Read Dagbani 2 Nanima 22 Bible Online

2 Nanima 22 - Dagbani bible

2 Nanima 22

¹ Jɔsia yuma daa nyɛla yuma anii saha shɛl’ o ni daa di nam maa. O daa diya n-niŋ o nam maa ni la yuun’ pihitaniyini Jɛrusalɛm. O ma yuli n-daa booni Jɛdida, o daa nyɛla Adaya, Bɔzikat nir’ la bipuɣiŋga.

²Jɔsia daa tum din tuhi Yawɛ sani, ka daa dol’ o yab’ Dauda naba o tuma ni ka bi ŋmaligi kpa nudirigu polo bee nuzaa polo ka chɛ li.

³Naa Jɔsia ni daa di nam zaŋ chaŋ yuun’ pisaayika saha, ka o daa tim Azalia bia Shafan ŋun daa nyɛ gbaŋŋmara, ka nyɛ Mɛshulam yaaŋa la Yawɛ jɛmbu duu n-yɛl’ o,

⁴“Cham’ maligumaaniba zuɣulan’ Hilikia sani nti chɛ ka o mali dunɔguliba bɛn zaani Naawuni jɛmbu duu dunol’ ni n-deeri laɣ’ shɛli niriba ni zaŋdi tahiri Yawɛ jɛmbu duu na la laasabu.

⁵Ka o chɛ ka bɛ zaŋ li ti tuma zuɣulaannim’ bɛn lihiri ka bɛ tumdi Yawɛ jɛmbu duu tuma la, ka bɛ zaŋ li yo tumtumdiba bɛn tumdi Yawɛ jɛmbu duu maa tuma maa.

⁶Bɛna n-nyɛ: kapintanim’ mini tammɛriba zuɣulaannim’ ni tammɛriba, ka da dari mini kuɣ’ bɔɣa din yɛn zaŋ mali Naawuni jɛmbu duu maa.

⁷ Amaa di yɛliya tammɛriba zuɣulaannim’ maa ni bɛ malim’ bɛ ni di laɣ’ shɛli yi ni zaŋ ti ba maa laasabu n-wuhi ya, dama bɛ doli yɛlimaŋli soli bɛ tuma ni”

⁸Di saha ka maligumaaniba zuɣulan’ Hilikia daa yɛli gbaŋŋmara Shafan, “N nyala Naawuni zaligu kundi la Yawɛ jɛmbu duu ŋɔ ni;” ka daa zaŋ kundi maa ti Shafan ka o karim li.

⁹Ka Shafan daa lab’ Naa Jɔsia sanna nti yɛl’ o, “A tumtumdiba yihi laɣ’ shɛli zaa din be Naawuni jɛmbu duu maa ni n-zaŋ li ti tuma zuɣulaannim’ bɛn lihiri ka bɛ tumdi Yawɛ jɛmbu duu tuma maa.”

¹⁰Di nyaaŋa ka gbaŋŋmara Shafan lan yɛli naa, “Maligumaana Hilikia n-zaŋ kundi ŋɔ ti ma;” ka daa zani naa maa tooni karim li.

¹¹Naa Jɔsia ni daa wum Naawuni zaligu kundi maa ni yɛli shɛm, o daa darigimi toog’ omaŋmaŋ’ binyɛrigu.

¹²Di saha ka Naa Jɔsia daa yɛli maligumaana Hilikia mini Shafan bia Ahikam ni Mikaya bia Akibɔr ni gbaŋŋmara Shafan ni naa kpambal’ Asaaya,

¹³“Chamiya ti bɔhi baŋ din be Yawɛ sani n-ti m mini Judanim’ zaa zaŋ chaŋ ti ni nya kundi shɛli ŋɔ ni yɛli shɛm maa polo; dama Yawɛ suhu yiɣisiya pam bahi ti zuɣu; ti yaannim’ ni daa bi doli kundi ŋɔ puuni ni wuhi shɛm ka daa bi tumdi di ni sab’ yɛli shɛm zaŋ chaŋ ti polo la zuɣu.”

¹⁴Dinzuɣu ka maligumaana Hilikia mini Ahikam ni Akibɔr ni Shafan ni Asaaya daa chaŋ Tikiva bia Shallum ŋun daa nyɛ Harihas yaaŋa ŋun su Naawuni jɛmbu duu binyɛra fukumsi la paɣ’ Hulda ŋun daa nyɛ anab’ la sani, (o daa bela Jɛrusalɛm yaɣ’ shɛli polo di saha maa); ka bɛ daa zaŋ bɛ ni ʒi yɛtɔɣ’ shɛl’ na yɛl’ o.

¹⁵Ka o yɛli ba, “Yawɛ ŋun nyɛ Izraɛl Naawuni ŋɔ yɛliya, ‘Yɛlimiya ninvuɣ’ so ŋun tim ya n sani ŋɔ na,

¹⁶ni man’ Yawɛ ni yɛli shɛm m-bɔŋɔ, “N ni chɛ ka zaɣ’ biɛɣu paai yiya ŋɔ nima mini di niriba kaman kundi maa puuni ni yɛli shɛlikam zaa, ka Juda naa karim li maa.

¹⁷Dama bɛ zaɣisi ma, ka tuɣindi tulaale zim n-jɛmdi buɣa ni bɛ chɛ ka n suhu yiɣisi zaŋ chaŋ bɛ ni zaŋ bɛ nuhi tum tuun’ shɛŋa maa polo. Dinzuɣu ka n suhu yiɣisi bahi ya ŋɔnim’ zuɣu ka kɔŋ maabu.

¹⁸Amaa zaŋ chaŋ Juda naa ŋun tim ya na ni yi ti bɔhi baŋ din be man’ Yawɛ sani ŋɔ polo, yɛlimiy’ o ni Yawɛ ŋun nyɛ Izraɛl Naawuni ŋɔ yɛliya, ‘A ni wum yɛtɔɣ’ shɛŋa,

¹⁹ka niŋ tuuba a suhu ni, a ni wum ka n yɛli ni n yɛn niŋ Jɛrusalɛm mini di niriba shɛm ni n ni yɛn chɛ ka noli di li ka di zani dabari, ka a siɣis’ amaŋ’ n sani n-darigi toog’ a binyɛrigu ka kum niŋ ma la zuɣu, Man’ Yawɛ yɛliya, N wum a kumsi maa.

²⁰Dinzuɣu n ku chɛ ka n ni yɛn chɛ ka zaɣ’ biɛ’ shɛli paai Jɛrusalɛm maa niŋ a ʒiɛmani ŋɔ ni ka a nini nya li. N ni chɛ ka a ti yi dunia yili ni suhudoo.’ ” Ka tuumba maa daa zaŋ yɛtɔɣa maa lab’ ti yɛli Naa Jɔsia.