Read Dagbani 2 Nanima 19 Bible Online

2 Nanima 19 - Dagbani bible

2 Nanima 19

¹Naa Hɛzɛkia ni daa wum yɛtɔɣa ŋɔ, o daa darigi toola o binyɛrigu, ka zaŋ buɣu ye n-chaŋ Yawɛ jɛmbu duu.

²Di nyaaŋa ka o daa tim Ɛliakim ŋun daa su nayili fukumsi la mini Shɛbina ŋun daa nyɛ gbaŋŋmar’ la ni maligumaaniba kpamba bɛn daa ye buri Amɔz bia anabi Aizaia sani.

³Ka bɛ daa chaŋ ti yɛl’ o, “Hɛzɛkia yɛliya, ‘Zuŋɔ nyɛla nandahima mini ti zuɣu ni kpahibu ni vi dihibo dabisili. Bihi dɔɣibu saha paaya ka yaa kani n-dɔɣiri ba.

⁴Di pa shɛli Yawɛ ŋun nyɛ a Naawuni ŋɔ wum Rabishake Asiria naa ni tim so na ka o ti mali Naawuni ŋun be ŋɔ ansarisi ni yɛtɔɣ’ shɛŋa la zaa, ŋuna Yawɛ ŋun nyɛ a Naawuni ŋɔ ni darig’ o ni wum yɛtɔɣa shɛŋa maa ninvuɣ’ shɛb’ nol’ ni maa tibili; dinzuɣu suhim’ Naawuni ti ti ninvuɣ’ shɛb’ bɛn kpalim.’ ”

⁵Naa Hɛzɛkia tuumba maa ni daa paai Aizaia sani,

⁶Aizaia daa yɛli ba mi: “Labimiya ti yɛli yi dana ni Yawɛ yɛliya, ‘Di chɛ ka dabiɛm mal’ a, a ni wum ka Asiria naa tuumba kana ti tɔɣisi yɛtɔɣ’ shɛŋa tu ma la zuɣu.

⁷Mmaŋmaŋ’ ni zaŋ shi’ so niŋ o ni, ka di chɛ ka o wum ŋumaŋuma yɛla ka ŋmaligi lab’ omaŋmaŋ’ tiŋgbɔŋ ni, ka n chɛ ka bɛ zaŋ takɔbi ku o omaŋmaŋ’ tiŋgbɔŋ maa ni.’ ”

⁸Rabishake daa labiya nti wum ni Asiria naa yi Lakishi n-chaŋla Libina ka o mini ba ti tuhiri taba.

⁹Ka bɛ daa yɛli naa, “Nyama, Itiɔpia[9] Naa Tirihaka lola tɔbu kanna ni o ti tuh’ a.” Ka o daa sabi gbaŋ lan tim tuumba Hɛzɛkia sani n-yɛli ba,

¹⁰“Yi ni ti yɛn yɛli Juda Naa Hɛzɛkia shɛm m-bɔŋɔ: Di chɛ ka a ni du m-ba a Naawuni so maa yɔhim’ a n-lo a alikauli ni o ku zaŋ Jɛrusalɛm niŋ Asiria naa nuu ni.

¹¹Nyama, a pun wum Asiria naa ni pun niŋ tiŋgbɔna pam shɛm n-saɣim li zaa la yɛla. Ka a tɛhiya ni nyin’ ni tiligi?

¹²Zuliya shɛb’ tiŋgbana n yaannim’ ni daa tuhi nyaŋ la buɣa daa tooi fa ba bahi? Di tiŋgbana maa n-nyɛ: Gɔzan mini Haran ni Rɛzɛf ni Ɛdin niriba bɛn daa be Tɛlasa la.

¹³Hamat mini Aripad ni Sɛfarivaim ni Hɛna ni Iva nanim’ la lee be ya?”

¹⁴Ka Naa Hɛzɛkia daa deei gbaŋ maa tuumba maa nuu ni n-karim, ka yiɣisi chaŋ Yawɛ jɛmbu duu nti teei gbaŋ maa sɔŋ Yawɛ tooni,

¹⁵ ka suhi Yawɛ n-yɛli, “Yawɛ ŋun nyɛ Izraɛl Naawuni ŋun ʒi o nam ʒiishee chɛrubinim’ zuɣu ŋɔ, a kɔŋko n-nyɛ Naawuni ŋun su dunia ŋɔ nama zaa, ka nyɛ ŋun nam zuɣusaa mini dunia ŋɔ.

¹⁶Yawɛ, gbilisim’ tibili wum. Yawɛ, neem’ a nina nya; ka wum Sɛnachɛrib ni tim na nti yɛli yɛtɔɣ’ shɛŋa m-mali nyin’ Naawuni ŋun be ŋɔ ansarisi shɛm.

¹⁷Yawɛ, yɛlimaŋli, Asiria nanim’ pun saɣim zuliya pam tiŋgbɔna,

¹⁸ka nyo bɛ buɣa buɣim; dama buɣa maa pala Naawuni; amaa di nyɛla ninsalinim’ ni zaŋ bɛ nuhi mali shɛli, ka di nyɛ dari mini kuɣa, dinzuɣu ka bɛ daa saɣim li maa.

¹⁹Dinzuɣu nyin’ Yawɛ ŋun nyɛ Naawuni ŋɔ, n suhir’ a, tiligim’ ti o nuu ni, ka di chɛ ka dunia ŋɔ zuliya kam nanim’ baŋ ni nyin’ Yawɛ kɔŋko n-nyɛ Naawuni.”

