Read Dagbani 2 Nanima 20 Bible Online

2 Nanima 20 - Dagbani bible

2 Nanima 20

¹Di saha maa ka dɔro daa gbaai Hɛzɛkia hal ka o ti miri kpibu. Ka Amɔz bia anabi Aizaia daa ka o sanna ti yɛl’ o, “Yawɛ yɛliya, ‘Malim’ shili, dama a ku kpaŋ, a ni kpi.’ ”

²Ka Hɛzɛkia daa ŋmalig’ o nini bahi dukpini polo, ka suhi Yawɛ yɛli,

³“Yaa n Yawɛ, n suhir’ a, teemi n ni dol’ a ni ʒiɛyimtali ni n suhu zaa, ka tumdi din tuhi a sani shɛm la yɛla.” Ka Hɛzɛkia daa kum pam.

⁴Ka Aizaia daa yi naa maa sani, zaŋ chaŋ o ti yɛn paai zɔn’ titali sunsuuni ka Yawɛ yɛl’ o,

⁵“Ŋmaligim’ lab’ ti yɛli Hɛzɛkia ŋun nyɛ n niriba naa maa, ‘Yawɛ ŋun nyɛ a yab’ Dauda Naawuni ŋɔ yɛliya, N wum a suhigu maa, ka nya a nintam maa. Nyama, n ni chɛ ka a kpaŋ, ka zaŋ chaŋ daba ata dali, a ni chaŋ Yawɛ jɛmbu duu.

⁶N ni chɛ ka a niŋ yuun’ pinaanu pahi. N ni fa a mini tiŋ’ ŋɔ Asiria naa nuu ni bahi, ka zab’ tiŋ’ ŋɔ zuɣu mmaŋmaŋ’ zuɣu ni n dabili Dauda zuɣu.’ ”

⁷Di saha ka Aizaia daa yɛli, “Baɣisimiya fiig tia wala na nti ʒe o bintɔrigu maa ka o nya alaafee.”

⁸Ka Hɛzɛkia daa bɔhi Aizaia, “Ka bɔ n-lee yɛn nyɛ Yawɛ ni yɛli ni o ni chɛ ka n kpaŋ maa mini n ni yɛn chaŋ Yawɛ jɛmbu duu daba ata dali maa shihirili?” Ka Aizaia garigi yɛli,

⁹“Shihirili shɛli din yi Yawɛ sanna n-wuhi ni o ni niŋ o ni lo a alikauli ni o ni niŋ shɛm maa m-bɔŋɔ: A bɔri ni mahim chaŋla tooni polo napɔŋ ŋmɛbu pia bee di lab’ nyaaŋa polo napɔŋ ŋmɛbu pia?”

¹⁰Ka Hɛzɛkia garigi yɛl’ o, “Di bi to ni mahim chaŋ tooni polo napɔŋ ŋmɛbu pia, dinzuɣu chɛ ka di labila nyaaŋa polo napɔŋ ŋmɛbu pia.”

¹¹Ka anabi Aizaia daa suhi Yawɛ, ka o chɛ ka mahim maa lab’ nyaaŋa polo napɔŋ ŋmɛbu pia kaman Ahaz ni daa buɣisi wuntaŋ’ chandi yɛla zali shɛm la.

¹²Di saha maa ka Baladan bia Mɛrɔdakibaladan ŋun daa nyɛ Babilɔn naa la daa wum ni Hɛzɛkia biɛra, ka sabi gbaŋ m-bo pini pahi di zuɣu tim tuumba ni bɛ zaŋ ti ti Hɛzɛkia.

¹³Ka Hɛzɛkia daa deei tuumba maa, ka zaŋ o daazichi zaa din nyɛ anzinfa mini salima ni tulaale ni kpa’ viɛla ni o tɔb’ nɛma ni binshɛɣukam zaa din be o nɛma duri ni wuhi ba. Ka binshɛli daa bi kpalim Hɛzɛkia yiŋ’ puuni bee o nam sulinsi maa zaa ni, ka o bi zaŋ li wuhi ba.

¹⁴Ka anabi Aizaia daa ka Naa Hɛzɛkia sanna nti bɔh’ o, “Ya ka niriba ŋɔ lee yina, ka wula ka bɛ lee yɛl’ a?” Ka Hɛzɛkia garigi yɛl’ o, “Bɛ yila katiŋ’ na; Babilɔn ka bɛ yina.”

¹⁵Ka o bɔh’ o, “Ka bɔ ka bɛ lee nya a yili ŋɔ?” Ka Hɛzɛkia garigi yɛl’ o, “Bɛ nya binshɛɣukam zaa din be n yiŋa; ka binshɛli bi kpalim n nɛma dur’ la ni ka m bi zaŋ li wuhi ba.”

¹⁶Di saha ka Aizaia daa yɛli Hɛzɛkia, “Wummi Yawɛ ni yɛli shɛm:

¹⁷ Dahin shɛli kanna ka bɛ ni ti kana ti kpuɣi binshɛɣukam zaa din be a yili ŋɔ min’ a yaannim’ ni daa bo binshɛɣukam zali zaŋ kana pumpɔŋɔ ŋɔ n-kuli Babilɔn; ka di shɛli ku guui, Yawɛ n-yɛli lala maa.

¹⁸ Ka bɛ ni ti gbahi amaŋmaŋ’ bidibisi shɛba n-zaŋ ba chaŋ ti leei namɔɣilisi ka bɛ be Babilɔn nayili.”

¹⁹Ka Hɛzɛkia daa yɛli Aizaia, “Yawɛ yɛtɔɣ’ shɛli a ni yɛli maa viɛla.” Dama o daa yɛlila o suhu ni, “Suhudoo mini alaafee yi ni be n ʒiɛmani ŋɔ ni, di viɛla.”

²⁰Hɛzɛkia ni daa tum tuun’ shɛŋa zaa pahi min’ o kpiɔŋ ni o ni daa gbi mɔɣili ka niŋ kɔsoli n-vo kom kpɛhi tiŋ’ puuni na la zaa, bɛ sab’ di yɛla niŋ Juda nanim’ litaafi shɛŋa bɛ ni booni Yɛlikura litaafinim’ la ni.

²¹Ka Hɛzɛkia daa ti kani, ka o bia Manaasa di nam zan’ o zaani.