Read Dagbani 2 Nanima 11 Bible Online

2 Nanima 11 - Dagbani bible

2 Nanima 11

¹Naa Ahazia ma Atalia ni daa ti wum ni o bia Ahazia kpiya, ka o dii yiɣisi gbaai nabihi kubu.

²Amaa ka Naa Jɔram bipuɣiŋga Jɛhɔshɛba ŋun daa nyɛ Ahazia tizɔpaɣ’ la daa tim nabihi maa ni n-kpuɣi Ahazia bia Jɔash ŋun nyɛ bɛ ni daa kuri shɛb’ maa ni yino min’ o biyola nti sɔɣi Yawɛ jɛmbu duu du’ shɛl’ ni, ka Atalia daa bi nya o ku.

³Ka Jɔash daa kpalim be Jɛhɔshɛba sani n-sɔɣi Naawuni jɛmbu duu maa ni hal ti paai yuma ayɔbu, ka Atalia daa diri nam su tiŋgbɔŋ maa.

⁴Amaa zaŋ chaŋ yuun’ shɛli din pahir’ ayopɔin ni, ka Jɛhɔiada daa tim ti boli sapashinnim’ shɛb’ bɛn daa guli naa mini nayil’ la n-chɛ ka bɛ ka o sanna Yawɛ jɛmbu duu, ka o ti chɛ ka o mini ba lo tab’ alikauli, ka chɛ ka bɛ po pɔri Yawɛ jɛmbu duu maa ni. Ka o daa zaŋ nabia maa wuhi ba.

⁵Di saha ka o daa zali ba zaligu yɛli, “Yi ni yɛn niŋ shɛm m-bɔŋɔ: Yinim’ bɛn ti ka tuma ni na Vuhim Dabisili dali pirigibu buta zuɣu yim n-yɛn guli nayili,

⁶ka yi pirigibu buta zuɣu yim guli Sur Dunɔdal’ la, ka yi pirigibu buta zuɣu yim be dunɔdali din be guliba nyaaŋa la zaa n-guli nayili.

⁷Ka pirigibu buyi zuɣu bɛn bi kanna tuma ni Vuhim Dabisili dali la mi ni guli Yawɛ jɛmbu duu.

⁸Bɛ zaa yinoyino gbib’ bɛ bidibbina bɛ nuhi ni n-ʒe n-gil’ naa, ka ŋunkam kani bɛ sanna, bɛn’ kum’ o. Naa yi ti chani luɣ’ shɛlikam, bɛn’ kul be o sani.”

⁹Ka sapashinnim’ maa daa niŋ kaman maligumaana Jɛhɔiada ni daa yɛli ba shɛm maa. Ka bɛ zaa daa zaŋ bɛ niriba bɛn bi yɛn be tuma ni mini bɛn yɛn be tuma ni Vuhim Dabisili dali n-ka maligumaana Jɛhɔiada sanna.

¹⁰Ka maligumaana Jɛhɔiada daa zaŋ kpana mini nyɔtaɣirisi din daa nyɛ Naa Dauda dini, ka be Yawɛ jɛmbu duu maa ni n-ti sapashinnim’ maa.

¹¹Ka guliba maa zaa daa gbib’ bɛ bidibbina n-ʒiɛya gu Naawuni jɛmbu duu maa nudirigu polo zaŋ ti kpa nuzaa polo m-mali ti gili sara maligu bimbini mini Naawuni jɛmbu duu maa.

¹²Di saha ka Jɛhɔiada daa zaŋ nabia Jɔash n-yina ti booi kpam bah’ o zuɣu ni n-leeg’ o nam; ka zaŋ nam zuɣupiligu pil’ o; ka zaŋ Naawuni kundi ti o; ka bɛ kpahi bɛ nuhi ka yɛli, “Naawuni dolim’ naa ŋɔ nyɛvili!”

¹³Ka napaɣ’ Atalia daa wum vuri maa, ka kpe niriba maa sani Yawɛ jɛmbu duu maa ni

¹⁴ nti nya ka naa maa ʒe n-tabi daantaliga kaman bɛ kali ni daa nyɛ shɛm; ka sapashinnim’ mini kikapiɛbiriba ʒe m-baɣ’ o. Ka bɛ tiŋgbɔŋ maa nim’ zaa daa mali suhupiɛlli, ka piɛbiri kikahi. Ka Atalia daa darigi toog’ o chinchini ka kuhi yɛli, “Nyaanyibo! Nyaanyibo!”

¹⁵Ka maligumaana Jɛhɔiada daa yɛli sapashinnim’ bɛn su tɔbbihi fukumsi la, “Zaŋmiy’ o doli guliba maa sunsuuni gari, ka zaŋ takɔb’ ku ŋunkam be o polo.” Dama maligumaana maa daa yɛlimi, “Di kuny’ o Yawɛ jɛmbu duu puuni.”

¹⁶Ka bɛ daa gbaag’ o n-zaŋ o doli yuri dunoli polo nti kpe nayili n-ku o nimaani.

¹⁷Ka Jɛhɔiada daa chɛ ka Naa Jɔash mini niriba lo Yawɛ alikauli ni bɛ ni nyɛla ŋun’ Yawɛ niriba; ka lan chɛ ka niriba maa mini naa gba lo tab’ alikauli.

¹⁸Di saha ka tiŋgbɔŋ maa ni niriba zaa daa chaŋ Baal jɛmbu duu nti ŋme n-wurim li, ka wurim di bimbina, ka ŋme n-wurim di binnana, ka ku Matan ŋun daa nyɛ Baal tindan’ la bimbina maa tooni. Ka maligumaana Jɛhɔiada daa bo guliba n-zali, ka bɛ guli Yawɛ jɛmbu duu.

¹⁹Ka o daa zaŋ sapashin’ kpamba mini bɛn guli naa ni nayili guliba ni tiŋgbɔŋ maa niriba zaa m-pa omaŋ’ zuɣu, ka bɛ zaŋ naa maa yi Yawɛ jɛmbu duu maa ni n-gam giŋgaani ti gari guliba dunol’ la ni n-chaŋ ti kpe nayili, ka o ti ʒin’ o nam ʒiishee din nyɛ nanim’ ʒiishee la.

²⁰Ka bɛ tiŋgbɔŋ maa niriba zaa daa mali suhupiɛlli, ka bɛ tiŋ’ maa daa maai bɛ ni daa zaŋ takɔb’ ku Atalia nayili puuni maa nyaaŋa.

²¹Jɔash yuma daa nyɛla yuma ayopɔin o ni daa di nam saha shɛli maa.