Read Dagbani 2 Nanima 10 Bible Online

2 Nanima 10 - Dagbani bible

2 Nanima 10

¹Ɛhab daa malila bidibisi pisopɔin, ka bɛ be Samaria. Ka Jɛhu daa sab’ gbana zaŋ tim Samaria nti ti tiŋ’ maa nanim’ mini tiŋ’ kpamba ni ninvuɣ’ shɛb’ bɛn gbibi Ɛhab bidibisi maa n-yɛli,

²“To, yinima n-su Ɛhab bidibisi la fukumsi, ka su o chɛchɛbunsi min’ o yuri ni bidibbina ni bɛ ni me birini gili tin’ shɛŋa la, dinzuɣu yi yi deei gbaŋ’ ŋɔ,

³yin’ piimiya yi dan’ bidibisi maa ni ŋun be viɛnyɛla ka simdi ni o niŋ naa n-zaŋ o ʒil’ o ba nam ʒiishee; ka tuhi sɔŋ yi naa maa daŋ niriba.”

⁴Amaa ka dabiɛm daa gbaai ba pam, ka bɛ yɛli, “Nyama, nanima ayi bi tooi nyaŋ o, ka wula ka tinim’ ni tooi nyaŋ o?”

⁵Dinzuɣu ka ninvuɣ’ so ŋun daa su nayili fukumsi mini ŋun su tiŋ’ maa fukumsi ni kpamba ni bɛn gbibi nabihi maa daa tim ti yɛli Jɛhu, “Ti nyɛla a daba, ka ni niŋ a ni yɛli ni ti niŋ shɛlikam zaa. Ti ku zaŋ so leei naa, kul niŋm’ a ni nya ka shɛli viɛl’ a sani.”

⁶Di saha ka Jɛhu daa lan sab’ ba gban shɛli din pah’ ayi yɛli, “Yi yi bela m polo, ka ni deei n noli, yin’ ŋmamiya yi dan’ bidibisi maa zuɣuri n-zaŋ li ka n sanna Jɛziriil biɛɣuni ŋ-ŋɔ tasaha.” Naa bidibisi pisopɔin maa daa bela tiŋ’ maa ni ninvuɣ’ zuɣuri sani ka bɛ wumsiri ba.

⁷Bɛ ni daa deei Jɛhu gbaŋ maa, ka bɛ gbahi naa bidibisi pisopɔin maa n-ku ba, ka ŋmahi bɛ zuɣuri niŋ piɛri ni n-zaŋ li tahi Jɛziriil ti ti o.

⁸Tumo ni daa kana ti yɛl’ o, “Bɛ zaŋ naa bidibisi maa zuɣuri na,” o daa yɛlimi, “Zaŋmiya li sɔŋ duya ayi tiŋ’ ŋɔ dunol’ ni hal ka biɛɣu ti neei.”

⁹Ka biɛɣu daa neei, ka o yi n-chaŋ ti zani ka yɛli niriba maa zaa, “Yi ka taali. Mani n-daa lo nia biɛɣu n-ku n dana, amaa ka ŋun mi n-lee ku bɛmbɔŋɔ zaa?”

¹⁰Dinzuɣu baŋmiya ni Yawɛ ni daa yɛli shɛlikam zaa zaŋ chaŋ Ɛhab min’ o daŋ zaa polo la shɛli ku yiɣisi. Yawɛ niŋmi kaman o ni daa chɛ ka o dabili Ilaija yɛli shɛm la.

¹¹ Dinzuɣu ka Jɛhu daa bahi ku Ɛhab daŋ niriba min’ o ninvuɣ’ zuɣuri ni o zɔnim’ ni o tindaannim’ zaa bɛn daa kpalim be Jɛziriil, ka o ninvuɣ’ so daa bi kpalim.

