Read Dagbani 2 Nanima 14 Bible Online

2 Nanima 14 - Dagbani bible

2 Nanima 14

¹Izraɛl Naa Jɛhɔahaz bia Naa Jɛhɔash ni daa di Izraɛl nam zaŋ chaŋ yuma ayi saha ka Juda Naa Jɔash bia Naa Amazia daa di Juda nam.

²O yuma daa nyɛla yuun’ pisinaanu saha shɛl’ o ni daa di nam maa. O daa diya n-ʒini Jɛrusalɛm la yuun’ pihitayinika. O ma daa nyɛla Jɛrusalɛm paɣa, ka o yuli booni Jɛhɔadin.

³O daa tum din tuhi Yawɛ sani, amaa o daa lee bi be kaman o yab’ Dauda. O daa niŋ o ba Jɔash ni daa niŋ shɛlikam zaa la.

⁴Amaa o daa bi wurim buɣa la; ka niriba daa na kul maani maligu nimaani, ka tuɣindi tulaale zim.

⁵Ka Amazia nam yiko ni daa ti ba jila zaa, di daa bi yuui ka o ku o kpambal’ shɛb’ bɛn daa ku o ba la.

⁶ Amaa o daa bi ku ninvuɣ’ kuriba maa bihi. O ni daa niŋ shɛm maa daa dolila di ni daa sab’ shɛm Musa zaligu ni luɣ’ shɛli Yawɛ ni daa yɛli, “Banim’ ku deei bɛ bihi kum kpi, ka bihi gba ku deei bɛ banim’ kum kpi, amaa sokam ni kpila omaŋmaŋ’ ni tum alahichi shɛli zuɣu.”

⁷Amazia daa lan ku Ɛdom tɔbbihi tuhi’ pia Yalim Vinvamli ni, ka tuhi fa Sɛla m-boli di yuli Joktiɛl, ka di yuli n-na kul bala hal ni zuŋɔ.

⁸Di saha ka Amazia daa tim tuumba nti yɛli Jɛhɔahaz bia Naa Jɛhɔash ŋun daa nyɛ Izraɛl Naa Jɛhu yaaŋa la, “Kamina ka ti ti zaŋ ti gbɛri kpa taba.”

⁹Ka Izraɛl Naa Jɛhɔash daa chɛ ka bɛ lab’ ti yɛli Juda Naa Amazia ni dahin’ shɛli ka Lɛbanɔn goo tutuɣu daa ti tim ti yɛli Lɛbanɔn sida, “Zaŋm’ a bipuɣiŋga ti ma ka n-niŋ m paɣa; ka Lɛbanɔn mɔɣu ni biŋkɔb’ so daa kana ti no goo tutuɣu maa sɔŋ tiŋa.

¹⁰Yɛlimaŋli, a nyaŋ Ɛdomnima, ka karimbaani kpe a suhu ni n-chɛ ka a duh’ amaŋa. Chɛ ka a nini tiɣ’ a jilima, ka ʒi a yiŋa. Bee bɔzuɣu ka a bɔri vuri ni a chɛ ka bɛ ku a tabili Judanima?”

¹¹Amaa ka Amazia daa zaɣisi wumbu. Dinzuɣu ka Izraɛl Naa Jɛhɔash daa chaŋ ka o mini Juda Naa Amazia ti zaŋ bɛ nyɔri yo taba tɔbu ni Bɛtishɛmɛshi din be Juda tiŋgbɔŋ ni la.

¹²Ka Izraɛlnim’ daa nyaŋ Judanima, ka bɛ zaa ŋmaligi zo n-kuli bɛ yinsi.

¹³Ka Izraɛl Naa Jɛhɔash daa gbaai Juda Naa Amazia ŋun daa nyɛ Jɛhɔash so mi bia ka nyɛ Ahazia yaaŋa la Bɛtishɛmɛshi. Di nyaaŋa o daa gari chaŋ Jɛrusalɛm nti wurim di gooni la hal ti paai kaman mita kɔbisiyi tariga. Bɛ daa kpuɣ’ li la Ifriim dunɔdal’ la gbini zaŋ hal ti paai di Gɔŋbu shee dunɔdal’ gbini.

