Read Dagbani 2 Nanima 16 Bible Online

2 Nanima 16 - Dagbani bible

2 Nanima 16

¹Rɛmalia bia Pɛka ni daa di nam zaŋ chaŋ yuun’ pinaayopɔin saha ka Jɔtam bia Naa Ahaz mi daa di Juda nam.

²Ahaz yuma daa nyɛla yuun’ pisi saha shɛl’ o ni daa di nam maa. O daa dila nam maa yuun’ pinaayɔbu Jɛrusalɛm. O daa bi tum din tuhi Yawɛ ŋun nyɛ o Naawuni la sani kaman o yab’ Dauda ni daa niŋ shɛm la,

³ amaa o daa naɣ’ dolila Izraɛl nanim’ ni daa doli so’ shɛl’ la. Hal’ o daa zaŋla omaŋmaŋ’ bidibiga m-mali maligu n-zaŋ o nyo buɣim kaman ninvuɣ’ shɛb’ bɛn daa pun be tiŋgbɔŋ maa ni ni daa niŋdi shɛm ka di nyɛ din chihira, ka Yawɛ daa ti kari ba ka dee’ li ti bɛn’ Izraɛlnim’ la.

⁴O daa kul chanila buɣa jɛmbu shee mini zoya zuɣu ni ti’ mahili kam gbini nti maani maligu ka tuɣindi tulaale zim.

⁵ Di saha ka Siria Naa Rɛzin mini Rɛmalia bia Izraɛl Naa Pɛka daa kana ni bɛ ti tuhi Jɛrusalɛmnima, ka teei gil’ li, amaa ka daa bi tooi nyaŋ Naa Ahaz.

⁶Di saha ka Ɛdom naa daa lab’ ŋme n-deei Ɛlat n-ti Ɛdomnima, ka daa kari Judanim’ yihi Ɛlat maa; ka Ɛdomnim’ maa daa kana ti be Ɛlat hal ni zuŋɔ.

⁷Dinzuɣu ka Ahaz daa tim tuumba Asiria Naa Tigilatipilɛza sani nti yɛl’ o, “N nyɛla a bia ni a dabili, kamina nti fa ma Siria naa mini Izraɛl naa bɛn kana ti liri ma ŋɔ nuu ni bahi.”

⁸Ka Ahaz daa zaŋ anzinfa mini salima shɛli bɛ ni daa nya Yawɛ jɛmbu duu mini nayili azichi biɛhigu shee la n-tim ti ti Asiria naa pini.

⁹Ka Asiria naa daa wum Ahaz ni yɛli shɛm maa, ka zaŋ o tɔbbihi chaŋ Damaskus nti ŋme n-nyaŋ ba, ka ku Rɛzin; ka gbahi di niriba n-kuli Kɛɛr nti leei daba.

¹⁰Naa Ahaz ni daa chaŋ Damaskus ni o ti nya Asiria Naa Tigilatipilɛza, ka o daa nya bimbin’ shɛli Damaskus maa. Ka ŋun’ Naa Ahaz daa zaŋ bimbini maa biɛhigu ni nyɛ shɛm ni di yɛlli kam zaa n-tim ti ti maligumaana Yuria.

¹¹Ka maligumaana Yuria daa me sara maligu bimbini maa kaman Naa Ahaz ni daa be Damaskus ka tim ti wuh’ o shɛm zaa la. Ka maligumaana Yuria daa me sara maligu bimbini maa naai pɔi ka Naa Ahaz naanyi yi Damaskus kuna.

¹²Naa Ahaz ni daa yi Damaskus kuna, o daa chaŋmi ti nya bimbini maa. Di saha ka o daa vu m-miri bimbini maa nti du n-tam di zuɣu

¹³m-mali maligu zaŋ li nyo buɣim, ka zaŋ chi mali maligu di zuɣu; ka booi binnyura mali sara di zuɣu; ka lan kɔrig’ o suhudoo sara maligu biŋkɔbigu n-yih’ o ʒim bahi bimbini maa zuɣu.

¹⁴ Ka ŋun’ Naa Ahaz daa vuui daanya bimbin’ shɛli din daa be Yawɛ jɛmbu duu tooni la. O daa vuui li la omaŋmaŋ’ bimbin’ la mini Yawɛ jɛmbu duu bimbin’ la sunsuuni n-zaŋ li zal’ omaŋmaŋ’ bimbini maa nuzaa polo.

¹⁵Ka Naa Ahaz daa yɛli maligumaana Yuria, “Bimbin’ titali ŋɔ zuɣu ka a yɛn maani asibaasi sara shɛli bɛ ni zaŋdi nyɔri buɣim la mini zaawuni chi sara ni naa sara shɛli o ni zaŋdi nyɔri buɣim la min’ o chi sara ni tiŋgbɔŋ ŋɔ ni niriba zaa sara shɛli bɛ ni zaŋdi nyɔri buɣim mini bɛ chi sara ni di binnyura sara; ka zaŋ sara shɛli bɛ ni zaŋdi nyɔri buɣim la biŋkɔbiri ʒim zaa ni sara maligu biŋkɔbiri ʒim zaa n-vie bimbini maa, amaa daanya bimbini ŋɔ yɛn nyɛla mmaŋmaŋ’ dini, ka m mal’ li bɔhiri baŋdi binshɛŋa din yɛn niŋ.”

¹⁶Ka maligumaana Yuria daa niŋ Naa Ahaz ni yɛli ni o niŋ shɛm maa zaa.

¹⁷ Ka Naa Ahaz daa wurim tɔroko shɛŋa din daa be Naawuni jɛmbu duu la naba, ka yihi tahi’ shɛŋa din tamtam di zuɣu; ka yihi kɔniŋdi bini din daa tam daanya naɣilahi bɛn be di lɔŋni zuɣu n-zaŋ li tam tanzaa kuɣili zuɣu.

¹⁸Ka o daa lan wurim bɛ ni daa me binshɛli zali nayili Vuhim Dabisili zuɣu la, ka ŋari Yawɛ jɛmbu duu sambani polo duno’ shɛli bɛ ni daa chib’ ti naa ni o doli kpɛr’ la. Asiria naa zuɣu ka o daa niŋ shɛm maa.

¹⁹Naa Ahaz ni daa tum tuun’ shɛŋa zaa pahi, bɛ sab’ di yɛla niŋ Juda nanim’ litaafi shɛli bɛ ni booni Yɛlikura litaafi la ni.

²⁰ Ka Naa Ahaz daa ti kani, ka bɛ zaŋ o sɔɣi pah’ o yaannim’ zuɣu Dauda tiŋ’ la ni; ka o bia Hɛzɛkia daa di nam zan’ o zaani.