Read Dagbani 1 Nanima 5 Bible Online

1 Nanima 5 - Dagbani bible

1 Nanima 5

¹Ka Taai Naa Hiram daa ti wum ni bɛ leei Sulemaana nam n-zal’ o ba zaashee, ka o daa tim tuumba Naa Sulemaana sani, dama Naa Hiram daa yuri Dauda pam.

²Ka Sulemaana daa tim ti yɛli Hiram,

³“A mi ni m ba Dauda min’ o dimnim’ bɛn gil’ o daa kul tuhirila taba hal ka Yawɛ daa ti chɛ ka o nyaŋ ba. Lala zuɣu n-daa chɛ ka o bi tooi me Yawɛ ŋun nyɛ o Naawuni ŋɔ jɛmbu duu.

⁴Amaa pumpɔŋɔ, Yawɛ ŋun nyɛ n Naawuni ŋɔ ti ma vuhim luɣilikam, ka n ka dima bee zuɣubiɛɣu yɛl’ shɛli.

⁵ Dinzuɣu ka n lo nia ni m me jɛmbu duu ti Yawɛ ŋun nyɛ n Naawuni ŋɔ kaman ŋun’ Yawɛ ni daa pun yɛli m ba Dauda, ‘N ni ti yɛn zaŋ a bi’ so leei naa zal’ a zaashee n-ni ti me jɛmbu duu ti ma.’

⁶Dinzuɣu pumpɔŋɔ chɛ ka bɛ ŋma Lɛbanɔn sida dari ti ma, ka n chɛ ka n tumtumdiba kana ti pah’ a tumtumdiba maa zuɣu, ka n yo a a ni zali ni n yo a tumtumdiba maa zuɣu shɛm; dama a mi ni so ka ti ni m-mi dakuɣiri ŋmabu kaman Sidɔnnima.”

⁷Hiram ni daa wum Sulemaana ni yɛli shɛm maa, ka di niŋ o nyaɣisim pam, ka o yɛli, “Zuŋɔ dabisili ŋɔ m paɣiri Yawɛ ŋun ti Dauda bi’ yɛndana ni o su ninvuɣ’ shɛb’ bɛn galisi pam ŋɔ.”

⁸Ka Hiram daa tim ti yɛli Sulemaana, “N wum a ni tim na nti yɛli ma shɛm la, ka m mali shili ni n-niŋ a ni bɔri shɛlikam zaa zaŋ chaŋ sida dakuɣiri mini sipirɛs dakuɣuri ŋmabu polo la.

⁹N tumtumdiba ni zaŋ dakuɣiri maa Lɛbanɔn n-tahi teeku ni nti lo li tabili taba n-zaŋ li doli teeku n-tah’ a ni wuhi luɣ’ shɛl’ la nti lɔrigi li nimaani ka yi deei li. Ka a mi ti m mini n yiŋnim’ bindirigu din nyɛ n gba ni bɔri shɛl’ la.”

¹⁰Dinzuɣu ka Hiram daa ti Sulemaana sida mini Sipirɛs dakuɣ’ shɛŋa zaa o ni daa bɔra.

¹¹Ka Sulemaana mi daa bo alikama din tibisim nyɛ tɔn tusaayi mini kpa’ viɛlli lita tuhi’ kɔbisinahi n-ti Hiram min’ o yiŋnima. Lala ka Sulemaana daa kul niŋdi tiri Hiram yuuni kam.

¹²Ka Yawɛ daa shiri ti Naa Sulemaana yɛm kaman o ni daa lo o alikauli shɛm, ka suhudoo daa be o mini Hiram sunsuuni; ka bɛ niriba ayi maa daa niŋ naŋgban’ yini.

¹³Ka Naa Sulemaana daa zali Izraɛlnim’ zaa ni bɛ bom’ tumtumdiba na ka bɛ ti tum tuma, ka bɛ ni daa bo tumtumdib’ shɛb’ na kalinli daa yiɣisi ninvuɣ’ tuhi’ pihita.

¹⁴ Ka o daa chɛ ka bɛ ninvuɣ’ tuhi’ piapia chani Lɛbanɔn nti niŋdi goli yiniyini ka tiri taba. Bɛ daa niŋdila goli yiniyini Lɛbanɔn, ka niŋdi chira ayiyi yiŋ’ mi. Adɔniram n-daa nyɛ niriba maa zuɣulana.

¹⁵Sulemaana daa lan mali ʒiʒiriba tuhi’ pisopɔin mini kuɣikpɛriba tuhi’ pihinii zoya ni tiŋ’ la ni

¹⁶m-pahi ŋun’ Sulemaana tuma zuɣulaannim’ tusaata ni kɔbisita shɛb’ bɛn daa lihiri tumtumdiba maa ka bɛ tumdi tuma la.

¹⁷Ka naa daa chɛ ka bɛ kpe kuɣ’ viɛla zaɣ’ kara ni bɛ zaŋ li me duu maa tanzaa m-pahi kuɣ’ shɛŋa bɛ ni daa mali ka di viɛla.

¹⁸Ka naa Sulemaana mini Hiram ni Gɛba tumtumdiba daa kpe kuɣa, ka ŋma dakuɣiri m-mal’ li ni bɛ zaŋ me duu maa.