɔŋ zaa la

¹¹ni Bɛnabinadab ŋun daa su Nafatido tiŋgbɔŋ zaa, ka daa kpuɣi Sulemaana bipuɣiŋga Tafat la

¹²ni Ahilud bia Baana ŋun daa su Taanak mini Mɛgido ni bɔb’ shɛli zaa din zaŋ ti miri Bɛtishɛan din baɣi Zarɛtan ka be Jɛziriil tooni n-yi Bɛtishɛan n-zaŋ ti paai Ɛbɛlimɛhola n-zaŋ nimaani hal ti paai Jokimiam yaɣili polo la

¹³ni Bɛngɛba ŋun daa be Ramɔtigiliad la (ŋuna n-daa su Manaasa bia Jair tiŋkpansi din be Giliad la, ka lan su Arigɔb yaɣili din be Bashan, ka mali fɔntiŋ’ kara pihiyɔbu, ka bɛ me goma gil’ li, ka niŋ daanya kur’ wɔɣila niŋ li la)

¹⁴ni Iddo bia Ahinadab ŋun daa be Mahanaim la

¹⁵ni Ahimaaz ŋun daa be Naftali (ka daa kpuɣi Sulemaana bipuɣiŋga Basɛmat niŋ o paɣ’ la)

¹⁶ni Hushai bia Baana ŋun daa be Asha mini Biilɔt yaɣili polo la

¹⁷ni Parua bia Jɛhɔshafat ŋun daa be Isaka tiŋgban’ ni la

¹⁸ni Ɛla bia Shimɛi ŋun daa be Bɛnjamin tiŋgban’ ni

¹⁹ni Uri bia Gɛba ŋun daa be Giliad din nyɛ Amɔrinim’ naa Sihɔn mini Bashan naa Ogi tiŋgbɔŋ ni la. Ka zuɣulaan’ yino daa be Juda tiŋgban’ ni.

²⁰Judanim’ mini Izraɛlnim’ daa galisimi kaman teeku duli bihigu la, ka bɛ daa diri ka nyuri ka mali suhupiɛlli.

²¹ Sulemaana daa diri n-sula na’ shɛb’ bɛn zaa daa be Yufretiiz Mɔɣili noli zaŋ hal ti paai Filistianim’ tiŋgbɔŋ ni hal ti kpa Ijiptinim’ tiŋgbɔŋ tariga; ka bɛ daa yɔri farigu o sani ka jɛmd’ o hal ni o nyɛvili tariga.

²²Sulemaana yiŋ’ dahin yini mɔni daa yi nyɛla bɔrɔbɔro zim viɛlli lita tusaanu zim maŋli lita tuhi’ pia

²³ni naɣila kpaba pia mini naɣ’ pisi bɛn nyari mɔri ŋubiri viɛnyɛliŋga ni piɛri kɔbiga m-pahi wolidibisi ni kparibudibisi ni saŋkpalindibisi ni no’ kara.

²⁴Dama ŋuna n-daa su tiŋgban’ shɛli din be Yufretiiz Mɔɣili wulinluhili polo la zaa zaŋ tabili Tifisa hal ti paai Gaza. Ŋuna n-daa su nanim’ bɛn be Yufretiiz Mɔɣili wulinluhili polo maa, ka suhudoo daa kul be o mini tinduyanim’ bɛn gil’ o luɣilikam zaa sunsuuni.

²⁵Ka Judanim’ mini Izraɛlnim’ bɛn daa be Dan tiŋgban’ ni zaŋ hal ti paai Bɛrishiiba tiŋgban’ ni nim’ zaa kul be ni alaafee, ka sokam ʒin’ omaŋmaŋ’ yiŋ’ wain tihi mini fiig tihi gbina ni Sulemaana ʒiɛmani maa ni.

²⁶ Sulemaana daa lan malila chɛchɛbunsi yuri duri tuhi’ pihinahi; ka mali wɔribariba tuhi’ pinaayi.

²⁷Ka zuɣulaannim’ la daa kul tahiri bindira na ti tiri Naa Sulemaana mini bɛnkam zaa dir’ o yiŋa, bɛ zaa yinoyino ni o ni su gol’ shɛli, bɛ mi daa bi chɛri ka binshɛli poor’ o.

²⁸Ka bɛ daa lan ʒiri chi mini wɔrimɔri na nti tiri yuri mini tɔb’ wɔr’ shɛb’ bɛn zɔri pam nayili maa kaman bɛ ni daa zali bɛ zaa yinoyino ni o niŋm’ shɛm.

²⁹Ka Naawuni daa ti Sulemaana yɛm mini baŋsim din ka buɣisibu ni tɛhi’ wɔɣila ka di galisi kaman mɔɣ’ bihigu la

³⁰ni di chɛ ka Sulemaana yɛm maa gari wulimpuhili polɔnim’ zaa yɛm zaŋ tabili Ijiptinim’ zaa yɛm.

³¹O daa nyɛla yɛndana n-gari yɛnnim’ zaa. Hal o daa nyɛla yɛndana n-gari Ɛtan ŋun daa nyɛ Ɛzra nir’ la mini Hɛman ni Kalikol ni Darida bɛn daa nyɛ Mahol bihi la. Ka o yuli daa du pam zuliya shɛb’ bɛn gili ba zaa ni.

³² O daa ŋahila ŋaha tusaata, ka o ni daa yili yil’ shɛŋa mi daa nyɛ tuhilinaanu.

³³O daa tɔɣisi tihi yɛla. Sida tihi din be Lɛbanɔn zaŋ tabili taaŋkɔro tuturi din bili tam goma zuɣu yɛla; ka daa lan tɔɣisi biŋkɔbiri mini noonsi ni nyɛbisi ni zahim gba yɛla.

³⁴Ka niriba daa yi zuliya balibu kam ni mini dunia ŋɔ nanim’ zaa bɛn daa pun wum Sulemaana yɛm maa yɛla sani n-ka o sanna ni bɛ ti wum o yɛm maa yɛtɔɣa.