²⁰Di saha maa ka Amɔz bia Aizaia daa tim ti yɛli Hɛzɛkia, “Yawɛ ŋun nyɛ Izraɛl Naawuni ŋɔ yɛliya: N wum suhigu shɛli a ni suhi zaŋ chaŋ Asiria Naa Sɛnachɛrib polo la.

²¹Man’ Yawɛ ni yɛli shɛm zaŋ chaŋ o polo m-bɔŋɔ: Ziɔn bipuɣiŋga ŋun na ʒi doo, o ʒiɛm’ a, ka mal’ a ansarisi; Jɛrusalɛm bipuɣiŋga be a nyaaŋa polo n-gbaɣisir’ o zuɣu niŋd’ a.

²²Ŋuni ka a lee maani ansarisi ka tura? Ŋun zuɣu ka a lee tahira, ka niŋ karimbaani m-mirigir’ a nina niŋda? Izraɛlnim’ Naawuni ŋun be kasi ŋɔ ka a mɔri maa.

²³A tim a tuumba na ka bɛ ti mali mani a Duuma ansarisi ka yɛli, ‘N zaŋ n chɛchɛbunsi pam chaŋ ti du zoya zuɣu hal ti paai Lɛbanɔn zo’ kara zuɣu; n daa ŋma di sida ti’ wɔɣila luhi, ka ŋma sipirɛs ti’ viɛla luhi. N daa kpe di luɣ’ shɛli din ka kpɛbu, ka kpe di nyɔŋ din zibisi pam puuni.

²⁴N daa gbi kɔbilisi, ka nyu tinzun tinsi kom, ka daa siɣi Ijipti kulibɔna ni, ka n naba chɛ ka di kom zaa nyuui.’

²⁵“A bi wum ni m pun lo dimbɔŋɔnim’ zaa ka di saha waɣa? Kurimbuni ha ka m pun lo lala, ka chɛ ka di niŋ pali pumpɔŋɔ maa. Dina n-nyɛ: Ni a saɣim fɔntin’ kara, ka di leei dabari.

²⁶Ka niriba bɛn daa be tinsi maa ni kɔŋ kpiɔŋ, ka dabiɛm mali ba ka di gari ba pahi, ka bɛ daa ŋmanila tuturi mini mɔri ni mɔ’ shɛŋa din sa mɔpila zuɣu, ka mɔri dɔro gbaai li ka di kɔŋ zoobu.

²⁷“Amaa m mi a ni ʒiini shɛm min’ a ni yiri shɛm ni a ni labiri kpɛri shɛm ni a suhu ni yiɣisi bahi n zuɣu shɛm yɛla.

²⁸A suhu ni yiɣisi bahi n zuɣu ka a karimbaani yɛla kana ti kpe n tibili ni zuɣu, n ni zaŋ n ziŋgoo tu a nyee ni, ka zaŋ n galige niŋ a nol’ ni ŋ-ŋmalig’ a bah’ a ni doli so’ shɛli kana zuɣu.”

²⁹“Dimbɔŋɔ nyɛla din ti yɛn niŋ maa shihirili. Yuuni ŋɔ mini yuuni din paya na, kayari chi ka yi yɛn dira; ka yuun’ shɛli din pahir’ ata ni mi, yi ni biri ka chɛ, ka sa wain tihi n-di di wala.

³⁰Ka Judanim’ shɛb’ bɛn kpalim ni lan zooi m-be kaman ti’ shɛli din nyaɣa ba tiŋa nti wali wala la;

³¹dama bɛn kpalim maa ni ti yi Jɛrusalɛm mini Ziɔn Zoli zuɣu na n-galisi pam. Yawɛ ŋun nyɛ Tɔbbihi Naa ŋɔ loya ni o ni chɛ ka lala niŋ.

³²“Dinzuɣu Yawɛ ni yɛli shɛm zaŋ chaŋ Asiria naa polo m-bɔŋɔ: ‘O ku kpe tiŋ’ ŋɔ ni bee n-to piɛm di ni bee n-zaŋ nyɔtaɣira ka di ni na bee n-kana ti kɔri taŋkpaɣu duhiduhi gil’ li.

³³O ni yɛn doli so’ shɛli kana, dina ka o ti lan yɛn ŋmaligi dol’ labi ka ku kpe tiŋ’ ŋɔ ni na. Man’ Yawɛ n-yɛli lala maa.

³⁴Dama n ni zab’ tiŋ’ ŋɔ zuɣu n-tiligi li mmaŋmaŋ’ zuɣu ni n dabili Dauda zuɣu.’ ”

³⁵Ka Yawɛ malaika daa chaŋ Asirianim’ sansan’ ni dindali maa yuŋ nti ku bɛ tɔbbihi tuhi’ kɔbiga ni tuhi’ pihinii ni tusaanu. Ka niriba daa yiɣisi asibaasi n-nya ka kpiimba n-kul do luɣilikam zaa.

³⁶Di saha ka Asiria Naa Sɛnachɛrib daa ŋmaligi kuli ti be Ninive.

³⁷Ka o daa ti be o buɣili Nisirok duu n-jɛmdi li, ka o bidibisi bɛn nyɛ Adirammɛlɛk mini Sharɛza daa zaŋ takɔbi ku o ka zo n-kuli Ararat tiŋgbɔŋ ni. Ka o bia Ɛsarihadɔn daa di nam zan’ o zaani.