Read Dagbani 2 Nanima 13 Bible Online

2 Nanima 13 - Dagbani bible

2 Nanima 13

¹Juda Naa Ahazia bia Naa Jɔash ni daa di Juda nam zaŋ chaŋ yuun’ pisinaata saha, ka Jɛhu bia Jɛhɔahaz daa di Izraɛl nam n-ʒi Samaria. O daa diya n-niŋ la o nam maa ni yuun’ pinaayopɔin.

²O daa tum alahichi Yawɛ sani, ka doli Nɛbat bia Jɛrɔbɔam ni daa tum alahichi shɛŋa n-chɛ ka Izraɛlnim’ tum alahichi la naba, ka daa bi ŋmaligi ka chɛ li.

³Ka Yawɛ suhu daa yiɣisi bahi Izraɛlnim’ zuɣu, ka o chɛ ka Siria Naa Hazaɛl min’ o bia Bɛnhadad kul tuhiri nyandi ba waawaayili.

⁴Ka Jɛhɔahaz daa suhi Yawɛ, ka Yawɛ deeg’ o suhigu, dama o daa nya nahiŋgu shɛli Siria naa ni nahindi Izraɛlnim’ maa.

⁵Dinzuɣu ka Yawɛ daa ti Izraɛlnim’ maa ninvuɣ’ so ka o fa ba Sirianim’ maa nuu ni bahi; ka Izraɛlnim’ daa lan ʒi bɛ yinsi ni suhudoo kaman bɛ ni daa pun ʒiya shɛm.

⁶Amaa bɛ daa bi ŋmaligi ka chɛ Jɛrɔbɔam min’ o daŋ niriba ni daa tum alahichi shɛŋa n-chɛ ka Izraɛlnim’ tum alahichi la, ka kul dolila di soli maa; ka daa na kul chɛ ka buɣili Ashɛra kpalim be Samaria.

⁷Ka Jɛhɔahaz tɔbbihi daa bi lan yaɣ’ lala. Kulla wɔribariba pihinu mini chɛchɛbunsi pia ni tinchandiba tuhi’ pia, dama Siria naa daa ku bɛn kpalim maa zaa n-no ba taai tiŋa kaman kabɔɣili ni taŋkpaɣu la.

⁸Jɛhɔahaz ni daa tum shɛlikam pahi min’ o ni daa tum shɛlikam ni o kpiɔŋ tuma zaa, bɛ sab’ di yɛla niŋ Izraɛl nanim’ litaafi shɛli bɛ ni booni Yɛlikura litaafi la ni.

⁹Ka Jɛhɔahaz daa ti kani, ka bɛ sɔɣ’ o Samaria; ka o bia Jɛhɔash daa di nam zan’ o zaani.

¹⁰Juda Naa Jɔash ni daa di nam zaŋ chaŋ yuun’ pihitanaayopɔin saha, ka Jɛhɔahaz bia Jɛhɔash daa di Izraɛl nam ʒi Samaria. O daa diya n-niŋ o nam maa ni la yuun’ pinaayɔbu.

¹¹O gba daa tum alahichi Yawɛ sani; ka daa bi chɛ alahichi shɛŋa zaa Nɛbat bia Jɛrɔbɔam ni daa tum n-chɛ ka Izraɛlnim’ tum alahichi la, amaa ka kul dolila di soli maa.

¹²Jɛhɔash ni daa tum shɛlikam pahi min’ o kpiɔŋ tuun’ shɛŋa zaa o ni daa zaŋ tuhi Juda Naa Amazia la, bɛ sab’ di yɛla niŋ Izraɛl nanim’ litaafi shɛli bɛ ni booni Yɛlikura litaafi la ni.

¹³Ka Jɛhɔash daa ti kani, ka bɛ zaŋ o sɔɣi pahi Izraɛl nanim’ zuɣu Samaria; ka o bia Jɛrɔbɔam daa di nam ʒin’ o nam ʒiishee.

¹⁴ Ilaisha kum dɔro ni daa ti gbaag’ o saha shɛli, ka Izraɛl Naa Jɛhɔash daa chaŋ o sani nti ʒi o tooni kumdi yɛra, “M ba! M ba! Izraɛl chɛchɛbunsi ni di wɔribariba!”

¹⁵Ka Ilaisha yɛl’ o, “Kpuɣim’ tɔbu mini piɛma; ka o kpuɣi tɔbu mini piɛma maa.”

¹⁶Ka o yɛli Izraɛl Naa Jɛhɔash, “Malim’ shili n-vooi tɔb’ maa to;” ka o vooi li. Ka Ilaisha zaŋ o nuhi pa naa maa nuhi zuɣu;

¹⁷ka yɛl’ o, “Yoom’ wulimpuhili polo takɔro ŋɔ;” ka o yoo’ li. Ka Ilaisha yɛl’ o, “Toma,” ka o to li. Ka Ilaisha yɛli, “Yawɛ nasara dibu piɛm m-bɔŋɔ, nasara dibu piɛm din yɛn nyaŋ Sirianima m-bala! Dama a ni tuhi Sirianim’ Afɛk hal nti ku n-naai ba.”

¹⁸Ka Ilaisha daa lan yɛli Naa Jɛhɔash, “Kpuɣim’ piɛma;” ka o kpuɣ’ li. Ka Ilaisha yɛl’ o, “Zaŋm’ li fiɛb’ tiŋa;” ka o zaŋ li fiɛb’ tiŋ’ buta ka chɛ lala.

¹⁹Di saha ka Ilaisha daa je suli niŋ o, ka yɛli, “Di di simdi ni a zaŋ li fiɛbila siɣimsiɣim bunu bee buyɔbu; dindina a naan ŋme Sirianim’ hal ti kpimsi bɛ birili, amaa a ni bi niŋ lala maa zuɣu, a ni ŋme n-nyaŋ ba la siɣimsiɣim buta kɔŋko.”

²⁰Ka Ilaisha daa ti kpi ka bɛ sɔɣ’ o. Mɔabnim’ daa kul chanila Izraɛl tiŋgbɔŋ ni shɛɣuni nti fari bɛ bindira yuuni kam.

²¹Ka do’ so daa ti kani, ka bɛ zaŋ o chani ni bɛ ti sɔɣi, ka nya Mɔab ŋmɛnditoya ka zaŋ kpim’ maa bahi Ilaisha siliga ni ka zo. Kpim’ maa ni daa kul lu siliga maa ni ha n-shihi Ilaisha kɔba, o dii neemi yiɣisi zani.

²²Siria Naa Hazaɛl daa kul nahindila Izraɛlnima Naa Jɛhɔahaz ʒiɛman’ ni zaa.

²³Amaa ka Yawɛ daa zo Izraɛlnim’ nambɔɣu ka niŋ ba nirilim; ka sɔŋ ba; o ni daa lo Ibrahimma mini Yisahaku ni Yaakubu alikauli shɛl’ la zuɣu ka o daa bi chɛ ka bɛ zaa kpi. O mi daa bi zaɣisi ba hal ni zuŋɔ.

²⁴Ka Siria Naa Hazaɛl daa ti kani, ka o bia Bɛnhadad di nam zan’ o zaani.

²⁵Di saha ka Naa Jɛhɔash ŋun daa nyɛ Jɛhɔahaz bia la daa lab’ deei tin’ shɛŋa Naa Bɛnhadad Hazaɛl bia ni daa tuh’ o ba Jɛhɔahaz ka fa la. Siɣimsiɣim buta ka Jɛhɔash daa tuhi nyaŋ Bɛnhadad ka fa Izraɛlnim’ tinsi o sani.