¹²Ka Jɛhu daa yi nimaani n-chani Samaria n-daa ti paai luɣ’ shɛli bɛ ni booni Piɛguliba Dooshee la

¹³n-tuhi Juda Naa Ahazia dɔɣiriba soli m-bɔhi ba, “Banima n-lee nyɛn ya?” Ka bɛ garigi yɛl’ o, “Ti nyɛla Naa Ahazia dɔɣiriba, ka kana ni ti ti kaai nabihi mini napaɣ’ Jɛzibɛl bidibisi.”

¹⁴Ka Jɛhu yɛl’ o niriba, “Gbahimiya ba zaɣ’ nɛma!” Ka bɛ daa gbahi ba zaɣ’ nɛma n-ku ba Bɛtɛkɛd bɔɣili gbini. Bɛ daa nyɛla ninvuɣ’ pihinahinaayi. Ka bɛ daa bi chɛ bɛ ni zaɣ’ yino gba.

¹⁵Ka Jɛhu daa lan yiɣisi nimaani n-chani ha ti tuhi Rɛkab bia Jɛhɔnadab soli m-puh’ o ka bɔh’ o, “A ʒe ma yim a suhu ni kaman n ni ʒe a yim n suhu ni shɛm?” Ka Jɛhɔnadab garigi yɛli, “Iin.” Ka Jɛhu yɛl’ o, “Di yi nyɛla lala, nyin’ gbaami n nuu.” Ka o daa gbaag’ o nuu maa; ka Jɛhu kpuɣ’ o niŋ ŋun Jɛhu chɛchɛbuŋ’ ni.

¹⁶Ka Jɛhu lan yɛl’ o, “Doli ma nti nya n suhu ni ye Yawɛ zuɣu shɛm,” ka daa chɛ ka o kpe o chɛchɛbuŋ’ maa ni pah’ o zuɣu.

¹⁷Jɛhu ni daa paai Samaria, o daa kula Ɛhab daŋ niriba bɛn kpalim Samaria zaa. Lala ka o daa niŋ hal ti kpimsi bɛ birili kaman Yawɛ ni daa pun yɛli Ilaija shɛm la.

¹⁸Di saha ka Jɛhu daa laɣim sokam zaa na nti yɛli ba, “Ɛhab daa jɛm Baal la biɛla, amaa man’ yɛn jɛm o la pam.

¹⁹Dinzuɣu pumpɔŋɔ laɣimmiya Baal buɣibahi min’ o jɛmdiba ni o tindaannim’ zaa na, ka di chɛliya ka bɛ ni so kpalim, dama m bɔri ni n zaŋla maligu titali m-mali Baal; ka ŋunkam bi kana ni kɔŋ o nyɛvili.” Amaa yɛŋkiŋkabina soli ka Jɛhu daa doli ni o ku Baal jɛmdiba maa.

²⁰Ka Jɛhu daa lan yɛli, “Molimiya Baal jɛmbu dabisili molo.” Ka bɛ daa moli di molo maa.

²¹Ka Jɛhu daa tim tuumba ka bɛ gili Izraɛl tiŋgbɔŋ maa ni zaa, ka Baal jɛmdiba zaa daa laɣimna, ka so daa bi kpalim ka bi kana. Ka bɛ daa kpe Baal duu maa ni hal ti pal’ li, ka di luɣilikam zaa ti nyɛla niriba.

²²Ka Jɛhu daa yɛli ŋun su bɛ kpariti biɛhigu shee fukumsi, “Zaŋm’ kpariti na nti ti Baal jɛmdiba maa zaa.” Ka o daa zaŋ kpariti maa na nti ti ba.

²³Di saha ka Jɛhu mini Rɛkab bia Jɛhɔnadab daa kpe Baal duu maa ni, ka o yɛli Baal jɛmdiba maa, “Di chɛliya ka Yawɛ jɛmda be yi ni, amaa chɛliya ka di kul nyɛla yinim’ bɛn nyɛ Baal jɛmdiba maa kɔŋko.”