¹⁴Ka o daa kpuɣi salima mini anzinfa ni la’ shɛŋa zaa bɛ ni daa nya Yawɛ jɛmbu duu mini nayili, ka gbahi bɛ ninvuɣ’ shɛba n-zaŋ ba kuli Samaria ti leei daba.

¹⁵Jɛhɔash ni daa tum tuun’ shɛŋa zaa pahi min’ o kpiɔŋ yɛla ni o ni daa tuhi Juda Naa Amazia shɛm la, bɛ sabi di yɛla niŋ Izraɛl nanim’ litaafi shɛli bɛ ni booni Yɛlikura litaafi la ni.

¹⁶Ka Jɛhɔash daa ti kani, ka bɛ sɔɣ’ o Samaria pahi Izraɛl nanim’ zuɣu; ka o bia Jɛrɔbɔam daa di nam zan’ o zaani.

¹⁷Juda Naa Amazia Jɔash bia la daa niŋla yuun’ pinaanu Izraɛl Naa Jɛhɔahaz bia Naa Jɛhɔash kum nyaaŋa.

¹⁸Naa Amazia ni daa tum tuun’ shɛŋa zaa pahi, bɛ sab’ di yɛla niŋ Juda nanim’ litaafi shɛli bɛ ni booni Yɛlikura litaafi la ni.

¹⁹Bɛ ni daa ti lɔri nia biɛɣu zaŋ chaŋ o polo Jɛrusalɛm, o daa zo n-kulila Lakishi. Amaa ka bɛ daa bahi chɛ ka shɛb’ kar’ o naba Lakishi maa nti ku o nimaani.

²⁰Ka bɛ daa zaŋ o pa yuri zuɣu n-ʒi o kuli Jɛrusalɛm nti zaŋ o sɔɣi pah’ o yaannim’ zuɣu Dauda tiŋ’ la ni.

²¹Ka Judanim’ zaa daa zaŋ o bia Azaria ŋun daa nyɛ yuun’ pinaayɔbu bia la n-leei naa zal’ o ba Amazia zaani.

²²Ka Naa Azaria daa me Ɛlat n-labisi li ti Judanima, o ba kum maa nyaaŋa.

²³Juda Naa Amazia Jɔash bia la ni daa di nam zaŋ chaŋ yuun’ pinaanu saha ka Izraɛl Naa Jɛhɔash bia Naa Jɛrɔbɔam daa di Izraɛl nam Samaria. O daa diya n-niŋ o nam maa ni la yuun’ pihinahi ni yini.

²⁴O daa tum alahichi Yawɛ sani, ka daa bi ŋmaligi ka chɛ alahichi shɛŋa zaa Nɛbat bia Jɛrɔbɔam ni daa tum n-chɛ ka Izraɛlnim’ tum alahichi la.

²⁵ O daa tuhi deei Izraɛl tintariga tinsi Lɛbohamat dunol’ shee zaŋ hal ti paai Araba Teeku ni kaman Yawɛ ŋun nyɛ Izraɛl Naawuni ŋɔ ni daa chɛ ka o dabili anabi Jona Amitai bia ŋun daa yi Gatihɛfa la na yɛli shɛm la.

²⁶Dama Yawɛ daa nya Izraɛlnim’ ni nyari nahiŋgu shɛm, ka so daa kani n-nyɛ dabili bee bilichina ka bi nya nahiŋgu ŋɔ; ka so mi daa kani din ni sɔŋ Izraɛlnima.

²⁷Amaa Yawɛ mi daa bi yɛli ni o ni kpihim Izraɛl yuli dunia ŋɔ ni, dinzuɣu ka o daa chɛ ka Jɔash bia Jɛrɔbɔam tiligi ba.

²⁸Jɛrɔbɔam ni daa tum tuun’ shɛŋa zaa pahi min’ o kpiɔŋ yɛla ni o ni daa tuhi tɔb’ shɛm min’ o ni daa deei Damaskus mini Hamat din nyɛ Judanim’ ni su shɛl’ la shɛm, bɛ sab’ di yɛla niŋ Izraɛl nanim’ litaafi shɛli bɛ ni booni Yɛlikura litaafi la ni.

²⁹Ka Jɛrɔbɔam daa ti kani, ka bɛ sɔɣ’ o pah’ o yaannim’ bɛn nyɛ Izraɛl nanim’ zuɣu; ka o bia Zakaria di nam zan’ o zaani.