²⁴Di saha ka o daa kpe ni o ti mali maligu, ka mali sara shɛli bɛ ni zaŋdi nyɔri buɣim la. Jɛhu daa zaŋla ninvuɣ’ pihinii zali samban’ ni di saha maa ka yɛli ba, “Ŋun chɛ ka n ni zaŋ ninvuɣ’ shɛb’ niŋ yi nuu ni ŋɔ ni so zo n-tiligi, dilan’ ni kɔŋ o nyɛvili.”

²⁵Dinzuɣu Jɛhu ni daa kul mali sara shɛli bɛ ni zaŋdi nyɔri buɣim maa naai saha shɛli, ka o daa yɛli bɛn guli nimaani mini sapashinnima, kpɛmiya nti ku ba, ka di chɛ ka bɛ ni so tiligi. Bɛ ni daa ku ba naai, ka bɛn daa guli nimaani mini sapashinnim’ maa daa vu ba yihi samban’ ni ka kpe Baal duu maa ni du’ shɛli din be puuni ha ni

²⁶nti kpuɣi Baal jɛmbu binnan’ shɛli din be di ni na nti nyo li buɣim.

²⁷Ka bɛ daa ŋme ŋ-ŋma Baal binnan’ la, ka ŋme n-wurim o duu maa, ka zaŋ nimaani leei bimbɔɣili hal ni zuŋɔ.

²⁸Lala ka Jɛhu daa niŋ kpihim Baal birili zaa Izraɛl tiŋgbɔŋ ni.

²⁹ Amaa ka Jɛhu daa lee bi chɛ Nɛbat bia Jɛrɔbɔam daalahichi tumbu so’ shɛli o ni daa doli n-chɛ ka Izraɛlnim’ tum alahichi la dolibu. Dina n-nyɛ salima naɣibihi shɛb’ bɛn daa be Bɛtɛl mini Dan la jɛmbu.

³⁰Ka Yawɛ daa yɛli Jɛhu, “A ni tum din tuhi n sani, ka niŋ Ɛhab daŋ niriba kaman n suhu ni daa yu shɛm zaa la zuɣu, a daŋ ni bidibisi kul ni diri Izraɛl nam hal ti paai ʒiɛmani din pahir’ anahi ni.”

³¹Amaa ka Jɛhu daa lee bi doli Yawɛ ŋun nyɛ Izraɛl Naawuni ŋɔ zaligu ni o suhu zaa. O daa bi chɛ Jɛrɔbɔam ni daa tum alahichi shɛŋa n-chɛ ka Izraɛlnim’ tum alahichi la soli dolibu.

³²Di saha maa ka Yawɛ daa piligi ŋ-ŋmaari Izraɛl tiŋgbɔŋ bahira. Hazaɛl daa tuhi nyaŋ Izraɛlnim’ bɛn daa be bɛ tintarisi tinsi la ni zaa.

³³Zaŋ Jɔɔdɛn Mɔɣili wulimpuhili polo hal ti paai Giliad tiŋgbani ni Gaad niriba mini Rubin niriba ni Manaasa niriba tiŋgbana zaa n-lan zaŋ Aroa din baɣi Arinɔn Vinvamli la hal ti paai Giliad mini Bashan tiŋgbana.

³⁴Jɛhu ni daa tum tuun’ shɛŋa pahi min’ o ni daa pun tum shɛlikam zaa ni o kpiɔŋ yɛla zaa, bɛ sab’ li niŋ Izraɛl nanim’ litaafi shɛli bɛ ni booni Yɛlikura litaafi la ni.

³⁵Ka Jɛhu daa ti niŋ ŋun kani, ka bɛ sɔɣ’ o Samaria. Ka o bia Jɛhɔahaz daa di nam zan’ o zaani.

³⁶Jɛhu daa dila Izraɛl nam maa ʒini Samaria yuun’ pihitaayika.